Genesis 26 - Yn Vible Casherick 1775 1819

CAB. XXVI

¹ As va genney ’sy cheer, lurg y chied ghenney v’ayns laghyn Abraham: as hie Isaac gys Abimelech ree ny Philistinee, gys Gerar.

² As hoilshee yn Chiarn eh-hene da, as dooyrt eh, Ny gow sheese gys Egypt, cum ’sy cheer jeeagh-ym dhyt.

³ Cum ’sy cheer shoh, as beem’s mayrt, as nee’m uss y vannaghey: son dhyt’s, as da dty luight ver-yms ooilley ny cheeraghyn shoh, as neem’s cooilleeney yn breearrey, loo mee da Abraham dty ayr.

⁴ As ver-yms er dty luight dy vishaghey myr rollageyn yn aer, as ver-ym da dty luight ooilley ny cheeraghyn shoh; as ayns dty luight vees ooilley ashoonyn y theihll er nyn mannaghey:

⁵ Er-yn-oyr dy dug Abraham biallys da my choraa, as dy dreill eh my harey, my annaghyn, my lattyssyn, as my leighyn.

⁶ As ghow Isaac e chummal ayns Gerar.

⁷ As dênee deiney yn ynnyd jeh mychione e ven: as dooyrt eh, She my huyr ee: son va aggle er dy ghra, She my ven ee, er-aggle, dooyrt eh, dy jinnagh deiney yn ynnyd m’y varroo, er graih Rebekah, son dy row ee aalin dy yeeaghyn urree.

⁸ As haink eh gy-kione, erreish da ve ayns shen son foddey dy hraa, dy yeeagh Abimelech ree ny Philistinee magh er uinniag, as honnick eh, as cur-my-ner, va Isaac myr dy beagh eh sooree er Rebekah e ven.

⁹ As deïe Abimelech er Isaac, as dooyrt eh, Cur-my-ner, son shickyrys she dty ven ee; as kys dooyrt uss, She my huyr ee? As dooyrt Isaac rish, Er-yn-oyr dy row aggle orrym, dy jinnagh ad mish dy baase er y choontey eck’s.

¹⁰ As dooyrt Abimelech, Cre shoh t’ou er n’yannoo rooin? oddagh fer jeh’n phobble trooid taghyrt, ve er lhie marish dty ven, as uss er hayrn kerraghey orrin.

¹¹ As hug Abimelech ooilley e phobble fo harey, gra, Eshyn vennys rish yn dooinney shoh, ny rish e ven, bee eh son shickyrys er ny choyrt gy-baase.

¹² Eisht chuirr Isaac ’sy cheer shen, as vuinn eh ’sy vleïn cheddin keead-filley: as vannee yn Chiarn eh.

¹³ As daase yn dooinney berchagh, as hie eh er e hoshiaght (’sy theihll) as ren eh bishaghey, derrey haink eh dy ve feer niartal.

¹⁴ Son v’echey niart shioltaneyn as shellooyn, as mooarane mooinjer, as ren ny Philistinee troo mysh.

¹⁵ Son ooilley ny chibbraghyn va sharvaantyn e ayrey er chleiy ayns laghyn Abraham e ayr, va ny Philistinee er n’yeigh seose, as er lhieeney ad lesh thalloo.

¹⁶ As dooyrt Abimelech rish Isaac, Immee voïn, son t’ou uss foddey s’pooaral na shinyn.

¹⁷ As jimmee Isaac veih shen, as hoie eh e chabbane ayns coan Gerar, as chum eh ayns shen.

¹⁸ As doshil Isaac reesht ny chibbraghyn ushtey, v’ad er chleiy ayns laghyn Abraham e ayr: son va ny Philistinee er n’yeigh ad, lurg baase Abraham: as hug eh ny enmyn cheddin orroo va e ayr er choyrt orroo.

¹⁹ As chleiy sharvaantyn Isaac ’sy choan, as hooar ad ayns shen chibbyr dy ushtey-farrane.

²⁰ As va focklyn eddyr bochillyn Gerar as bochillyn Isaac, gra, Lhianyn yn ushtey: as denmys eh yn chibbyr Esek, er-yn-oyr dy ren ad streeu rish.

²¹ As chleiy ad chibbyr elley, as streeu ad son shen neesht: as denmys eh eh Sitnah.

²² As scugh eh veih shen, as chleiy eh chibbyr elley; as mysh shen cha row streeu erbee; as denmys eh eh Rehoboth; as dooyrt eh, Son nish ta’n Chiarn er chur reamys dooin, as nee mayd bishaghey ’sy cheer.

²³ As hie eh seose veih shen gys Beer-sheba.

²⁴ As hoilshee’n Chiarn eh-hene da ’syn oie cheddin, as dooyrt eh, Mish Jee Abraham dty ayrey: ny gow aggle, son ta mish lhiat, as nee’m oo y vannaghey, as bishaghey dty luight er graih my harvaant Abraham.

²⁵ As hrog eh altar ayns shen, as deïe eh er ennym y Chiarn, as hoie eh e chabbane ayns shen; as shen y raad ren sharvaantyn Isaac chibbyr y chleiy.

²⁶ Eisht hie Abimelech huggey veih Gerar, as Ahuzzath fer jeh e chaarjyn, as Phichol ard-chaptan e heshaght-chaggee.

²⁷ As dooyrt Isaac roo, Cre’n-fa ta shiu er jeet hym’s, fakin dy vel dwoaie eu orrym, as er n’eiyrt mee ersooyl veue.

²⁸ As dooyrt adsyn, Honnick shin son shickyrys, dy row yn Chiarn mayrt: as dooyrt shin, Lhig da nish breearrey ve eddyr shin, dy feer eddyr shinyn as uss, as lhig dooin conaant y yannoo rhyt;

²⁹ Nagh jean oo aggair erbee dooinyn, myr nagh vel shinyn er choyrt eïe ort’s, as myr nagh vel shin er n’yannoo nhee erbee rhyt agh mie, as er choyrt oo ersooyl ayns shee: t’ou uss nish fer bannit y Chiarn.

³⁰ As ren eh gien daue, as ren ad gee as giu.

³¹ As dirree ad feer voghey, as ren ad breearrey eddyr ad: as lhig Isaac y raad daue, as jimmee ad voish ayns shee.

³² As haink eh gy-kione yn laa cheddin, dy daink sharvaantyn Isaac, as dinsh ad da my chione y chibbyr v’ad er chleiy; as dooyrt ad rish, Ta shin er gheddyn ushtey.

³³ As ren eh genmys eh Sheba: shen-y-fa ta ennym yn ard-valley shen Beer-sheba gys y laa t’ayn jiu.

³⁴ As va Esau da-eed bleïn dy eash, tra phoose eh Judith, inneen Beeri yn Hittite, as Bashemath inneen Elon yn Hittite:

³⁵ V’ad shoh oyr trimshey da Isaac, as da Rebekah.