Genesis 16 - Yn Vible Casherick 1775 1819

CAB. XVI

¹ Nish cha ren Sarai ben Abram cloan y ymmyrkey da: as va inney-veyl eck, ny Egyptian, enmyssit Hagar.

² As dooyrt Sarai rish Abram, Cur-my-ner nish, ta’n Chiarn er m’y lhiettal veih gymmyrkey cloan: ta mee guee ort, gow stiagh gys my inney-veyl: foddee cloan ’ve aym’s lioree: As hug Abram geill da goan Sarai.

³ As ghow Sarai ben Abram yn inney-veyl eck Hagar, yn Egyptian, erreish da Abram v’er chummal jeih bleeaney ayns cheer Chanaan; as hug ish ee da e sheshey Abram, dy ve myr ben da.

⁴ As hie eh stiagh gys Hagar, as ren ee giennaghtyn: as tra dennee ish dy row ee er yiennaghtyn; ren ee beg y hoiagh jeh e ben-ainshtyr.

⁵ As dooyrt Sarai rish Abram, My aggair dy row ort: ta mee er choyrt my inney-veyl gys dty oghrish: as tra honnick ee dy row ee er yiennaghtyn, ren ee beg y hoiagh jee’m: dy jean y Chiarn briwnys eddyr mish as uss.

⁶ As dooyrt Abram rish Sarai, Cur-my-ner, ta dty inney-veyl ayns dty phooar hene, jean myr sailt r’ee. As tra hug Sarai drogh ghellal jee, chossyn ee ersooyl.

⁷ As hooar ainle y Chiarn ee liorish farrane ushtey ayns yn aasagh, liorish y chibbyr t’ayns y raad gys Shur.

⁸ As dooyrt eh, Hagar, inney-veyl Sarai, cre veih haink oo? as caïd t’ou goll? As dooyrt ee, Ta mee roie er-chea veih eddin my ven-ainshtyr Sarai.

⁹ As dooyrt ainle y Chiarn r’ee, Chyndaa gys dty ven-ainshtyr, as jean oo hene y injillaghey fo yn laue eck.

¹⁰ As dooyrt ainle y Chiarn r’ee, Neem’s bishaghey dty luight erskyn towse, nagh vod ad v’er nyn goontey son yn earroo oc.

¹¹ As dooyrt ainle y Chiarn r’ee, Cur-my-ner t’ou torragh, as ver oo mac son y theihll, as bee yn ennym echey Ishmael, er-yn-oyr dy vel yn Chiarn er chlashtyn dty heaghyn.

¹² Bee eh ny ghooinney feïe: bee yn laue echey noi dy chooilley ghooinney, as laue dy chooilley ghooinney n’oï-syn: as bee e chummal ayns fenish ooilley e vraaraghyn.

¹³ As ren ee geamagh er ennym y Chiarn ren loayrt r’ee [gra] T’ou uss Yee er m’y akin: son dooyrt ee, Vel mish myrgeddin er vakin eshyn t’ayns shoh er yeeaghyn orrym?

¹⁴ Shen-y-fa va’n chibbyr enmyssit Beer-lahai-roi; cur-my-ner te eddyr Kadesh as Bered.

¹⁵ As dymmyrk Hagar mac da Abram, as denmys Abram ennym e vac ren Hagar gymmyrkey da, Ishmael.

¹⁶ As va Abram kiare-feed bleïn as shey dy eash tra ren Hagar gymmyrkey Ishmael da Abram.