Genesis 14 - Yn Vible Casherick 1775 1819

CAB. XIV

¹ As haink eh gy-kione, rish lhing Amraphel ree Shinar, Arioch ree Ellasar, Chedorlaomer ree Elam, as Tidal ree ashoonee.

² Dy ren ny reeaghyn shoh caggey noi Bera ree Sodom, as noi Birsha ree Gomorrah, noi Shinab ree Admah, as Shemeber ree Zeboiim, as noi ree Bela, ta shen Zoar.

³ V’ad shoh er nyn jaglym cooidjagh ayns coan Siddim, ta nish enmyssit yn keayn sailjey.

⁴ Daa vleïn jeig v’ad fo keesh gys Chedorlaomer, as ’sy tress vleïn yeig dirree ad magh n’oï.

⁵ As ayns y chiarroo vleïn jeig haink Chedorlaomer, as ny reeaghyn va mârish, as woaill ad ny Rephaimee ayns Ashtaroth Karnaim, as ny Zuzimee ayns Ham, as ny Emimee ayns Shaveh Kiriathaim.

⁶ As ny Horiteyn ayns cronk Seir, gys El-paran, ta liorish yn aasagh.

⁷ As hyndaa ad, as haink ad gys En-mishpat, ta shen Kadesh, as stroie ad slane cheer ny Amalekiteyn, as myrgeddin ny Amoriteyn va cummal ayns Hazezon-tamar.

⁸ As hie magh noi oc ree Sodom, as ree Gomorrah, as ree Admah, as ree Zeboiim, as ree Bela (ta shen Zoar) as ren ad caggey ry-cheilley ayns coan Siddim;

⁹ Ta shen, rish Chedorlaomer ree Elam, as noi Tidal ree ashoonee, as Amraphel ree Shinar, as Arioch ree Ellasar; kiare reeaghyn noi queig.

¹⁰ As va coan Siddim lane sloghyn laaghey; as reeaghyn Sodom as Gomorrah hug ad cooyl, as huitt ad ayndoo: as adsyn ren scapail chossyn ad roue gys ny sleityn.

¹¹ As ghow ad ayns spooilley ooilley yn chooid va ayns Sodom as Gomorrah, as ooilley yn beaghey v’ayn, as jimmee ad rhymboo.

¹² As ghow ad Lot mac braarey Abram (va cummal ayns Sodom) as e chooid, as jimmee ad roue.

¹³ As haink fer jeusyn v’er roie er-chea, as dinsh eh shoh da Abram yn Hebrew; son v’eh cummal ayns strah Mamre yn Amorite, braar Eshcol, as braar Aner: v’ad shoh er n’yannoo cordail rish Abram.

¹⁴ As tra cheayll Abram dy row e vraar goit ny phryssoonagh, choamree eh lesh armyn e Harvaantyn chaggee v’er nyn ruggey ayns e hie hene, three cheead as hoght-jeig, as hie ad er nyn eiyrt’s choud as Dan.

¹⁵ As rheynn eh e heshaght-chaggee nyn ’oï, eh hene as e harvaantyn ’syn oie, as hooar ad y varriaght harrystoo: as hie ad er nyn eiyrt’s gys Hobah er cheu chiare jeh Damascus.

¹⁶ As hug eh lesh back ooilley yn chooid, as myrgeddin hug eh lesh e vraar Lot, as e chooid, as myrgeddin ny mraane, as y pobble.

¹⁷ As hie ree Sodom magh ny whail (myr v’eh chyndaa veih cragh Chedorlaomer, as ny reeaghyn va mârish) ’sy choan Shaveh, ta shen, coan y ree.

¹⁸ As hug Melchizedeck ree Salem lesh magh arran as feeyn: as v’eh saggyrt yn Jee smoo syrjey.

¹⁹ As vannee eshyn eh, as dooyrt eh, Bannit dy row Abram liorish y Jee smoo syrjey, leshyn ta niau as thalloo.

²⁰ As bannit dy row yn Jee smoo syrjey, ta er livrey dty noidyn gys dty phooar. As hug eh jaghee da jeh ooilley e spooilley.

²¹ As dooyrt ree Sodom rish Abram, Livrey dou yn sleih, as gow yn chooid dhyt hene.

²² As dooyrt Abram rish ree Sodom, Ta mee er hroggal seose my laue gys y Chiarn, yn Jee smoo syrjey, leshyn ta niau as thalloo.

²³ Nagh goym nhee erbee, eer veih snaie gys strap-braagey, as nagh goym nhee erbee ta lhiat’s, nagh bee oyr ayd dy ghra, Ta mee er n’yannoo Abram berchagh;

²⁴ Er-lhimmey jeh shen, ny ta ny deiney aegey er vaarail, as ayrn ny deiney hie mârym, Aner, Eshcol, as Mamre; lhig dauesyn nyn ayrn y goaill.