Genesis 38 - Yn Vible Casherick 1775 1819

CAB. XXXVIII

¹ As haink eh gy-kione, ec y traa shen, dy jagh Judah sheese veih e vraaraghyn, as hyndaa eh dy yeeaghyn Adullamite dy row, va’n ennym echey Hirah.

² As honnick Judah ayns shen inneen Canaanite dy row, va’n ennym echey Shuah: as ghow eh ee, as lhie eh mâree:

³ As ren ee gientyn, as gymmyrkey mac; as denmys eh eh Er.

⁴ As ren ee gientyn reesht, as gymmyrkey mac: as denmys ee eh Onan.

⁵ As ren ee gientyn reesht, as gymmyrkey mac: as denmys ee eh Shelah: as v’eh ec Chezib; tra dymmyrk ee eh.

⁶ As ghow Judah ben son Er e vac shinney, va’n ennym eck Tamar.

⁷ As va Er, mac shinney Yudah, cur rish olk ayns shilley’n Chiarn; as stroie yn Chiarn eh.

⁸ As dooyrt Judah rish Onan, Lhie marish ben dty vraarey, as poose ee, as trog seose sluight da dty vraar.

⁹ As va fys ec Onan, nagh beagh y sluight enmyssit ersyn: as haink eh gy-kione, tra hie eh stiagh gys ben e vraarey, dy lhig eh er y thalloo eh, er-chee nagh droggagh eh sluight da e vraar.

¹⁰ As hug shoh jymmoose er y Chiarn; shen-y-fa hug eh eshyn dy baase myrgeddin.

¹¹ Eisht dooyrt Judah, rish Tamar e inneen-’sy-leigh, Jean tannaghtyn dty ven-treoghe ec thie dty ayrey, derrey vees my vac Shelah ny ghooinney: [son dooyrt eh, Er-aggle dy vow eshyn myrgeddin baase, myr hooar e vraaraghyn] as hie Tamar, as ren ee baghey ayns thie e ayrey.

¹² As lurg earish, hooar inneen Shuah ben Yudah baase: as lurg da Judah ve er ny gherjaghey, hie eh seose gys lommyrtee ny geyrragh gys Timnath, eh-hene as e charrey Hirah yn Adullamite.

¹³ As ve inshit da Tamar, gra, Cur-my-ner, ta dty ayr-’sy-leigh goll seose gys Timnath, dy lommyrt e chirree.

¹⁴ As hug ee j’ee e garmadyn ben-treoghe, as hug ee breid er yn eddin eck, as choodee ee ee-hene, as hoie ee ayns ynnyd foshlit, ta liorish y raad gys Timnath: son honnick ee dy row Shelah er n’aase gys stayd dooinney, as cha row ee er ny choyrt da son ben.

¹⁵ Tra honnick Judah ee, smooinee eh dy nee streebagh v’ee: er-yn-oyr dy row ee er choodaghey e eddin.

¹⁶ As hyndaa eh lh’ee er y raad, as dooyrt eh, Tar royd, ta mee guee ort, lhig dou lhie mayrt (son cha row fys echey, dy nee e ven-chleuin v’ayn) as dooyrt ish, Cre ver oo dou, son cheet stiagh hym?

¹⁷ As dooyrt eh, Ver-ym mannan hood veih’n chioltane: as dooyrt ish, Der oo gioal dou, derrey ver oo hym eh.

¹⁸ As dooyrt eh, Cre’n gioal ver-ym dhyt? As dooyrt ish, Cur dou dty ainey, as dty vraceletyn, as dty lorg t’ayns dty laue: as hug eh jee ad, as va echey dy yannoo r’ee, as ren ee giennaghtyn.

¹⁹ As hrog ee urree as hie ee ro-ee, as hug ee e coodagh j’ee, as hug ee e garmadyn ben-treoghe urree.

²⁰ As hug Judah yn mannan, liorish laue e charrey yn Adullamite, dy eaysley e yioal veih laue yn ven: agh cha row ee ry-gheddyn.

²¹ Eisht vrie eh jeh deiney yn ynnyd shen, gra, Cre vel y streebagh va ry-akin rish oirr y raad? as dooyrt ad, Cha row streebagh erbee ’syn ynnyd shoh.

²² As haink eh reesht gys Judah, as dooyrt eh, Cha voddym briaght y gheddyn j’ee: as myrgeddin, dooyrt deiney yn ynnyd, nagh row streebagh erbee ’syn ynnyd shoh.

²³ As dooyrt Judah, Lhig ee freayll ad, nagh bee mayd naarit: cur-my-ner, hug mee yn mannan shoh, agh cha vel oo er gheddyn ee.

²⁴ As haink eh gy-kione, mysh three meeaghyn lurg shen, dy row eh inshit da Judah, gra, Ta Tamar dty ven-chleuin er n’yannoo maarderys, as myrgeddin, cur-my-ner, t’ee torragh, liorish maarderys: As dooyrt Judah, Cur-jee lhieu magh ee, as lhig jee ve losht.

²⁵ Tra hug ad lhieu magh ee, hug ee fys gys e ayr-’sy-leigh, gra, Liorish y dooinney s’liesh ad shoh, ta mish torragh: as dooyrt ee, Cur tastey mie, ta mee guee ort, quoi s’liesh ad shoh, yn fainey, ny braceletyn, as y lorg.

²⁶ As ghow Judah roo, as dooyrt eh, T’ee er ve ny s’cairal na mish: er-yn-oyr nagh dug mee ee da Shelah my vac: as cha row echey dy yannoo r’ee arragh.

²⁷ As haink eh gy-kione, ayns e troailt, cur-my-ner, dy row daa lhiannoo er ny ymmyrkey.

²⁸ As haink eh gy-kione, tra v’ee er-troailt, dy dug yn derrey yeh magh e laue; as ghow’n ven-reaylt, as chiangle ee er y laue echey snaie scarleod, gra, Haink eh shoh magh hoshiaght.

²⁹ As haink eh gy-kione, myr hayrn eh back e laue, cur-my-ner, dy daink e vraar magh: as dooyrt ee, Kys t’ou uss er vrishey magh. Ort hene dy row’n brishey shoh: shen-y-fa v’eh enmyssit Pharez.

³⁰ As ny lurg shen, haink magh e vraar, va’n snaie scarleod er e laue; as v’eh enmyssit Zarah.