Genesis 24 - Yn Vible Casherick 1775 1819

CAB. XXIV

¹ As va Abraham shenn, as er roie dy mie ayns eash: as va’n Chiarn er vannaghey Abraham ayns dy chooilley nhee.

² As loayr Abraham rish ard-stiurt e hie, va reill harrish ooilley ny v’echey, Cur dty laue, ta mee guee ort, fo my lheayst.

³ As ver-yms ort breearrey liorish y Chiarn, Jee niau as thalloo, nagh gow ben da my vac, jeh inneenyn ny Canaaniteyn, nyn mast’ ta mee cummal.

⁴ Agh hed oo gys my heer hene, as gys my chynney, as gowee oo ben da my vac Isaac.

⁵ As dooyrt y stiurt rish, Foddee nagh bee’n ven booiagh cheet mârym gys y cheer shoh: negin dou dty vac y choyrt lhiam reesht gys y cheer haink oo veih?

⁶ As dreggyr Abraham eh, Gow uss kiarail, nagh der oo lhiat my vac gys y cheer shen reesht.

⁷ Yn Chiarn Jee jeh niau, ghow mee veih thie my ayrey, as veih cheer my chynney, as ren loayrt rhym, as ren breearrey dou, gra, Da dty luight ver-yms yn cheer shoh; v’er eshyn e ainle royd, as gowee oo ben da my vac veih’n cheer shen.

⁸ As mannagh bee’n ven booiagh cheet mayrt, eisht bee oo feayshlit veih shoh my vreearrey: agh jeeagh nagh der oo lhiat my vac gys y cheer shen reesht.

⁹ As hug y stiurt e laue fo slheeayst Abraham e vainshtyr, as ren eh breearrey da, mychione y chooish shen.

¹⁰ As ghow yn stiurt jeih camelyn, jeh camelyn e vainshtyr, as jimmee eh roish, [Son va ooilley chooid e vainshtyr fo e laue] as dirree eh, as hie eh gys Mesopotamia, gys ard-valley Nahor.

¹¹ As hug eh nyn aash da ny camelyn, cheu-mooie jeh’n ard-valley, liorish chibbyr-ushtey, ’syn astyr, tra va ny mraane goll magh dy hayrn ushtey.

¹² As dooyrt eh, O Hiarn, Jee my vainshtyr Abraham, ta mee guee ort, cur speedeil mie my raad yn laa jiu, as soilshee kenjallys da my vainshtyr Abraham.

¹³ Cur-my-ner, ta mee my hassoo ayns shoh liorish y chibbyr; as ta inneenyn cummaltee yn ard-valley cheet magh dy hayrn ushtey:

¹⁴ As lhig da ve myr shen, yn ven aeg shen jir-ym r’ee, Lhig sheese dty haagh, ta mee guee ort, dy voddym giu; as dy jir ish, Iu, as ver-yms ushtey da dty chamelyn myrgeddin: lhig ish ve yn ven, t’ou er phointeil da dty harvaant Isaac; as liorish shen bee fys aym, dy vel oo er hoilshaghey kenjallys da my vainshtyr.

¹⁵ As shen myr ve s’coan v’eh erreish loayrt, cur-my-ner, haink Rebekah, inneen Vethuel, mac Vilcah, ben Nahor braar Abraham, magh lesh e saagh ushtey er e geaylin.

¹⁶ As va’n ven aeg feer aalin dy yeeaghyn urree, ny moidyn, chamoo va ec dooinney dy yannoo r’ee, as hie ee sheese gys y chibbyr, as lhieen ee e saagh, as haink ee seose.

¹⁷ As roie stiurt Abraham ny quail, as dooyrt eh, Lhig dou, [ta mee guee ort,] giu bolgym dy ushtey ass dty haagh.

¹⁸ As dooyrt ee, Iu, my hiarn; as ren ee chelleeragh yn saagh y lhiggey sheese er e laue, as hug ee jough da.

¹⁹ As tra v’ee er choyrt jough da, dooyrt ee, Tayrn-yms ushtey myrgeddin da dty chamelyn, derrey vees dy liooar oc.

²⁰ As hie ee dy tappee, as dolmee ee e saagh ayns y trogh ushtey, as roie ee reesht gys y chibbyr dy hayrn ushtey, as hayrn ee da ooilley ny camelyn echey.

²¹ As ghow’n dooinney yindys j’ee as v’eh ny host, goaill tastey row’n Chiarn er choyrt aïgh mie lesh e yurnah, mannagh row.

²² As haink eh gy-kione, tra va ny camelyn erreish giu, dy ghow yn dooinney jewel cleayshey dy airh jeh trimmid lieh shekel, as daa vracelet son ny laueyn eck, va towse jeih shekelyn dy airh.

