Genesis 35 - Yn Vible Casherick 1775 1819

CAB. XXXV

¹ As dooyrt Jee rish Jacob, Trog ort, gow seose gys Beth-el, as jean cummal ayns shen: as trog altar ayns shen, da Jee haink kionfenish dhyt, tra v’ou er-chea veih eddin Esau dty vraar.

² Eisht dooyrt Jacob rish lught e hie, as rish ooilley ny va mârish, Cur-jee ersooyl ny jeeghyn joarree ta ny mast’ eu, as bee-jee glen, as caghlaa jee nyn goamraghyn:

³ As lhig dooin troggal orrin, as goll seose gys Beth-el; as neem’s altar y hroggal ayns shen gys Jee, ren feaysley orrym ayns laa my heaghyn trome, as va mârym ayns y raad va mee goll,

⁴ As hug ad da Jacob ooilley ny jeeghyn joarree v’ayns nyn laue, as ooilley ny jewellyn v’ayns nyn gleayshyn; as dollee Jacob ad, fo yn billey-darragh va liorish Shechem.

⁵ As hie ad er nyn yurnah: as va atchim Yee er ny ard-valjyn, va mygeayrt-y-moo, as cha deiyr ad er mec Yacob.

⁶ Myr shen haink Jacob gys Luz, t’ayns cheer Chanaan (ta shen Beth-el) eh-hene as ooilley yn sleih va mârish.

⁷ As hrog eh altar ayns shen, as denmys eh yn ynnyd El-beth-el: er-yn-oyr dy nee ayns shen hoilshee Jee eh-hene da, tra ren eh chea veih eddin e vraarey.

⁸ Agh hooar Deborah boandyr Rebekah baase, as v’ee oanluckit liorish Beth-el, fo billey-darragh: as ve enmyssit Allon-bachuth.

⁹ As hoilshee Jee eh-hene da Jacob reesht, tra haink eh magh ass Padan-aram: as vannee eh eh.

¹⁰ As dooyrt Jee rish, Ta dty ennym Jacob: cha bee oo ny sodjey enmyssit Jacob, agh Israel vees dty ennym: as denmys eh eh Israel.

¹¹ As dooyrt Jee rish, Mish y Jee ooilley-niartal: bee uss messoil as jean bishaghey; bee ashoon as earroo dy ashoonyn jeed’s, as hig reeaghyn veih dty veeghyn.

¹² As y cheer, yiall mee da Abraham, as Isaac, dhyt’s ver-ym eh, as da dty luight dty yeï ver-ym yn cheer shoh.

¹³ As hie Jee seose voish, ’syn ynnyd raad v’eh taggloo rish.

¹⁴ As hrog Jacob pillar ayns yn ynnyd, raad v’eh taggloo rish, eer pillar cloaie: as gheayrt eh oural-feeyney er, as ooil [dy chasherickey eh]

¹⁵ As denmys Jacob yn ynnyd, raad loayr Jee rish, Beth-el.

¹⁶ As jimmee ad er nyn Yurnah veih Beth-el, as cha row agh raad giare dy heet gys Ephrath: as huitt Rachel er-troailt, doillee dy ve livreit.

¹⁷ As haink eh gy-kione, tra v’ee ayns êgin ny pianyn troailt, dy dooyrt y ven-reaylt r’ee, Ny lhig dty chree voïd: bee yn mac shoh ayd myrgeddin.

¹⁸ As haink eh gy-kione, myr v’ee ayns paartail, (son hooar ee baase) dy denmys ee eh Benoni: agh denmys e ayr eh Benjamin.

¹⁹ As hooar Rachel baase, as v’ee oanluckit ayns y raad gys Ephrath, ta shen Beth-lehem.

²⁰ As hrog Jacob pillar er yn oaie eck: shen pillar oaie Rachel gys y laa t’ayn jiu.

²¹ As ghow Israel e yurnah, as skeayl eh e chabbane cheu elley jeh toor Edar.

²² As haink eh gy-kione, tra va Israel cummal ’sy cheer shen, dy jagh Reuben, as lhie eh marish Bilhah co-lhiabbagh e ayrey: as cheayll Israel jeh. Nish va mec Yacob ghaa-yeig.

²³ Mec Leah; Reuben mac shinney Yacob, as Simeon, as Levi, as Judah, as Issachar, as Zebulun.

²⁴ Mec Rachel: Joseph as Benjamin.

²⁵ As mec Bilhah, sharvaant Rachel; Dan as Naphtali.

²⁶ As mec Zilpah, sharvaant Leah; Gad as Asher. Ad shoh mec Yacob, v’er nyn ruggey da ayns Padan-aram.

²⁷ As haink Jacob gys Isaac e ayr gys Mamre, gys ard-valley Arbah [ta shen Hebron] raad va Abraham as Isaac cummal.

²⁸ As va eash Isaac nuy-feed bleïn.

²⁹ As hooar Isaac baase, as v’eh oanluckit marish e chynney, tra v’eh shenn, as er cheau eash vooar; as doanluck e vec Esau as Jacob eh.