Genesis 18 - Yn Vible Casherick 1775 1819

CAB. XVIII

¹ As ren y Chiarn eh hene y hoilshaghey da ayns cheer rea Mamre: as v’eh ny hoie ayns dorrys y chabbane, ayns chiass y laa.

² As hrog eh seose e hooillyn as yeeagh eh, as cur-my-ner, va three deiney nyn shassoo er-gerrey da: as tra honnick eh ad, roie eh nyn guail veih dorrys y chabbane, as chroym eh sheese eh hene lesh y thalloo.

³ As dooyrt eh, My Hiarn, my ta mee nish er gheddyn foayr ayns dty hilley, ny gow shaghey, ta mee guee ort, veih dty harvaant.

⁴ Lhig da red beg dy ushtey, ta mee guee erriu, v’er ny choyrt lesh, as niee-jee nyn gassyn, as gow-jee nyn aash fo yn villey.

⁵ As ver-ym lhiam greme dy arran, as jean-jee nyn greeaghyn y gherjaghey; ny lurg shen hed shiu er nyn doshiaght: son er-yn-oyr shen, ta shiu er jeet gys nyn sharvaant. As dooyrt ad, Jean myr t’ou er ghra.

⁶ As jimmee Abraham ayns siyr gys y chabbane gys Sarah, as dooyrt eh, Fow aarloo dy tappee three towseyn dy reih flooyr, fuinn eh, as jean berreenyn er y chiollagh.

⁷ As roie Abraham gys y chioltane, as hug eh lesh lheiy beiyht as mie, as hug eh da dooinney aeg eh, as ren eh siyr dy aarlaghey eh.

⁸ As ghow eh eeym as bainney, as y lheiy v’eh er n’aarlaghey, as hoie eh shoh kiongoyrt roo; as hass eh lioroo fo’n villey, as ren ad gee.

⁹ As dooyrt ad rish, Cre vel Sarah dty ven? as dreggyr eh, Cur-my-ner t’ee ayns y chabbane.

¹⁰ As dooyrt eh, Neem’s dy shickyr chyndaa hood’s ec y traa cooie yn vleïn shoh cheet; as cur-my-ner, ver Sarah dty ven mac son y theihll. As cheayll Sarah shoh ayns dorrys y chabbane, va ny chooyl.

¹¹ Nish va Abraham as Sarah shenn, as er roie, dy mie ayns eash: as scuirr eh dy ve marish Sarah, myr te dooghyssagh da mraane dy ve.

¹² Shen-y-fa, ren Sarah garaghtee cheu-sthie jee hene, gra, Erreish dooys v’er n’aase shenn, bee yn boggey shoh aym, fakin dy vel my hiarn shenn myrgeddin?

¹³ As dooyrt y Chiarn rish Abraham, Cre’n-fa ren Sarah garaghtee, gra, Jean-yms son shickyrys lhiannoo y ymmyrkey, tra ta mee shenn?

¹⁴ Vel nhee erbee ro ghoillee da’n Chiarn? ec y traa pointit, hig-yms reesht cordail rish y traa cooie, as ver Sarah mac son y theihll.

¹⁵ Eisht dob Sarah, gra, Cha ren mee garaghtee, son va aggle urree. As dooyrt eh, Ny gow n’oï, son ren oo garaghtee.

¹⁶ As hrog ny deiney orroo veih shen, as yeeagh ad lesh Sodom: as hie Abraham mâroo dy choyrt ad er nyn raad.

¹⁷ As dooyrt y Chiarn, Jean-yms keiltyn veih Abraham shen ny ta foym dy yannoo.

¹⁸ Fakin dy jig Abraham dy shickyr dy ve ny ashoon mooar as niartal, as dy bee ooilley ashoonyn y theihll er nyn mannaghey aynsyn.

¹⁹ Son ta fys aym, dy der eh sarey da e chloan as e lught-thie ny yeï, as freillee ad raaidyn y Chiarn, dy yannoo cairys as briwnys; dy vod y Chiarn cooilleeney da Abraham shen ny t’eh er loayrt my-e-chione.

²⁰ As dooyrt y Chiarn, Er-yn-oyr dy vel eam Sodom as Gomorrah atchimagh, as er-yn-oyr dy vel y peccah oc feer eajee:

²¹ Hem sheese nish dy akin, vel ad er n’yannoo ooilley-cooidjagh cordail rish yn eam oc t’er roshtyn hym’s; as mannagh vel, bee fys aym er.

²² As hyndaa ny deiney nyn eddin veih shen, as hie ad lesh Sodom: agh hass Abraham foast kiongoyrt rish y Chiarn.

²³ As hayrn Abraham er-gerrey, as dooyrt eh, Jean oo myrgeddin stroie yn sleih ynrick marish ny mee-chrauee.

²⁴ Abbyr, dy bee jeih as da-eed dy leih cairal cheu-sthie jeh’n ard-valley: jean oo myrgeddin stroie as gyn sparail yn ynnyd er graih yn jeih as da-eed dy leih cairal oddys ve ayn.

²⁵ Shen dy row foddey voïd, dy yannoo myr shoh, dy stroie yn vooinjer cairal marish ny mee-chrauee: as dy bee yn vooinjer cairal myr ny mee-chrauee, dy row shen foddey voïd: nagh jean briw yn seihll ooilley cairys y yannoo?

²⁶ As dooyrt y Chiarn, My yioym ayns Sodom jeih as da-eed dy leih cairal ’syn ard-valley, eisht nee’m yn slane ynnyd y sparail er y graih ocsyn.

²⁷ As dreggyr Abraham, as dooyrt eh, cur-my-ner nish, ta mee er ghoaill orrym dy loayrt rish y Chiarn, mish nagh vel agh joan as leoie.

²⁸ Abbyr dy bee queig giare jeh’n jeih as da-eed dy leih cairal; jean oo yn slane ard-valley y stroie son laccal queig? As dooyrt eh, My yioym ayns shen queig as da-eed, cha stroie-ym eh.

²⁹ As loayr eh rish foast keayrt elley, as dooyrt eh, Abbyr dy bee da-eed er ny gheddyn ayn. As dooyrt eh, Cha stroie-ym eh er graih yn da-eed.

³⁰ As dooyrt eh rish, O ny lhig da’n Chiarn ve corree, as nee’m loayrt: Abbyr dy bee jeih as feed er ny gheddyn ayn. As dooyrt eh, Cha stroie-ym eh my yioym jeih as feed ayn.

³¹ As dooyrt eh, Cur-my-ner, ta mee nish er ghoaill orrym dy loayrt rish y Chiarn: Abbyr dy bee feed er ny gheddyn ayn. As dooyrt eh, Cha stroie-ym eh er graih yn feed.

³² As dooyrt eh, O ny lhig da’n Chiarn ve corree, as cha loayr-ym agh yn un cheayrt shoh: Abbyr dy bee jeih er ny gheddyn ayn, as dooyrt eh, Cha stroie-ym eh er graih yn jeih.

³³ As hie yn Chiarn roish, erreish da’n taggloo shoh ve echey rish Abraham: As hie Abraham reesht gys e chummal hene.