Genesis 17 - Yn Vible Casherick 1775 1819

CAB. XVII

¹ As tra va Abram kiare-feed bleïn as nuy-jeig, ren y Chiarn eh-hene y hoilshaghey da Abram, as dooyrt eh rish, She mish yn Jee ooilley-niartal, jean gimmeeaght kiongoyrt rhym, as bee uss ynrick.

² As nee’m my chonaant y yannoo eddyr mish as uss, as bishaghey oo erskyn towse.

³ As huitt Abram er e eddin; as loayr Jee rish, gra,

⁴ Er my hon’s, cur-my-ner ta my chonaant mayrt’s, as bee uss ayr ymmodee ashoonyn

⁵ Chamoo vees dty ennym arragh Abram, agh Abraham vees dty ennym, son ta mee er n’yannoo uss ayr ymmodee ashoonyn.

⁶ As ver-ym ort dy ve erskyn-towse messoil, as neem’s ashoonyn jeed as hig reeaghyn jeh dty luight.

⁷ As nee’m my chonaant y niartaghey eddyr mish as uss, as dty luight dty yeï, ayns ny sheelogheyn oc, son conaant dy bragh farraghtyn, dy ve my Yee dhyt’s as da dty luight dty yeï.

⁸ As ver-yms dhyt’s, as da dty luight dty yeï, yn cheer raad t’ou dty yoarree, ooilley cheer Chanaan, son cummal foddey beayn; as beem’s yn Jee oc.

⁹ As dooyrt Jee rish Abraham, Nee uss er-y-fa shen my chonaant y reayll, uss as dty luight dty yeï ayns nyn sheelogheyn.

¹⁰ Shoh my chonaant, nee shiu y reayll eddyr mish as uss, as dty luight dty yeï; bee dy chooilley lhiannoo mac nyn mast’ eu er ny yiarey-chymmylt.

¹¹ As nee shiu giarey-chymmylt yn eill eu, as bee eh cowrey jeh’n chonaant ta eddyr mish as shiuish.

¹² As bee eshyn ta hoght laa dy eash er ny yiarey-chymmylt nyn mast’ eu, dy chooilley lhiannoo mac ayns ny sheelogheyn eu, eshyn t’er ny ruggey ayns y thie, ny kionnit lesh argid veih’n joarree nagh vel jeh dty luight.

¹³ Eshyn ta ruggit ayns dty hie, as eshyn ta kionnit lesh dty argid, shegin da ve er ny yiarey-chymmylt: as bee my chonaant ayns yn eill euish, son conaant foddey beayn.

¹⁴ As y lhiannoo mac nagh vel er ny yiarey-chymmylt ayns yn eill echey, bee yn annym cheddin er ny yiarey jeh veih e phobble: t’eh er vrishey my chonaant.

¹⁵ As dooyrt Jee rish Abraham, Er son Sarai dty ven, cha jean oo ee y enmys Sarai, agh Sarah vees yn ennym eck.

¹⁶ As neem’s ee y vannaghey, as myrgeddin ver-ym dhyt mac jeeish: dy jarroo nee’m ee y vannaghey, as bee ish moir ashoonyn; hig reeaghyn dy phobble jeeish.

¹⁷ As huitt Abraham er e eddin, as ren eh garaghtee, as dooyrt eh ayns e chree, Bee lhiannoo er ny ruggey dasyn ta keead bleïn dy eash? as jean Sarah, ta kiare-feed bleïn as jeih, lhiannoo y ymmyrkey?

¹⁸ As dooyrt Abraham, O dy bee Ishmael foddey beayn kiongoyrt rhyt?

¹⁹ As dooyrt Jee, Nee Sarah dty ven dy jarroo mac y ymmyrkey dhyt; as nee oo genmys eh Isaac: as nee’m shickyraghey my chonaant rishyn, son conaant dy bragh farraghtyn, as rish e luight ny lurg.

²⁰ As mychione Ishmael, ta mee er dty chlashtyn: cur-my-ner, ta mee er vannaghey eh, as nee’m eh messoil, as nee’m bishaghey eh erskyn towse: daa phrince jeig nee eh y gheddyn, as neem’s eh ny ashoon mooar.

²¹ Agh my chonaant nee’m y hickyraghey rish Isaac, eh nee Sarah gymmyrkey dhyt ec y traa cooie yn vleïn shoh cheet.

²² As scuirr eh dy loayrt rish, as dimmee Jee seose veih Abraham.

²³ As ghow Abraham Ishmael e vac, as dagh unnane va ruggit ayns e hie, as ooilley ny va kionnit lesh e argid, dy chooilley yrrynagh v’ayns lught-thie Abraham; as ren eh giarey-chymmylt yn eill oc ’sy laa cheddin, myr va Jee er n’oardaghey da.

²⁴ As va Abraham kiare-feed bleïn as nuy-jeig dy eash, tra v’eh er ny yiarey-chymmylt ayns yn eill.

²⁵ As va Ishmael e vac three bleeaney jeig dy eash tra v’eh er ny yiarey-chymmylt ayns yn eill.

²⁶ Er yn eer laa cheddin va Abraham as Ishmael e vac er nyn yiarey-chymmylt.

²⁷ As ooilley deiney e hie, v’er nyn ruggey ayns e hie, as kionnit lesh e argid voish y joarree, v’ad er nyn yiarey-chymmylt mârish.