²³ As dooyrt eh, Quoi da inneen oo? Insh dou, ta mee guee ort: vel ynnyd ayns thie dty ayrey dooinyn dy ghoaill aaght ayn?

²⁴ As dreggyr ee eh, Ta mish inneen Vethuel mac Vilcah, ren ee gymmyrkey da Nahor.

²⁵ Dooyrt ee ny sodjey, Ta ain coonlagh as foddyr dy liooar, as ynnyd dy ghoaill aaght ayn.

²⁶ As chroym y dooinney sheese e chione, as hug eh ooashley da’n Chiarn.

²⁷ As dooyrt eh, Bannit dy row Chiarn Jee my vainshtyr Abraham; nagh vel er vreayll e vyghin as e ynrickys veih my vainshtyr: son va mee er y raad, as ren y Chiarn mee ’leeideil gys thie braaraghyn my vainshtyr.

²⁸ As roie yn ven aeg, as dinsh ee ny reddyn shoh da lught-thie e mayrey.

²⁹ As va braar ec Rebekah, enmyssit Laban: as roie Laban magh gys y dooinney, ec y chibbyr.

³⁰ As haink eh gy-kione, tra honnick eh yn jewel cleayshey, as ny braceletyn er laueyn e huyr, as tra cheayll eh goan Rebekah e huyr, gra, Myr shoh loayr y dooinney rhym; dy daink eh gys y dooinney, as cur-my-ner, v’eh ny hassoo liorish ny camelyn ec y chibbyr.

³¹ As dooyrt eh rish, Tar stiagh uss vannit jeh’n Chiarn; cre’n-oyr t’ou dy hassoo mooie? Son ta mee er chiartaghey yn thie, as room son ny camelyn.

³² As haink y dooinney stiagh, as ghow eh ny greïnyn jeh ny camelyn, as hug eh coonlagh as foddyr daue, as ushtey dy niee ny cassyn echey hene, as cassyn ny deiney va mârish.

³³ As va bee soit roish: agh dooyrt eh, Cha jean-ym gee, derrey ta mee er n’insh my eilkin: as dooyrt Laban rish, Gow lesh.

³⁴ As dooyrt eh, Ta mish stiurt Abraham.

³⁵ As ta’n Chiarn dy mooar er vannaghey my vainshtyr; as t’eh er jeet dy ve pooaral: as t’eh er choyrt da shioltaneyn, as shellooyn, as argid, as airh, fir-vooinjerey, as sharvaantyn, camelyn, as assylyn.

³⁶ As ren Sarah ben my vainshtyr mac y ymmyrkey da my vainshtyr tra v’ee shenn: as dasyn t’eh er choyrt ooilley ny t’echey.

³⁷ As hug my vainshtyr orrym breearrey, gra, Cha gow oo ben da my vac, jeh inneenyn ny Canaaniteyn, ’sy cheer oc ta mee cummal.

³⁸ Agh hed oo gys thie my ayrey, as gys my chynney, as gowee oo ben da my vac.

³⁹ As dooyrt mee rish my vainshtyr, Foddee nagh jig y ven mârym.

⁴⁰ As dooyrt eshyn rhym, Nee’n Chiarn, ta mee dy hirveish, e ainle y choyrt mayrt, as dty raad y vannaghey; as gowee oo ben da my vac jeh my chynney hene, as jeh thie my ayrey.

⁴¹ Eisht bee oo feayshlit veih my vreearrey, tra hig oo gys my chynney; as mannagh der ad unnane dhyt, bee oo feayshlit veih my vreearrey.

⁴² As haink mee jiu gys y chibbyr, as dooyrt mee, O Hiarn, Jee my vainshtyr Abraham, my t’ou nish bannaghey ny ta mee dy ghoaill ayns laue:

⁴³ Cur-my-ner ta mee my hassoo liorish y chibbyr, as hig eh gy-kione, tra hig y ven aeg magh dy hayrn ushtey, as dy jir-ym r’ee, Cur dou, ta mee guee ort, bolgym dy ushtey ass dty haagh dy iu.

⁴⁴ As dy jir ish rhym’s, Iu hene, as nee’m myrgeddin tayrn ushtey da dty chamelyn; lhig jeeish ve yn ven, ta’n Chiarn er reih da mac my vainshtyr.

⁴⁵ As roish my row mee erreish loayrt ayns my chree, cur-my-ner, haink Rebekah magh, as e saagh er e geaylin: as hie ee sheese gys y chibbyr, as hayrn ee ushtey: as dooyrt mish r’ee, Lhig dou giu, ta mee guee ort.

