Genesis 13 - Yn Vible Casherick 1775 1819

CAB. XIII

¹ As jimmee Abram magh ass Egypt, eh hene, as e ven, as ooilley ny va echey, as Lot mârish, lesh y jiass.

² As va Abram feer verchagh ayns maase, ayns argid, as ayns airh.

³ As hie eh er e yurnah veih yn jiass, eer gys Beth-el, gys yn ynnyd raad va e chabbane ec y toshiaght, eddyr Beth-el as Hai.

⁴ Gys yn ynnyd raad v’eh er droggal altar ec y toshiaght: as ayns shen ren Abram geamagh er ennym y Chiarn.

⁵ As va myrgeddin ec Lot, hie marish Abram, shioltaneyn, as shellooyn, as cabbaneyn.

⁶ As cha row yn cheer mooar dy liooar dy nyn rere, daue dy chummal cooidjagh; son va mooarane cooid oc, myr shen nagh voddagh ad cummal dy cheilley.

⁷ As va streeu eddyr bochillyn Abram as bochillyn Lot: as va’n Canaanite as y Perizzite cummal ayns y cheer ec y traa cheddin.

⁸ As dooyrt Abram rish Lot, Ny lhig da streeu erbee ta mee guee ort, ve eddyr mish as uss, as eddyr ny bochillyn aym’s as ny bochillyn ayd’s, son braaraghyn shin.

⁹ Nagh vel y slane cheer kiongoyrt rhyt? jean oo hene y scarrey, ta mee guee ort, voym’s: my nee uss goll gys y laue chiare, eisht hem’s lesh y laue yesh; er-nonney my hed uss gys y laue yesh, eisht hem’s lesh y laue chiare.

¹⁰ As hrog Lot seose e hooillyn: as hug eh my-ner ooilley strah Yordan, dy row ushtey dy mie ayn dy chooilley raad, roish my stroie yn Chiarn Sodom as Gomorrah, eer myr garey yn Chiarn, goll-rish cheer Egypt myr t’ou cheet lesh Zoar.

¹¹ Eisht ren Lot reih da hene ooilley strah Yordan: as ren Lot troailt lesh y shiar: as ren ad scughey yn derrey yeh veih yn jeh elley.

¹² Ren Abram cummal ayns cheer Chanaan, as ren Lot cummal ayns ard-valjyn yn strah, as hoie eh e chabbane lesh Sodom.

¹³ Agh va deiney Sodom feer vee-chrauee, as erskyn-towse peccoil, kiongoyrt rish y Chiarn.

¹⁴ As dooyrt y Chiarn rish Abram, lurg da Lot v’er ny scarrey veih; Trog nish seose dty hooillyn, as jeeagh veih yn ynnyd t’ou ayn, my-hwoaie, as my-yiass, as lesh y shiar, as lesh y sheear.

¹⁵ Son ooilley yn cheer t’ou dy akin, dhyt’s ver-ym eh, as da dty luight son dy bragh.

¹⁶ As neem’s yn sluight ayd’s [ayns earroo] myr joan ny hooirey: myr shen my oddys dooinney coontey joan ny hooirey, eisht vees dty luight’s myrgeddin er nyn earroo.

¹⁷ Trog ort, shooyl trooid y cheer, er y lhiurid, as er y lheead echey; son dhyt’s ver-yms eh.

¹⁸ Eisht ren Abram e chabbane y scughey, as haink eh, as ren eh cummal ayns cheer rea Mamre, ta ayns Hebron, As ayns shen hrog eh altar gys y Chiarn.