Genesis 32 - Yn Vible Casherick 1775 1819

CAB. XXXII

¹ As hie Jacob er e raad, as haink ainleyn Yee ny whail.

² As tra honnick Jacob ad, dooyrt eh, Shoh sheshaght-caggee Yee: as denmys eh yn ynnyd shen Mahanaim.

³ As hug Jacob chaghteryn roish gys Esau e vraar, gys thalloo Seir, cheer Edom.

⁴ As hug eh currym orroo, gra, Myr shoh nee shiu loayrt rish my hiarn Esau: Ta dty harvaant Jacob gra myr shoh: Ta mee er cheau my hraa marish Laban, as er vuirriaght ayns shen derrey nish:

⁵ As ta dew as assylyn aym, shioltaneyn, as fir-vooinjerey, as sharvaantyn: as ta mee er chur fys dy insh da my hiarn, dy voddym foayr y gheddyn ayns dty hilley.

⁶ As hyndaa ny chaghteryn gys Jacob, gra, Haink shin gys dty vraar Esau, as t’eshyn neesht cheet dty whail, as kiare cheead dooinney mârish.

⁷ Eisht va Jacob dy mooar agglit as seaghnit: as rheynn eh yn sleih va mârish, as ny shioltaneyn as shellooyn, as ny camelyn, ayns daa heshaght;

⁸ As dooyrt eh, My hig Esau gys y derrey heshaght, as tuittym orroo, eisht nee yn cheshaght elley ta faagit cosney roue.

⁹ As dooyrt Jacob, O Yee m’ayr Abraham, as Yee m’ayr Isaac, yn Chiarn dooyrt rhym, Chyndaa reesht gys dty heer hene, as gys dty chynney, as neem’s dellal dy mie rhyt:

¹⁰ Cha vel mish feeu jeh’n ayrn sloo jeh ooilley ny myghinyn, as jeh ooilley yn chenjallys ynrick t’ou er hoilshaghey da dty harvaant: son cha row aym agh my lorg tra hie mee harrish yn Jordan shoh, as nish ta mee er jeet dy ve daa heshaght vooar.

¹¹ Livrey mee, ta mee guee ort, veih laue my vraar, veih laue Esau: son ta mee goaill aggle roish, dy jig eh as dy stroie eh mish, as y voir marish y chloan.

¹² As dooyrt uss, Neem’s son shickyrys foayr y hoilshaghey dhyt, as jannoo dty luight myr genniagh y traie, nagh vod ve er ny earroo.

¹³ As ghow eh aaght ayns shen yn oie cheddin, as ghow eh jeh shen, ny va fo e laue, gioot son Esau e vraar.

¹⁴ Daa cheead goair woirryn, as feed goair fyrryn, daa cheead keyrrey, as feed rea.

¹⁵ Jeih camelyn as feed bluight, marish ny sharree, da-eed booa, as jeih therriu, feed assyl bwoirryn, as jeih sharree.

¹⁶ As livrey eh ad gys laue e harvaantyn, dy chooilley imman orroo hene; as dooyrt eh rish e harvaantyn, Gow-jee harrish roym’s, as lhig da tammylt ’ve eddyr imman as imman.

¹⁷ As hug eh currym er yn fer toshee, gra, Tra nee Esau my vraar dty veeiteil, as briaght jeed, gra, Quoi lesh oo? as c’raad t’ou goll? as quoi lesh ad shoh ta royd?

¹⁸ Eisht abbyr uss, T’ad lesh dty harvaant Jacob; She gioot eh, er ny choyrt gys my hiarn Esau: as cur-my-ner, t’eh myrgeddin cheet nyn yeï.

¹⁹ As myr shoh hug eh currym er yn nah er, as y trass, as er ooilley ny deiyr ny immanyn, gra, Er yn aght shoh nee shiu loayrt rish Esau, tra nee shiu meeiteil eh.

²⁰ As abbyr-jee ny sodjey, Cur-my-ner, ta dty harvaant Jacob nyn yeï. Son dooyrt eh, Nee’m y veeinaghey eh lesh y gioot ta goll roym, as ny lurg shen hee-ym yn eddin echey: foddee dy jean eh soiagh jee’m.

²¹ Myr shen va’n gioot er ny choyrt harrish roish: as ghow eh hene aaght yn oie shen ’sy cheshaght.

²² As dirree eh seose yn oie shen, as ghow eh e ghaa ven, as e ghaa harvaant, as e un vac jeig, as hie ad harrish yn awin Jabbok.

²³ As ghow eh ad, as hug eh ad harrish yn awin, as hug eh harrish e chooid.

²⁴ As va Jacob faagit ny-lomarcan: as ren dooinney gleck rish, derrey brishey’n laa.

²⁵ As tra honnick eh nagh chossyn eh er, venn eh rish kione e lheeasid: as va slheeasid Yacob ass ynnyd, myr v’eh gleck rish.

²⁶ As dooyrt eh, Lhig y raad dou, son ta’n laa brishey: as dooyrt eh, Cha lhig-ym yn raad dhyt, mannagh jean oo mee y vannaghey.

²⁷ As dooyrt eh rish, Cre ta dty ennym? as dooyrt eh, Jacob.

²⁸ As dooyrt eh, Cha bee dty ennym ny sodjey Jacob, agh Israel: son myr prince ta pooar ayd marish Jee, as marish deiney, as t’ou er gheddyn y varriaght.

²⁹ As dênee Jacob jehsyn, as dooyrt eh, Insh dooys, ta mee guee ort, dty ennym’s: As dooyrt eh, Cre’n-fa te, dy vel oo briaght son my ennym’s? as vannee eh eh ayns shen.

³⁰ As denmys Jacob yn ynnyd shen Peniel; Son ta mee er vakin Jee eddin ry eddin, as foast ta mee bio.

³¹ As myr hie eh harrish Peniel, dirree yn ghrian er, as v’eh baccagh ayns e lheeasid.

³² Shen-y-fa cha vel cloan Israel gee jeh’n feh ren shyrgaghey, t’er kione y lheeasid, derrey’n laa t’ayn jiu: er-y-fa dy venn eh rish kione slheeasid Yacob ayns y feh ren farbagh.