Genesis 28 - Yn Vible Casherick 1775 1819

CAB. XXVIII

¹ As deïe Isaac er Jacob, as vannee eh eh, as hug eh currym er, as dooyrt eh rish, Cha jean uss ben y ghoaill jeh inneenyn Chanaan.

² Trog ort, immee royd gys Padan-aram, gys thie Vethuel ayr dty vayrey; as gow uss ben veih shen jeh inneenyn Laban, braar dty vayrey.

³ As dy jean Jee ooilley-niartal uss y vannaghey, as dy giall eh dhyt’s dy ve messoil, as oo y vishaghey, as dy vod uss ve earroo dy leih.

⁴ As dy der eh dhyt bannaght Abraham, dhyt hene, as da dty luight mayrt; dy vod oo yn cheer, raad t’ou dty yoarree, y gheddyn son eiraght, hug Jee da Abraham.

⁵ As hug Isaac Jacob ersooyl, as hie eh gys Padan-aram, gys Laban, mac Vethuel yn Syrian, braar Rebekah, moir Yacob as Esau.

⁶ Tra honnick Esau dy row Isaac er vannaghey Jacob, as er choyrt eh ersooyl gys Padan-aram, dy ghoaill ben da veih shen; as myr v’eh dy vannaghey eh, dy dug eh currym er, gra, Cha jean uss ben y ghoaill jeh inneenyn Chanaan;

⁷ As dy dug Jacob biallys da e ayr as e voir, as dy row eh er n’immeeaght gys Padan-aram;

⁸ As myr honnick Esau nagh by-laik lesh Isaac e ayr inneenyn Chanaan:

⁹ Eisht hie Esau gys Ishmael, as ghow eh, marish ny mraane va echey, Mahalath inneen Ishmael, mac Abraham, shuyr Nebajoth, dy ve e ven.

¹⁰ As hie Jacob magh veih Beer-sheba, as jimmee eh lesh Haran.

¹¹ As haghyr eh er boayl dy row, as duirree eh ayns shen fud-ny-hoie, er-yn-oyr dy row yn ghrian ny lhie: as ghow eh jeh claghyn yn ynnyd shen, as hug eh ad fo e chione, as lhie eh sheese ’syn ynnyd shen dy chadley.

¹² As ren eh dreamal, as honnick eh myr aarey soit er y thalloo, as va’n mullagh echey roshtyn gys niau: as cur-my-ner, ainleyn Yee goll seose, as cheet neose er,

¹³ As cur-my-ner, hass y Chiarn erskyn, as dooyrt eh, Mish yn Chiarn, Jee Abraham dty ayr, as Jee Isaac: yn cheer t’ou dy lhie er, dhyt’s ver-yms eh, as da dty luight.

¹⁴ As bee dty luight myr joan ny hooirey, as nee oo skeayley dy lhean gys y sheear as gys y shiar, gys y twoaie as gys yn jiass, as aynyd’s as ayns dty luight, bee ooilley kynneeyn y theihll er nyn mannaghey.

¹⁵ As cur-my-ner, ta mish mayrt, as neem’s oo y reayll, ayns dy chooilley ynnyd raad t’ou goll, as ver-ym lhiam oo reesht gys y cheer shoh: son cha dreig-ym oo, derrey vee’m er chooilleeney shen, my-e-chione ta mee er loayrt rhyt.

¹⁶ As ghooisht Jacob ass e chadley, as dooyrt eh, Shickyr ta’n Chiarn ayns yn ynnyd shoh, as cha row fys aym er.

¹⁷ As va aggle er, as dooyrt eh, Cre cha atchimagh as ta’n ynnyd shoh! Ta shoh son shickyrys thie Yee, as shoh giat niau.

¹⁸ As dirree Jacob dy moghey, as ghow eh yn chlagh hug eh fo e chione, as hoie eh seose eh son Pillar, as gheayrt eh ooil er e vullagh.

¹⁹ As denmys eh yn ynnyd shen Beth-el: agh va’n ard-valley shen enmyssit Luz ec y toshiaght.

²⁰ As ren Jacob breearrey, gra, My vees Jee mârym, as my nee eh m’y reayll ’sy raad ta mee goll, as my ver eh dou arran dy ee, as coamrey dy chur moom;

²¹ Myr shen dy jig-ym reesht gys thie m’ayrey ayns shee: eisht bee yn Chiarn yn Jee aym’s.

²² As bee yn chlagh shoh, ta mee er hoiaghey son pillar, thie Yee: as jeh ooilley ny ver oo dou, son shickyrys, ver-yms dhyt’s y jaghee.