Genesis 1 - Yn Vible Casherick 1775 1819

CAB. I

¹ Ayns y toshiaght chroo Jee niau as thalloo.

² As va’n thalloo gyn cummey, as feayn; as va dorraghys er eaghtyr y diunid: as ren spyrryd Yee gleashagh er eaghtyr ny ushtaghyn.

³ As dooyrt Jee, Lhig da soilshey ’ve ayn: as va soilshey ayn.

⁴ As honnick Jee yn soilshey dy row eh mie: as ren Jee scarrey yn soilshey veih yn dorraghys.

⁵ As denmys Jee yn soilshey Laa, as y dorraghys denmys eh Oie: as y fastyr as y moghrey va’n chied laa.

⁶ As dooyrt Jee, Lhig da aer ve eddyr ny ushtaghyn, as lhig eh scarrey ny ushtaghyn veih ny ushtaghyn.

⁷ As chroo Jee yn aer; as scarr eh ny ushtaghyn fo yn aer, veih ny ushtaghyn erskyn yn aer: as shen myr ve.

⁸ As ren Jee genmys yn aer Niau: as va’n fastyr as y moghrey yn nah laa.

⁹ As dooyrt Jee, Lhig da ny ushtaghyn fo yn aer ve er nyn jaglym cooidjagh gys un voayl, as lhig da’n thalloo chirrym cheet rish; as shen myr ve.

¹⁰ As denmys Jee yn thalloo chirrym Ooir; as chaglym cooidjagh ny ushtaghyn denmys eh Faarkaghyn: as honnick Jee dy row eh mie.

¹¹ As dooyrt Jee, Lhig da’n thalloo gymmyrkey faiyr, yn losserey ceau rass, as y billey gymmyrkey mess lurg e ghooghys, yn rass echey t’ayns hene er y thalloo, as shen myr ve.

¹² As ren y thalloo gymmyrkey faiyr, as losserey ceau rass lurg e ghooghys; as y billey tilgey mess, e rass t’ayns hene, lurg e ghooghys: as honnick Jee dy row eh mie.

¹³ As va’n fastyr as y moghrey yn trass laa.

¹⁴ As dooyrt Jee, Lhig da soilshaghyn ve ayns yn ayr fo niau, dy scarrey yn laa veih yn oie: as lhig daue ve son cowraghyn, as son imbaghyn, as son laghyn, as bleeantyn.

¹⁵ As lhig daue ve son soilshaghyn ayns yn aer fo niau, dy choyrt soilshey er y thalloo: as shen myr ve.

¹⁶ As chroo Jee daa hoilshey mooar; yn soilshey smoo dy reill yn laa, as yn soilshey sloo dy reill yn oie: chroo eh ny rollageyn myrgeddin.

¹⁷ As hoie Jee ad ayns yn aer fo niau, dy choyrt soilshey er y thalloo.

¹⁸ As dy reill harrish y laa, as harrish yn oie, as dy scarrey yn soilshey veih yn dorraghys: as honnick Jee dy row eh mie.

¹⁹ As va’n fastyr as y moghrey yn chiarroo laa.

²⁰ As dooyrt Jee, Lhig da ny ushtaghyn gymmyrkey magh dy palchey yn cretoor snauee ayn ta bioys, as eeanlee nee getlagh erskyn yn ooir ’syn aer feayn foshlit fo niau.

²¹ As ren Jee whaleyn mooarey y chroo, as dy chooilley chretoor bio snauee, ren ny ushtaghyn gymmyrkey magh dy palchey lurg nyn ghooghys, as dy chooilley eean skianagh lurg e ghooghys: as honnick Jee dy row eh mie.

²² As vannee Jee ad, gra, Bee-jee messoil as jean-jee bishaghey, as lhieen-jee ushtaghyn ny marrey, as lhig da ny eeanlee bishaghey er y thalloo.

²³ As va’n fastyr as y moghrey yn wheiggoo laa.

²⁴ As dooyrt Jee, Lhig da’n thalloo gymmyrkey yn cretoor bio lurg e ghooghys; maase as cretooryn snauee as beishtyn y thallooin lurg nyn ghooghys: as myr shen ve.

²⁵ As chroo Jee beishtyn y thallooin lurg nyn ghooghys, yn maase lurg nyn ghooghys, as dy chooilley nhee ta snaue er yn ooir lurg e ghooghys: as honnick Jee dy row eh mie.

²⁶ As dooyrt Jee, Lhig dooin dooinney y chroo ayns y jalloo as y chaslys ain hene: as lhig da reill ve oc harrish eeastyn ny marrey, as harrish eeanlee yn aer, as harrish y maase, as harrish ooilley yn thalloo, as harrish dy chooilley nhee snauee t’er y thalloo.

²⁷ Myr shoh ren Jee dooinney y chroo ayns e chaslys hene. Ayns caslys Yee chroo eh eh: fyrrynagh as bwoirrynagh ren eh ad y chroo.

²⁸ As vannee Jee ad, as dooyrt Jee roo, Bee-jee messoil, as jean-jee bishaghey, as jean-jee yn seihll magh lesh cummaltee, as reill-jee harrish: as ta pooar eu harrish eeastyn ny marrey, as harrish eeanlee yn aer, as harrish dy chooilley nhee bio ta gleashagh er y thalloo.

²⁹ As dooyrt Jee, Cur-my-ner, ta mee er choyrt diu dy chooilley losserey ta gymmyrkey rass, er slane eaghtyr y thallooin, as dy chooilley villey ayn ta mess billey gymmyrkey rass: diuish vees eh son beaghey.

³⁰ As da ooilley beïyn y thallooin, as da ooilley eeanlee yn aer, as da dy chooilley nhee ta snaue er yn ooir, ayn ta bioys ta mee er choyrt dy chooilley losserey glass son beaghey: as myr shen ve.

³¹ As honnick Jee dy chooilley nhee v’eh er chroo as cur-my-ner ve feer vie. As va’n fastyr as y moghrey yn cheyoo laa.