Genesis 33 - Yn Vible Casherick 1775 1819

CAB. XXXIII

¹ As hrog Jacob seose e hooillyn, as yeeagh eh, as cur-my-ner, haink Esau, as mârish kiare cheead dooinney: as rheynn eh yn chloan er Leah as Rachel, as y daa harvaant.

² As hug eh ny sharvaantyn, as y chloan ocsyn ’sy toshiaght, as Leah as yn chloan eck’s nyn yeï, as Rachel as Joseph er-jerrey.

³ As hie eh harrish rhymboo, as chroym eh eh-hene gys y thalloo shiaght keayrtyn, derrey haink eh er-gerrey da e vraar.

⁴ As roie Esau ny whail, as ghow eh ayns e roihaghyn eh, as huitt eh er e wannal, as phaag eh eh; as cheayn ad.

⁵ As hrog eh seose e hooillyn, as honnick eh ny mraane as y chloan; as dooyrt eh, Quoi ad shen mayrt? As dooyrt eh, Yn chloan ta Jee dy graysoil er choyrt da dty harvaant.

⁶ Eisht haink ny sharvaantyn er-gerrey, ad-hene as nyn gloan, as chroym ad ad-hene.

⁷ As haink Leah myrgeddin marish e chloan er-gerrey, as chroym ad ad-hene: as ny lurg shen haink Joseph er-gerrey as Rachel, as chroym adsyn ad-hene.

⁸ As dooyrt eh, Cre t’ou kiarail, liorish ooilley yn imman shoh, haink my whail? As dooyrt eh, T’ad shoh dy voddym foayr y gheddyn ayns shilley my hiarn.

⁹ As dooyrt Esau, Ta dy liooar aym pene, my vraar; freill shen ny t’ayd dhyt hene.

¹⁰ As dooyrt Jacob, Guee-ym ort, my ta mee nish er gheddyn foayr ayns dty hilley, gow eisht my yioot veih my laue: son er-y-fa shen ta mee er vakin dty eddin, myr dy beign er vakin eddin Yee; as t’ou er hoiaghey jee’m.

¹¹ Gow, ta mee guee ort, my vannaght, ta mee er choyrt lhiam hood; er-yn-oyr dy vel Jee er ghellal dy graysoil rhym: as er-y-fa dy vel dy liooar aym pene; as hionn eh er, as ren eh goaill eh.

¹² As dooyrt eh, Lhig dooin goaill nyn yurnah, as lhig dooin goll, as ver-yms er y raad oo.

¹³ As dooyrt eh rish, Ta fys ec my hiarn, dy vel y chloan faase, as ta ny shioltaneyn as ny immanyn trome ta mârym: as my vees ad eiyrit ro hiyragh agh un laa, bee yn slane shioltane dy choayl.

¹⁴ Lhig da my hiarn, ta mee guee ort, goll harrish roish e harvaant: as hem’s er my hoshiaght ass my aash, cordail myr vees y maase ta goll roym, as y chloan er y hon; derrey hig-ym gys my hiarn, gys Seir.

¹⁵ As dooyrt Esau, Lhig dou nish faagail mayrt ayrn jeh’n cheshaght ta mârym: As dooyrt eh, Cha vel feme rish, lhig dou foayr y gheddyn ayns shilley my hiarn.

¹⁶ Myr shen hyndaa Esau yn laa shen, er y raad gys Seir.

¹⁷ As hie Jacob er e yurnah gys Succoth, as hrog eh thie da hene, as ren eh bwaneyn son e vaase: shen-y-fa ta’n ynnyd enmyssit Succoth.

¹⁸ As haink Jacob gys Shalem, ard-valley jeh Shechem, t’ayns cheer Chanaan, tra haink eh veih Padan-aram; as hoie eh e chabbane er-gerrey da’n ard-valley.

¹⁹ As chionnee eh peesh dy halloo, raad skeayl eh e chabbane, veih laue chloan Hamor, ayr Shechem, son keead peesh dy argid.

²⁰ As hrog eh altar ayns shen, as denmys eh eh El-elohe-israel.