Genesis 31 - Yn Vible Casherick 1775 1819

CAB. XXXI

¹ As cheayll eh goan mec Laban, gra, Ta Jacob er ghoaill ersooyl ooilley ny va lesh nyn ayr, as jeh cooid nyn ayrey t’eh er gheddyn ooilley yn verchys shoh.

² As hug Jacob tastey da eddin Laban, as cur-my-ner, cha row eh lesh myr ve roïe.

³ As dooyrt y Chiarn rish Jacob, Chyndaa reesht gys cheer dty ayraghyn, as gys dty chynney: as bee’m mayrt.

⁴ As hug Jacob fys, as deïe eh er Rachel as Leah gys e hioltaneyn.

⁵ As dooyrt eh roo, Ta mee cur tastey da eddin nyn ayrey, nagh vel eh lhiam myr bollagh eh: agh ta Jee my ayrey er ve mârym.

⁶ As ta fys euish, dy nee lesh rere my phooar ta mish er hirveish nyn ayr.

⁷ As ta’n ayr eu er my volley, as er chaghlaa my aill dy mennick: agh cha lhig Jee da aggair ’yannoo dou.

⁸ My she shoh va’n bargane, Bee yn maase breckey dt’aill’s; eisht va ooilley yn ingan breck: as my dooyrt eh myr shoh, Bee yn vooinjer schimmeigagh dty aill; eisht ren yn maase ooilley brey ingan schimmeigagh.

⁹ Myr shoh ta Jee er ghoaill ersooyl maase nyn ayrey, as er choyrt ad dooys.

¹⁰ As haink eh gy-kione, ec y traa va’n maase gientyn, dy hrog mee seose my hooillyn, as honnick mee ayns dreamal, as cur-my-ner, va ny reaghyn va lheim er y maase, schimmeigagh, breck as spottagh.

¹¹ As loayr ainle Yee rhym ayns dreamal, gra, Jacob: as dooyrt mish, Ta mee ayns shoh.

¹² As dooyrt eh, Trog seose nish dty hooillyn, as jeeagh, ta ooilley ny reaghyn ta lheim er y maase schimmeigagh, breck as spottagh: son ta mish er vakin kys ta Laban er dty hirveish.

¹³ Mish Jee Veth-el, raad ren oo ooilaghey yn phillar, as raad ren oo breearrey dou: nish trog ort, cosne royd magh ass y cheer shoh, as chyndaa gys cheer dty chynney.

¹⁴ As dreggyr Rachel as Leah, as dooyrt ad rish, Vel foast toghyr ny eiraght erbee sodjey er nyn son ain ayns thie nyn ayrey?

¹⁵ Nagh vel eh er ghellal rooin myr joarreeyn? son t’eh er chreck shin, as neesht dy bollagh er roostey shin jeh ooilley nyn argid.

¹⁶ Son ooilley yn verchys ta Jee er ghoaill veih nyn ayr, te cair dooinyn, as da nyn gloan: nish eisht, jean uss, cre-erbee ta Jee er ghra rhyt.

¹⁷ Eisht hrog Jacob er, as hoie eh e vec as e vraane er camelyn.

¹⁸ As hug eh lesh ersooyl ooilley e vaase, as ooilley e chooid v’eh er chosney, yn maase jeh’n chosney echey hene, v’eh er gheddyn ayns Padan-aram; dy gholl gys Isaac e ayr ayns cheer Chanaan.

¹⁹ As hie Laban dy lommyrt e chirree: as va Rachel er ghoaill ec e laue hene ny jallooyn va lesh yn ayr eck.

²⁰ As chossyn Jacob ersooyl, gyn-yss da Laban yn Syrian, liorish nagh dinsh eh da dy row eh dy gholl roish.

²¹ Myr shen chossyn eh roish lesh ooilley ny v’echey, as hrog eh er, as hie eh harrish yn awin, as hoie eh e eddin lesh slieau Ghilead.

²² As ve er n’insh da Laban, er yn trass laa, dy row Jacob er gosney roish.

²³ As ghow eh e chaarjyn mârish; as hie eh er e eiyrt’s jurnah shiaght laa; as verr ad er ayns slieau Ghilead.

²⁴ As haink Jee gys Laban yn Syrian, ayns dreamal ’syn oie, as dooyrt eh rish, Jeeagh, nagh loayr oo rish Jacob edyr mie ny sie.

²⁵ Eisht verr Laban er Jacob. Nish va Jacob er hroggal e chabbane er y clieau: as hoie Laban marish e chaarjyn nyn gabbaneyn ayns slieau Ghilead.

²⁶ As dooyrt Laban rish Jacob, Cre shoh t’ou er n’yannoo, dy vel oo er gheid ersooyl gyn-yss dou, as er goyrt lhiat my inneenyn, myr cappeeyn goit lesh y chliwe.

²⁷ Cre’n-fa chossyn oo ersooyl dy follit, as dy gheid oo royd gyn-yss dou, as nagh dinsh oo dou, dy voddin ve er choyrt oo ersooyl lesh gennallys, as lesh arraneyn, lesh tabret as claasagh?

²⁸ As nagh vel oo er lhiggey dou bannaghey my vec as my inneenyn? t’ou ayns y chooish shoh, er n’yannoo dy ommijagh.

²⁹ Te ayns pooar my laue dy yannoo skielley dhyt: agh loayr Jee dt’ayrey rhym’s ’syn oie riyr, gra, Cur twoaie, nagh loayr oo rish Jacob edyr mie ny sie.

³⁰ As nish, ga dy r’ou shleeuit er goll royd, er-yn-oyr dy row foddeeaght jeean ort lurg thie dty ayrey, ny-yeih cre’n-fa t’ou er gheid ny jeeghyn aym.

