Genesis 10 - Yn Vible Casherick 1775 1819

CAB. X

¹ Nish ad shoh sheelogheyn vec Noah; Shem, Ham, as Japheth: as daue va mec er nyn ruggey lurg y thooilley.

² Mec Japheth; v’ad Gomer, as Magog, as Madai, as Javan, as Tubal, as Meshech, as Tiras.

³ As mec Gomer; Ashkenaz, as Riphath, as Togarmah.

⁴ As mec Javan; Elisha, as Tarshish, Kittim, as Dodanim.

⁵ Lioroo shoh va ellanyn ny ashoonee er nyn rheynn lurg nyn cheeraghyn; dagh cheer lurg e ghlare hene, cordail rish nyn gynneeyn, ayns ny ashoonyn oc,

⁶ As mec Ham; Cush, as Mizraim, as Phut, as Canaan.

⁷ As mec Cush; Seba, as Havilah, as Sabtah, as Raamah, as Sabtecha; as mec Raamah; Sheba as Dedan.

⁸ As hooar Cush, Nimrod: ghow eh shoh toshiaght dy ve ny ghooinney pooaral er y thalloo.

⁹ V’eh ny helgeyr niartal kiongoyrt rish y Chiarn: shen-y-fa te ny raa cadjin, Eer myr Nimrod yn shelgeyr niartal kiongoyrt rish y Chiarn.

¹⁰ As va toshiaght e reiltys ayns Babel, as Erech, as Accad, as Calneh, ayns cheer Shinar.

¹¹ Veih yn cheer shen hie eh gys Ashur, as hrog eh Nineveh, as ard-valley Rehoboth, as Calah,

¹² As Resen eddyr Nineveh as Calah: ta ny ard-valley mooar.

¹³ As hooar Mizraim Ludim, as Anamim, as Lehabim, as Naptuhim.

¹⁴ As Pathrusim, as Casluhim, (jeh haink Philistim) as Caphtorim.

¹⁵ As hooar Canaan Sidon e vac shinney, as Heth,

¹⁶ As y Jebusite, as yn Amorite, as yn Girgasite,

¹⁷ As yn Hivite, as yn Arkite, as yn Sinite,

¹⁸ As yn Arvadite, as yn Zemarite, as yn Hamathite; as lurg shoh va sheelogheyn ny Canaaniteyn er nyn skeayley dy lhean.

¹⁹ As va cagliagh ny Canaaniteyn veih Sidon, myr t’ou cheet gys Gerar, derrey Gaza; myr t’ou goll lesh Sodom as Gomorrah, as Admah, as Zeboim, eer gys Lashah.

²⁰ Ad shoh mec Ham, lurg nyn gynneeyn, rere nyn glaraghyn, ayns ny cheeraghyn oc, as ayns nyn ashoonyn.

²¹ Da Shem myrgeddin, ayr ooilley cloan Eber, braar Japheth by-hinney, eer dasyn va cloan er nyn ruggey.

²² Cloan Shem; Elam, as Ashur, as Arphaxad, as Lud, as Aram.

²³ As cloan Aram; Uz, as Hul, as Gether, as Mash.

²⁴ As hooar Arphaxad Salah; as hooar Salah Eber.

²⁵ As da Eber v’er ny ruggey daa vac: va’n derrey yeh enmyssit Peleg, son rish y lhing echeysyn va’n seihll er ny rheynn; as va ennym e vraar Joktan.

²⁶ As hooar Joktan Almodad, as Sheleph, as Hazarmaveth, as Jerah,

²⁷ As Hadoram, as Uzal, as Diklah,

²⁸ As Obal, as Abimael, as Sheba,

²⁹ As Ophir, as Havilah, as Jobab: v’ad shoh ooilley mec Joktan.

³⁰ As va’n cummal oc veih Mesha, myr t’ou goll lesh Sephar, slieau ’sy shiar.

³¹ Ad shoh mec Shem, lurg nyn gynneeyn, rere nyn glaraghyn, ayns ny cheeraghyn oc, cordail rish nyn ashoonyn.

³² Ad shoh kynneeyn mec Noah, lurg nyn sheelogheyn, ayns nyn reeriaghtyn; as lioroo shoh va ny cheeraghyn er nyn rheynn er y thalloo lurg y thooilley.