Genesis 34 - Yn Vible Casherick 1775 1819

CAB. XXXIV

¹ As hie Dinah inneen Leah, dymmyrk ee da Jacob magh dy akin inneenyn y cheer.

² As tra va Shechem mac Hamor yn Hivite, prince jeh’n cheer, er vakin ee, ghow eh ee, as lhie eh mâree, er-êgin.

³ As ren e chree lhiantyn gys Dinah inneen Yacob; as v’eh ayns graih rish y ven aeg, as loayr eh dy dooie r’ee.

⁴ As loayr Shechem rish e ayr Hamor, gra, Fow yn ven aeg shoh dou son ben.

⁵ As cheayll Jacob, dy row eh er ghoaill er-êgin Dinah e inneen [nish va e vec marish e vaase ’sy vagher] as va Jacob ny host, derrey haink ad thie.

⁶ As hie Hamor ayr Shechem magh gys Jacob, dy loayrt rish.

⁷ As haink mec Yacob veih’n vagher tra cheayll ad jeh, as va ny deiney seaghnit, as v’ad feer jymmoosagh; er-yn-oyr dy row eh er hayrn scammylt er Israel, ayns lhie marish inneen Yacob, red nagh lhisagh ve jeant.

⁸ As loayr Hamor roosyn, gra, Ta cree my vac Shechem soit er yn inneen euish: guee-ym erriu, cur-jee da ee son ben.

⁹ As jean-jee cleunys rooinyn, as cur-jee ny inneenyn euish dooinyn, as gow-jee ny inneenyn ainyn diuish.

¹⁰ As nee shiu cummal mârin, as bee yn cheer eddyr shin: jean-jee baghey as dellal ayn, as gow-jee cummallyn diu hene.

¹¹ As dooyrt Shechem rish yn ayr, as ny braaraghyn eck Lhig dou foayr y gheddyn ’sy chilley eu; as cre-erbee hirrys shiu orrym, ver-ym diu.

¹² Shir-jee wheesh as sailliu dy hoghyr as dy chooid, as ver-yms cordail myr ver shiu orrym: agh cur-jee dou yn ven aeg son ben.

¹³ Agh dreggyr mec Yacob Shechem, as Hamor e ayr, dy molteyragh, as dooyrt ad, (er-yn-oyr dy row eh er hayrn scammylt er Dinah nyn shuyr)

¹⁴ As dooyrt ad roo, Cha vod mayd shoh ’yannoo, dy choyrt nyn shuyr da fer chymmyltagh: son veagh shen scammylt dooin.

¹⁵ Agh shoh myr choardys mayd riu: My vees shiuish myr ta shinyn, dy bee dy chooilley mac dooinney jiu er ny yiarey-chymmylt:

¹⁶ Eisht ver mayd ny inneenyn ain diuish, as gow mayd ny inneenyn euish dooinyn, as nee mayd cummal mêriu, as bee mayd yn un phobble.

¹⁷ Agh mannagh n’eaisht shiu rooin, dy ve er nyn yiarey-chymmylt; eisht gow mayd yn inneen ain, as hem mayd roïn.

¹⁸ As ren Hamor, as Shechem mac Hamor coardail gys ny goan oc.

¹⁹ As cha lhig y dooinney aeg shaghey dy yannoo shoh, er-yn-oyr dy row taitnys echey ayns inneen Yacob: as v’eh ny s’ooasle na ooilley thie e ayrey.

²⁰ As haink Hamor as Shechem e vac gys giat yn ard-valley oc, gra.

²¹ Ta ny deiney shoh sheeoil mârin, shen-y-fa lhig daue cummal ’sy cheer, as dellal ayn: son y cheer, cur-my-ner, te mooar dy liooar er ny son oc, lhig dooin goaill ny inneenyn ocsyn dooinyn son mraane, as lhig dooin cur dauesyn ny inneenyn ainyn.

²² Agh ynrycan er y chonaant shoh nee ny deiney coardail rooin, dy chummal mârin, as dy ve yn un sleih, my vees dy chooilley mac dooinney ny mast’ ain er nyn yiarey-chymmylt, myr t’adsyn er nyn yiarey-chymmylt.

²³ Nagh bee yn ollagh oc, as y chooid oc, as dy chooilley vaagh t’oc lhianyn? lhig dooin agh jannoo myr t’ad er ghra, as nee ad cummal mârin.

²⁴ As rish Hamor, as Shechem e vac, deaisht ooilley ny hie magh ass giat yn ard-valley echey; as va dy chooilley vac dooinney er nyn yiarey-chymmylt, ooilley ny hie magh er giat yn ard-valley.

²⁵ As haink eh gy-kione, er y trass laa, tra v’ad ayns pian, dy ghow jees jeh mec Yacob, Simeon as Levi, braaraghyn Dinah, dagh dooinney e chliwe, as haink ad er yn ard-valley dy daaney, as varr ad ooilley ny deiney.

²⁶ As varr ad Hamor, as Shechem e vac, lesh foyr y chliwe, as ghow ad Dinah magh ass thie Shechem, as hie ad rhymboo.

²⁷ As haink mec Yacob er ny merriu, as spooill ad yn ard-valley, er-yn-oyr dy row ad er hayrn scammylt er nyn shuyr.

²⁸ As ghow ad ny kirree as ny dew, as ny assylyn oc, as shen ny v’ayns yn ard-valley, as shen ny v’ayns y vagher.

²⁹ As ooilley yn verchys oc, as ooilley yn chloan veggey oc, as ny mraane oc ghow ad ayns cappeeys, as spooill ad ooilley ny v’ayns y thie.

³⁰ As dooyrt Jacob rish Simeon as Levi; Ta shiu er hayrn seaghyn orrym, as er m’y yannoo dwoaiagh mastey cummaltee ny cheerey, mastey ny Canaaniteyn, as ny Perizziteyn: as myr nagh vel shin agh beggan sleih ayns earroo, nee ad chaglym ad-hene cooidjagh m’oï, as m’y ghunverys, as beem’s er my stroie, mish as my hie.

³¹ As dooyrt ad, Kys by-lhoys da dellal rish y chuyr ain, myr rish streebagh?