³¹ As dreggyr Jacob, as dooyrt eh rish Laban, Er-yn-oyr dy row aggle orrym; son dooyrt mish, Foddee dy ghoghe oo dty inneenyn voym er niart.

³² Marish quoi-erbee t’ou feddyn ny jeeghyn ayd, ny lhig da ve bio: ayns fenish nyn mraaraghyn jean briaght ayns shoh, vel veg ny ta lhiat’s mârym’s, as gow eh: son ve gyn-yss da Jacob, dy row Rachel er gheid ad.

³³ As hie Laban stiagh ayns cabbane Yacob, as ayns cabbane Leah, as ayns cabbaneyn yn daa harvaant: agh cha dooar eh ad: eisht hie eh magh ass cabbane Leah, as hie eh ayns cabbane Rachel.

³⁴ Nish va Rachel er ghoaill ny jallooyn, as er cheiltyn ad ayns greinyn ny camelyn, as hoie ee orroo: as ronsee Laban ooilley yn chabbane, agh cha dooar eh ad.

³⁵ As dooyrt ee rish e ayr, Ny lhig da my hiarn ve corree rhym, nagh voddym girree seose kiongoyrt rhyt; son ta mee myr te dooghyssagh da mraane: as ren eh ronsaghey, agh cha dooar eh ny jallooyn.

³⁶ As va Jacob feer jymmoosagh; as hroidd eh rish Laban, as dreggyr Jacob, as dooyrt eh rish Laban, Cre ta my loght? cre’n olk ta mee er n’yannoo, dy vel oo er n’eiyrt orrym cha jeean?

³⁷ Nish dy vel oo er ronsaghey ooilley my chooid; cre t’ou er gheddyn jeh ooilley dty stoo-thie; soie magh eh ayns shoh kiongoyrt rish my chaarjyn, as dty chaarjyn hene, dy vod ad briwnys eddyr shin nyn-neesht.

³⁸ Ny feed bleïn shoh ta mee er ve mayrt, cha hilg dty chirree as dty ghoair nyn ingan, as reaghyn dty hioltane cha vel mee er n’ee.

³⁹ Shen ny va raipit liorish beishtyn, cha dug mee lhiam hood: ghow mee yn coayl orrym pene; mish hass roish edyr eh ve geiddit ’sy laa, ny geiddit ’syn oie.

⁴⁰ Shoh myr va my vea; ayns y laa, ren y chiass m’y choyrt naardey, as y rio, ’syn oie: as s’beg y chadley haink er my hooillyn.

⁴¹ Shoh myr ta mee er ve feed bleïn ayns dty hie: hirveish mee oo kiare bleeaney jeig son dty ghaa inneen, as shey bleeaney son dty vaase; as t’ou er chaghlaa m’aill jeih keayrtyn.

⁴² Er-be dy row Jee m’ayr, Jee Abraham, as aggle Isaac er ve mârym, son shickyrys v’ou nish er my choyrt ersooyl follym: ta Jee er vakin my heaghyn as laboraght my laueyn, as er chur oghsan dhyt riyr.

⁴³ As dreggyr Laban, as dooyrt eh rish Jacob, Ta ny inneenyn shoh ny inneenyn aym’s: as ta’n chloan shoh my chloan’s, as ta’n maase shoh yn maase aym’s; as ta ooilley ny t’ou fakin lhiam’s: as cre’n aggair oddym y yannoo yn laa t’ayn jiu roo shoh my inneenyn, ny rish nyn gloan t’ad er n’ymmyrkey?

⁴⁴ Tar uss er-y-fa shen nish, lhig dooin conaant y yannoo, mish as uss, as lhig da ve son feanish eddyr mish as uss.

⁴⁵ As ghow Jacob clagh, as hoie eh ee seose son pillar.

⁴⁶ As dooyrt Jacob rish e vraaraghyn, chaggil-jee claghyn; as ghow ad claghyn, as ren ad carnane, as d’ee ad ayns shen er y charnane.

⁴⁷ As ren Laban genmys eh Jegar-sahadutha: agh denmys Jacob eh Galeed.

⁴⁸ As dooyrt Laban, Ta’n carnane shoh feanish, eddyr mish as uss yn laa jiu. Shen-y-fa ve enmyssit Galeed,

⁴⁹ As Mizpah: son dooyrt eh, Dy jean y Chiarn arrey y reayll eddyr mish as uss, tra ta shin veih-my-cheilley.

⁵⁰ My ver uss drogh ghellal da my inneenyn, ny my nee uss mraane elley y ghoaill, marish my inneenyn, cha vel dooinney erbee eddyr shin; jeeagh royd, ta Jee feanish eddyr mish as uss.

⁵¹ As dooyrt Laban rish Jacob, Cur-my-ner, yn carnane shoh, as cur-my-ner yn pillar shoh, ta mee er hoiaghey eddyr mish as uss.

⁵² Dy bee yn carnane shoh ny eanish, as as dy bee yn pillar shoh ny eanish, nagh jig-yms harrish yn carnane shoh hood’s; as nagh jig uss harrish yn carnane as yn pillar shoh hym’s, son assee.

⁵³ Dy jean Jee Abraham as Jee Nahor, Jee nyn ayrey, briwnys eddyr shin. As loo Jacob liorish aggle e ayr Isaac.

⁵⁴ Eisht heb Jacob oural er yn chronk, as chuir eh e gheiney-mooinjer dy ghoaill beaghey, as ghow ad beaghey; as duirree ad fud-ny-hoie er y chronk.

⁵⁵ As dirree Laban seose dy moghey, as phaag eh e vec as e inneenyn, as vannee eh ad: as jimmee Laban roish, as hyndaa eh reesht gys e chummal hene.