Genesis 29 - Yn Vible Casherick 1775 1819

CAB. XXIX

¹ Eisht hie Jacob er e yurnah, as haink eh gys cheer pobble y shiar.

² As yeeagh eh, as honnick eh chibbyr ’sy vagher, as cur-my-ner, va three shioltaneyn dy chirree nyn lhie liorish: son veih’n chibbyr shen hug ad lhieu ushtey gys ny shioltaneyn: as va clagh vooar er beeal y chibbyr.

³ As gys shen va ooilley ny shioltaneyn er nyn jaglym, as scugh ny bochillyn yn chlagh veih beeal y chibbyr, as hug ad ushtey da ny kirree, as hug ad y chlagh reesht er beeal y chibbyr, ayns e ynnyd hene.

⁴ As dooyrt Jacob roo, My vraaraghyn, cre veih ta shiu? As dooyrt ad, Ta shin veih Haran.

⁵ As dooyrt eh roo, Nione diu Laban, mac Nahor? As dooyrt ad, Shione dooin eh.

⁶ As dooyrt eh roo, Vel eh dy mie? As dooyrt ad, T’eh dy mie: as cur-my-ner, ta Rachel e inneen cheet lesh ny kirree.

⁷ As dooyrt eh, Cur-my-ner, cha vel eh foast agh y vun-laa, chamoo te traa yn maase y haglym cooidjagh: er son ny kirree, cur-jee ushtey daue, as jean-jee fassaghey ad.

⁸ As dooyrt ad, Cha jig shen lhien dy yannoo, derrey vees ooilley ny shioltaneyn er nyn jaglym cooidjagh, as derrey hroggys ad y chlagh jeh beeal y chibbyr: eisht ta shin cur ny kirree gys ushtey.

⁹ As choud as ve foast loayrt roo, haink Rachel lesh kirree e ayrey: son fo’n chiarail eck v’ad.

¹⁰ As haink eh gy-kione, tra honnick Jacob Rachel, inneen Laban braar e vayrey, as kirree Laban braar e vayrey, dy jagh Jacob er-gerrey, as hyndaa eh yn chlagh veih beeal y chibbyr, as hug eh ushtey da shioltane Laban braar e vayrey.

¹¹ As ren Jacob Rachel y phaagey as hrog eh seose e choraa, as cheayn eh.

¹² As dinsh Jacob da Rachel, dy row eshyn dooinney-mooinjerey yn ayr eck, as dy nee mac Rebekah v’eh: as roie ish, as dinsh ee shoh da e ayr.

¹³ As haink eh gy-kione, tra cheayll Laban imraa jeh Jacob mac e hayrey, dy roie eh ny whail, as ghow eh ayns e roihaghyn eh, as phaag eh eh, as hug eh lesh eh gys e hie: as dinsh eh da Laban ooilley ny reddyn shoh.

¹⁴ As dooyrt Laban rish, Son shickyrys, t’ou my chraue as my eill: as duirree eh mârish mee dy hraa.

¹⁵ As dooyrt Laban rish Jacob, Nee er-yn-oyr dy vel oo my ghooinney-mooinjerey, dy jinnagh oo son shen mish y hirveish nastee? Insh dou, cre vees dt’aill?

¹⁶ As va daa inneen ec Laban: va ennym yn unnane shinney Leah, as ennym yn unnane saa Rachel.

¹⁷ Va sooillyn annoon ec Leah, agh va Rachel bwaagh as aalin.

¹⁸ As va Jacob ayns graih rish Rachel; as dooyrt eh, Shirveish-ym oo shiaght bleeaney son Rachel dty inneen saa.

¹⁹ As dooyrt Laban, Te ny share, dy der-ym dhyt’s ee, na dy choyrt ee da dooinney elley: fuirree mârym.

²⁰ As ren Jacob shirveish shiaght bleeaney son Rachel: as cha row ad da agh myr earish yiare, son y ghraih v’echey urree.

²¹ As dooyrt Jacob rish Laban, Cur dou my ven, (son ta my hraa cooilleenit) dy vod ee ve my ven-heshee.

²² As chuir Laban cooidjagh ooilley deiney yn ynnyd, as ren eh bannish.

²³ As haink eh gy-kione ’syn astyr, dy ghow eh Leah e inneen, as hug eh lesh ee huggey: as hie ad cooidjagh.

²⁴ As hug Laban da e inneen Leah, Zilpah e inney-veyl, dy hirveish urree.

²⁵ As haink eh gy-kione, ’sy voghrey, cur-my-ner, dy nee Leah v’ayn: as dooyrt eh rish Laban, Cre shoh t’ou er n’yannoo rhym? nagh nee son Rachel hirveish mee oo? cre’n-fa eisht t’ou er my volley?

²⁶ As dooyrt Laban, Cha nee cliaghtey ny cheerey eh, dy choyrt yn unnane saa roish yn unnane shinney.

²⁷ Jean magh shiaghtin ny banshey, as ver mayd dhyt ee shoh myrgeddin, son y chirveish nee uss dou shiaght bleeaney sodjey.

²⁸ As ren Jacob shen, as chooilleen eh yn chiaghtin mâree: As hug eh Rachel e inneen da son ben myrgeddin.

²⁹ As hug Laban da Rachel e inneen, Bilhah e inney-veyl, dy hirveish urree.

³⁰ As ren eh Rachel myrgeddin y phoosey, as va ny smoo dy ghraih echey er Rachel, na v’echey er Leah: as hirveish eh foast shiaght bleeaney elley.

³¹ As tra honnick y Chiarn, nagh row wheesh soit jeh Leah, hug eh pooar j’ee dy yiennaghtyn: agh va Rachel gennish.

³² As ren Leah gientyn as gymmyrkey mac as denmys ee eh Reuben: son dooyrt ee, Son shickyrys ta’n Chiarn er yeeaghyn er my heaghyn; nish er-y-fa shen, ver my heshey graih dou.

³³ As ren ee gientyn reesht, as gymmyrkey mac, as dooyrt ee, Er-yn-oyr dy vel y Chiarn er chlashtyn dy row beg er ny hoiaghey jee’m, shen-y-fa t’eh er choyrt dou yn mac shoh myrgeddin: as denmys ee eh Simeon.

³⁴ As ren ee gientyn reesht, as gymmyrkey mac, as dooyrt ee, Nee cree my heshey nish lhiantyn hym, er-y-fa dy vel mee er n’ymmyrkey da three mec: shen-y-fa v’eh enmyssit Levi.

³⁵ As ren ee gientyn reesht, as gymmyrkey mac, as dooyrt ee, Nish ver-ym moylley da’n Chiarn: shen-y-fa denmys ee eh Judah, as scuirr ee veih gymmyrkey.