Genesis 30 - Yn Vible Casherick 1775 1819

CAB. XXX

¹ As tra honnick Rachel, nagh row cloan ee-hene rish Jacob, ren Rachel troo mysh e shuyr; as dooyrt ee rish Jacob, Cur cloan dou, er-nonney brish-ym my chree.

² As va corree Yacob er ny vrasnaghey noi Rachel, as dooyrt eh, Vel mish ayns ynnyd Yee, t’er vreaylley voïd mess y vreïn?

³ As dooyrt ish, Cur-my-ner, my harvaant Bilhah: gow ish, as nee ish gymmyrkey er my ghlioonyn, dy vod ee myr shoh gymmyrkey cloan er my hon.

⁴ As hug ee da Bilhah yn charvaant ec son ben: as va enney ec Jacob urree.

⁵ As ren Bilhah gientyn, as dymmyrk ee mac da Jacob.

⁶ As dooyrt Rachel, Ta Jee er ghoaill seose my chooish, as myrgeddin er chur clashtyn dou, as er choyrt dou mac: shen-y-fa denmys ee eh Dan.

⁷ As ren Bilhah sharvaant Rachel gientyn reesht, as dymmyrk ee da Jacob mac elley.

⁸ As dooyrt Rachel, Leah niart gleck ta mee er streeu rish my huyr, as ta mee er gheddyn y varriaght: as denmys ee eh Naphtali.

⁹ Tra honnick Leah, dy row ee er scuirr gymmyrkey, ghow ee Zilpah yn charvaant eck, as hug ee da Jacob ee son ben.

¹⁰ As ren Zilpah sharvaant Leah gymmyrkey mac da Jacob.

¹¹ As dooyrt Leah, Ta troop jeu cheet: as denmys ee eh Gad.

¹² As ren Zilpah sharvaant Leah gymmyrkey mac elley da Jacob.

¹³ As dooyrt Leah, S’maynrey ta mee, son nee ny mraane genmys mish bannit: as denmys ee eh Ashur.

¹⁴ As hie Reuben ayns imbagh y fouyr-churnagh, as hooar eh mandrakeyn ’sy vagher, as hug eh lesh ad gys e voir Leah. Eisht dooyrt Rachel rish Leah, Cur dooys, ta mee guee ort, jeh mandrakeyn dty vac.

¹⁵ As dooyrt ee r’ee, Nee red fardalagh eh, dy vel oo er chleayney my heshey voym? as vel dty aigney soit er mandrakeyn my vac myrgeddin? As dooyrt Rachel, Er y chonaant shoh yiow uss eh noght son mandrakeyn dty vac.

¹⁶ As haink Jacob ass y vagher ’syn astyr, as hie Leah magh ny whail, as dooyrt ee, Shegin dhyt cheet stiagh hym’s, son ayns firrinys ta mee er dty ailley lesh mandrakeyn my vac: as v’eh mâree yn oie shen.

¹⁷ As cheayll Jee Leah, as ren ee gientyn, as dymmyrk ee da Jacob yn wheiggoo vac.

¹⁸ As dooyrt Leah, Ta Jee er choyrt dou my leagh, er-yn-oyr dy dug mee my harvaant da my heshey; as denmys ee eh Issachar.

¹⁹ As ren Leah gientyn reesht, as dymmyrk ee da Jacob yn cheyoo vac.

²⁰ As dooyrt Leah, Ta Jee er my vannaghey lesh toghyr mie, nish nee cree my heshey cummal hym, er-yn-oyr dy vel mee er n’ymmyrkey shey mec da: as denmys ee eh Zebulun.

²¹ As ny lurg shen, dymmyrk ee inneen, as denmys ee yn ennym ec Dinah.

²² As chooinee Jee er Rachel, as ren Jee clashtyn r’ee, as haink ee dy ve messoil.

²³ As ren ee gientyn, as gymmyrkey mac, as dooyrt ee, Ta Jee er ghoaill ersooyl my oltooan:

²⁴ As denmys ee eh Joseph; as dooyrt ee, Ver y Chiarn dooys mac elley.

²⁵ As haink eh gy-kione, tra va Rachel er n’ymmyrkey Joseph, dy dooyrt Jacob rish Laban, Lhig y raad dou, dy voddym goll gys my ynnyd hene, as my heer hene.

