Ezra 9 - Yn Vible Casherick 1775 1819

CAB. IX

¹ Nish, lurg da ny reddyn shoh ve jeant, haink ny princeyn hym gra, Cha vel pobble Israel, as ny saggyrtyn, as ny Leviteyn, er scarrey ad-hene veih pobble ny cheeraghyn [joarree], jannoo cordail rish ny obbraghyn feohdoil oc, eer jeh ny Canaaniteyn, ny Hittiteyn, ny Perizziteyn, ny Jebusiteyn, ny Ammoniteyn, ny Moabiteyn, as Egyptianee, as ny Amoriteyn.

² Son t’ad er n’ghoaill ny inneenyn oc daue hene, as da nyn mec, myr shen dy vel y sluight casherick er nyn lhiantyn gys pobble ny cheeraghyn shen; dy jarroo, ta eer ny princeyn, as ny fir-reill er n’ghoaill y raad ayns y drogh chooish shoh.

³ As tra cheayll mee shoh, raip mee my gharmad, as my chloagey, as phluck mee jeh folt my chione, as my aasaag, as hoie mee sheese, ayns trimshey atchimagh.

⁴ Eisht v’er ny haglym hym’s dagh unnane, v’er-creau ec goan Yee Israel, kyndagh rish drogh-yannoo cloan y chappeeys, as hoie mee fo’n aggle atchimagh derrey’n oural-fastyr.

⁵ As ec yn oural-fastyr, dirree mee seose veih my hrimshey, as lurg dou v’er raipey my gharmad, as my chloagey, huitt mee er my ghlioonyn as skeayl mee magh my laueyn gys y Chiarn my Yee,

⁶ As dooyrt mee, O my Yee, ta mee goaill nearey, as jiargaghey dy hroggal seose my eddin hood’s my Yee: son ta nyn beccaghyn er vishaghey harrish nyn ghing, as nyn loght er roshtyn gys ny niaughyn.

⁷ Er-dy laghyn nyn ayraghyn, ta shin er ve fo loght trome, gys y laa t’ayn jiu; as son y drogh-yannoo ain, ta shin hene, ny reeaghyn, as ny saggyrtyn ain er ve livreit gys laue reeaghyn ny ashoonyn, gys y chliwe, gys cappeeys, gys spooilley, gys nearey eddin, myr te yn laa jiu.

⁸ As nish son earish yiare, ta foayr er ve soilshit veih’n Chiarn nyn Yee dy aagail dooin sluight dy scapail, as dy choyrt dooin treiney ayns e ynnyd casherick, dy vod y Jee ain nyn sooillyn y hoilshaghey, as coyrt dooin kuse dy ooraghey ayns nyn mondiaght.

⁹ Son va shin fo bondiaght, agh cha vel y Jee ain er hreigeil shin ayns nyn mondiaght, agh er hoilshaghey myghin dooin ayns sooillyn ree Phersia, dy choyrt dooin ooraghey, dy hoiaghey seose thie yn Jee ain, as dy lhiasaghey yn traartys echey, as dy choyrt dooin voalley ayns Judah as Jerusalem.

¹⁰ As nish, O nyn Yee, cre jir mayd lurg shoh? son ta shin er hreigeil dty annaghyn,

¹¹ Ad t’ou er n’oardaghey liorish dty harvaantyn ny phadeyryn, gra, Ta’n cheer ayn ta shiu goll dy chummal, cheer neu-ghlen, lesh broïd pobble ny cheeraghyn, lesh nyn obbraghyn feohdoil, t’er lhieeney eh veih kione gy-kione, lesh nyn neu-ghlennid.

¹² Nish er-y-fa shen, ny cur-jee ny inneenyn euish da ny mec ocsyn, chamoo gow-jee ny inneenyn oc da ny mec euish, chamoo shir-jee yn shee oc, ny nyn voays, son dy bragh; dy vod shiu ve niartal, as soylley ’ghoaill jeh’n cheer, as faagail eh son eiraght da nyn gloan, son dy bragh.

¹³ As lurg ooilley ny t’er jeet orrin son nyn ghrogh-yannoo, as son nyn beccah trome, fakin dy vel uss y Jee ain er cherraghey shin ny sloo na ta nyn beccaghyn dy hoilchin, as er choyrt dooin lheid y livrey shoh:

¹⁴ Dy jinnagh shinyn reesht brishey dty annaghyn, as dy yannoo cleunys rish y pobble feohdoil shoh? nagh beagh uss corree rooin, dy stroie shin; fegooish fooilliagh, ny scapail?

¹⁵ O Hiarn Yee Israel, t’ou uss cairagh, agh ta shinyn foast er scapail gyn kerraghey, myr te yn laa jiu: cur-my-ner ta shin kiongoyrt rhyt ayns nyn beccaghyn: son cha vod mayd shassoo kiongoyrt rhyt, kyndagh rish shoh.