Genesis 11 - Yn Vible Casherick 1775 1819

CAB. XI

¹ As va’n seihll ooilley jeh’n un chengey, as jeh’n un ghlare.

² As haink eh gy-kione, myr ghow ad nyn yurnah lesh y shiar, dy daink ad gys cheer rea ayns thalloo Shinar; as ayns shen ren ad cummal.

³ As dooyrt ad ry-cheilley, Tar-jee, lhig dooin breekyn y yannoo, as slane lostey ad: As va breekyn oc ayns ynnyd claghyn, as va pick-hallooin oc son mortar.

⁴ As dooyrt ad, Tar-jee, lhig dooin ard-valley as toor y hroggal, e vullagh nee roshtyn gys niau; as lhig dooin ynnyd-vaghee shickyr y yannoo dooin hene, nagh bee mayd skeaylt veih-my-cheilley er slane eaghtyr y thallooin.

⁵ As haink y Chiarn neose dy chur-my-ner yn ard-valley, as y toor va cloan gheiney dy hroggal.

⁶ As dooyrt y Chiarn, Cur-my-ner ta’n pobble myr unnane, as ta’n un ghlare oc ooilley: as shoh t’ad er ghoaill orroo dy yannoo; as nish cha bee nhee erbee er ny lhiettal voue, t’ad er n’ghoaill ayns laue dy yannoo.

⁷ Tar-jee, lhig dooin goll sheese, as ayns shen coyrt shaghrynys er y ghlare oc, nagh vod yn derrey yeh toiggal glare yn jeh elley.

⁸ Er shoh ren y Chiarn skeayley ad magh veih shen harrish slane eaghtyr y thallooin; as scuirr ad veih troggal yn ard-valley.

⁹ Shen-y-fa te enmyssit Babel, er-yn-oyr dy nee ayns shen hug y Chiarn shaghrynys er glare ooilley yn seihll: as veih shen ren y Chiarn ad y skeayley harrish slane eaghtyr y thallooin.

¹⁰ Ad shoh va sheelogheyn Shem: va Shem keead bleïn dy eash, as hooar eh Arphaxad daa vleïn lurg y thooilley.

¹¹ As va Shem bio lurg ruggyr Arphaxad queig cheead bleïn, as hooar eh mec as inneenyn.

¹² As va Arphaxad bio queig bleeaney jeig as feed, as hooar eh Salah.

¹³ As va Arphaxad bio lurg Salah ve ruggit, kiare cheead bleïn as three; as va echey mec as inneenyn.

¹⁴ As tra va Salah jeih bleeaney as feed dy eash, hooar eh Eber.

¹⁵ As va Salah bio lurg Eber ve ruggit kiare cheead bleïn as three; as va echey mec as inneenyn.

¹⁶ As tra va Eber kiare bleeaney jeig as feed dy eash hooar eh Peleg.

¹⁷ As va Eber bio lurg ruggyr Peleg kiare cheead bleïn as jeih as feed: As va echey mec as inneenyn.

¹⁸ As tra va Peleg jeih bleeaney as feed dy eash, hooar eh Reu.

¹⁹ As va Peleg bio lurg Reu ve ruggit daa cheead bleïn as nuy; as va echey mec as inneenyn.

²⁰ As tra va Reu da vleïn jeig as feed dy eash, hooar eh Serug.

²¹ As va Reu bio lurg Serug ve ruggit daa cheead bleïn as shiaght, as hooar eh mec as inneenyn.

²² As tra va Serug jeih bleeaney as feed dy eash, hooar eh Nahor.

²³ As va Serug bio lurg Nahor ve ruggit daa cheead bleïn; as va echey mec as inneenyn.

²⁴ As tra va Nahor nuy bleeaney as feed dy eash, hooar eh Terah.

²⁵ As va Nahor bio lurg Terah ve ruggit queig-feed as nuy bleeaney jeig; as va echey mec as inneenyn.

²⁶ As tra va Terah three-feed bleïn as jeih, hooar eh Abram, Nahor, as Haran.

²⁷ Nish ad shoh sheelogheyn Terah: hooar Terah Abram, Nahor, as Haran: As hooar Haran Lot.

²⁸ As hooar Haran baase roish e ayr Terah, ayns y cheer ruggyr eh, ayns Ur ny Chaldeanee.

²⁹ As ghow Abram as Nahor dagh fer jeu ben: va ben Abram enmyssit Sarai: as ben Nahor, Milcah, inneen Haran, ayr Milcah, as ayr Iscah.

³⁰ As va Sarai gennish; cha row (foast) sluight eck.

³¹ As ghow Terah Abram e vac, as Lot mac Haran, yn oe echey, as Sarai e inneen ’sy leigh, ben e vac Abram; as hie ad magh veih Ur jeh ny Chaldeanee, dy gholl gys cheer Chanaan; as haink ad gys Haran, as ren ad cummal ayns shen.

³² As va eash Terah daa cheead bleïn as queig, as hooar Terah baase ayns Haran.