⁴⁶ As ren ee siyr, as lhig ee sheese e saagh jeh e geaylin, as dooyrt ee, Iu, as ver-yms ushtey da dty chamelyn myrgeddin: myr shen diu mee, as hug ee myrgeddin ushtey da ny camelyn.

⁴⁷ As dênee mee j’ee, as dooyrt mee, Quoi da inneen oo? As dreggyr ee, Inneen Vethuel, mac Nahor, eh ren Milcah y ymmyrkey da: as hug mee yn jewel cleayshey er e kione, as ny braceletyn er e laueyn.

⁴⁸ As chroym mee sheese my chione, as hug mee ooashley da’n Chiarn, as vannee mee Chiarn Jee my vainshtyr Abraham, v’er m’y leeideil er y raad cair, dy ghoaill inneen braarey my vainshtyr son ben da e vac.

⁴⁹ As nish, my nee shiu dellal dy dooie, as dy firrinagh rish my vainshtyr, insh-jee dou: as mannagh jean shiu, insh-jee dou myrgeddin; dy voddym chyndaa gys y laue yesh, ny gys y laue hoshtal.

⁵⁰ Eisht dreggyr Laban as Bethuel, as dooyrt ad, Ta’n chooish shoh veih’n Chiarn: cha vod mayd gra n’oï.

⁵¹ Cur-my-ner ta Rebekah kiongoyrt rhyt, gow ee mayrt, as lhig ee ve ben mac dty vainshtyr, myr ta’n Chiarn er ghra.

⁵² As haink eh gy-kione, tra va stiurt Abraham er chlashtyn ny goan oc, dy dug eh ooashley da’n Chiarn, croymmey eh hene sheese gys y thalloo.

⁵³ As hug y stiurt magh jewellyn argid, as jewellyn airh, as garmadyn, as livrey eh ad da Rebekah: hug eh myrgeddin da’n vraar as y voir eck cowraghyn costal.

⁵⁴ As ren ad gee as giu, eh-hene as ny deiney va mârish, as duirree ad fud-ny-hoie; as dirree ad ’sy voghrey, as dooyrt eh, Lhig dou goll gys my vainshtyr.

⁵⁵ As dooyrt y braar as y voir eck rish, Lhig da’n ven aeg fuirriaght mârin tammylt sodjey, yn chooid sloo jeih laa; lurg shen hed ee mêriu.

⁵⁶ As dooyrt eh roo, Ny jean-jee m’y chumrail, fakin dy vel y Chiarn er choyrt speedeil mie da my chooish: lhig-jee yn raad dou, dy voddym goll gys thie my vainshtyr.

⁵⁷ As dooyrt ad, Eïe mayd er y ven aeg, as hee mayd cre jir ee hene.

⁵⁸ As deïe ad er Rebekah, as dooyrt ad r’ee, Jeu uss marish y dooinney shoh? As dreggyr ee, Hem mârish.

⁵⁹ As hug ad Rebekah nyn shuyr ersooyl, as e boandyr, as stiurt Abraham, as e gheiney.

⁶⁰ As vannee ad Rebekah as dooyrt ad r’ee, T’ ou uss nyn shuyr; bee uss moir thousaneyn dy villaghyn, as lhig da dty luight possession y ghoaill jeh giat nyn noidyn.

⁶¹ As hrog Rebekah as e mraane aegey orroo, as varkee ad er camelyn, as hie ad marish y dooinney: as ghow stiurt Abraham Rebekah, as jimmee eh roish.

⁶² As haink Isaac veih raad chibbyr Lahai-roi, son v’eh cummal ayns y cheer my-yiass.

⁶³ As hie Isaac magh ’syn astyr gys y vagher, dy choyrt raad da smooinaghtyn crauee: as hrog eh seose e hooillyn, as Cur-my-ner, honnick eh ny camelyn cheet.

⁶⁴ As hrog Rebekah seose e sooillyn, as tra honnick ee Isaac, ren ee tarlheim jeh’n chamel.

⁶⁵ Son dooyrt ee rish y stiurt; Quoi yn dooinney shoh ta ayns y vagher shooyl nyn guail? As dooyrt y stiurt, My vainshtyr t’ayn: shen-y-fa ghow ee breid, as choodee ee e eddin.

⁶⁶ As dinsh y stiurt da Isaac ooilley ny v’eh er n’yannoo.

⁶⁷ As hug Isaac lesh ee gys cabbane Sarah e voir, as ghow eh Rebekah, as v’ee yn ven echey; as v’eh graihagh urree: as va Isaac er ny gherjaghey lurg baase e vayrey.