²⁶ Cur dou my vraane as my chloan, er nyn son ta mee er dty hirveish, as lhig dou goll roym, son s’mie ta fys ayd, kys ta mee er dty hirveish.

²⁷ As dooyrt Laban rish, Ta mee guee ort, my ta mee er gheddyn foayr ayns dty hilley, fuirree mârym: son ta fys aym liorish prowal foddey, dy vel y Chiarn er my vannaghey er y ghraih ayd’s.

²⁸ As dooyrt eh, Abbyr cre vees dty aill, as yiow eh.

²⁹ As dooyrt eh rish, Ta fys ayd kys ta mee er dty hirveish, as cre’n chiarail ghow mee jeh dty vaase.

³⁰ Son s’fardalagh va dty chooid, my daink mee gys dty hie; as te nish er ny vishaghey gys ymmodee ayns earroo: as ta’n Chiarn er dty vannaghey neayr’s haink mee: as nish, nagh vel eh traa dou kiarail y ghoaill son my lught-thie hene myrgeddin?

³¹ As dooyrt eh, Cre ver-ym dhyt? As dooyrt Jacob, Cha der oo veg dou jeh ny t’ayd: my nee oo yn bargane shoh rhym, goym’s reesht kiarail jeh, as jeeagh-ym lurg dty hioltane;

³² Hem’s trooid ooilley dty hioltane er yn laa t’ayn jiu, scarrey veih-my-cheilley ooilley yn maase breck as spottagh, as ooilley yn maase loaghtyn mastey ny kirree, as adsyn ta spottagh as breck mastey ny goair; as jeh nyn lheid vees my aill.

³³ Myr shen nee my ynrickys gansoor er my hon ’sy traa ry-heet; tra hig shoh dy ve my aill ayns dty hilley hene; dy chooilley unnane nagh vel breck as spottagh mastey ny goair, as loaghtyn mastey ny kirree, lhig da shen ve coontit myr griu vaarlee.

³⁴ As dooyrt Laban, Cur-my-ner, lesh ooilley my chree, lhig da ve myr shen.

³⁵ As scarr eh yn laa shen ny goair fyrryn va schimmeigagh as spottagh, as ooilley ny goair woirryn va breck as spottagh, as dy chooilley unnane va red ennagh dy vaneid ayn, as ooilley ny va loaghtyn mastey ny kirree, as hug eh ad fo laueyn e vec.

³⁶ As hoie eh magh grunt, jeh jurnah three laa, eddyr eh-hene as Jacob: as va’n chooid elley jeh shioltaneyn Laban fo kiarail Yacob.

³⁷ As ghow Jacob slattyn dy phoplar glass, as jeh’n chouyl, as y billey-chesnut, as speein eh schimmeigyn baney orroo, as hug eh er y bane v’ayns ny slattyn cheet rish.

³⁸ As hoie eh ny slattyn v’eh er speeiney, kiongoyrt rish ny shioltaneyn ayns ny jeeigyn, liorish ny troghyn ushtey, tra haink ny shioltaneyn dy iu; dy voddagh ad gientyn, tra harragh ad gys yn ushtey.

³⁹ As ren ny shioltaneyn gientyn kiongoyrt rish ny slattyn, as verr ad ingan lesh schimmeigyn baney, breck as spottagh.

⁴⁰ As ren Jacob scarrey ny heayin, as hoie eh eddinyn ny shioltaneyn lesh yn vooinjer schimmeigagh, as ooilley yn vooinjer loaghtyn ayns shioltane Laban: as hug eh yn shioltane echey hene orroo hene, er-lheh; as cha dug eh ad gys maase Laban.

⁴¹ As haink eh gy-kione, tra erbee dy ren y maase s’troshey gientyn, dy dug Jacob ny slattyn roish sooillyn y vaase, ayns ny jeeigyn, dy voddagh ad gientyn mastey ny slattyn.

⁴² Agh tra va’n maase faase, cha dug eh ayn ad: myr shen va’n ollagh s’faase lesh Laban, as yn ollagh s’troshey lesh Jacob.

⁴³ As ren y dooinney bishaghey erskyn towse, as va ymmodee maase echey, as sharvaantyn, as fir-vooinjerey, as camelyn as assylyn.