Ezra 8 - Yn Vible Casherick 1775 1819

CAB. VIII

¹ Nish ad shoh ard-gheiney ny ayraghyn, as shoh coontey kynneeyn ocsyn hie seose mârym veih Babylon, rish lhing Artaxerxes y ree.

² Jeh mec Phinehas; Gershom: jeh mec Ithamar; Daniel: jeh mec Ghavid; Hattush.

³ Jeh mec Shechaniah, jeh mec Pharosh; Zechariah: as mârishyn v’er nyn earroo, dy gheiney lurg nyn gynneeyn, shiaght-feed as jeih.

⁴ Jeh mec Pahath-moab; Elihoenai mac Zerahiah, as mârishyn daa cheead dooinney.

⁵ Jeh mec Shechaniah; mac Yahaziel, as mârishyn three cheead dooinney.

⁶ Jeh mec Adin myrgeddin; Ebed mac Yonathan, as mârishyn jeih deiney as da-eed.

⁷ As jeh mec Elam; Jeshaiah mac Athaliah, as mârishyn three-feed as jeih deiney.

⁸ As jeh mec Shephatiah; Zebadiah mac Michael, as mârishyn kiare-feed dooinney.

⁹ Jeh mec Yoab; Obadiah mac Jehiel, as mârishyn daa cheead as hoght-jeig.

¹⁰ As jeh mec Shelomith; mac Josiphiah, as mârishyn hoght-feed dooinney.

¹¹ As jeh mec Bebai; Zechariah mac Bebai, as mârishyn hoght deiney as feed.

¹² As jeh mec Azgad; Johanan mac Hakkatan, as mârishyn queig-feed as jeih.

¹³ As jeh mec s’jerree Adonikam, shoh nyn enmyn; Eliphelet, Jehiel as Shemaiah, as mâroosyn three-feed dooinney.

¹⁴ Jeh mec Bigvai neesht; Uthai as Zabbud, as mâroosyn three-feed as jeih.

¹⁵ As haggil mee ad cooidjagh gys yn awin ta roie gys Ahava; as duirree shin ayns shen ayns cabbaneyn three laa: as ghow mee earroo yn pobble, as ny saggyrtyn, as cha dooar mee ayns shen veg jeh mec Levi.

¹⁶ Eisht hug mee fys er Eliezer, er Ariel, as Shemaiah, as er Elnathan, as er Jarib, as er Elnathan as er Nathan, as er Zechariah, as er Meshullam, ard-gheiney: myrgeddin er Joiarib, as er Elnathan, deiney tushtagh.

¹⁷ As hug mee ad lesh currym gys Iddo yn ard-er jeu ec Casiphia, as dinsh mee daue cre yiarragh ad rish Iddo, as rish e vraaraghyn, ny Nethinimee, ec Casiphia, ad dy choyrt lhieu hooin shirveishee, son thie yn Jee ain.

¹⁸ As liorish laue vie yn Jee ain mârin, hug ad lhieu hooin dooinney tushtagh, jeh mec Mahli, mac Levi, mac Israel, as Sherebiah, marish e vec as e vraaraghyn, hoght-jeig.

¹⁹ As Hashabiah, as mârishyn Jeshaiah, jeh mec Merari, e vraaraghyn as nyn mec, feed.

²⁰ Myrgeddin, jeh ny Nethinimee, va David as ny princeyn er phointeil son shirveish ny Leviteyn, daa cheead as feed Nethinim; v’ad ooilley coontit lurg nyn ennym.

²¹ Eisht ren mee fockley magh laa troshtee ayns shen, ec awin Ahava, dy injillaghey shin hene kiongoyrt rish y Jee ain, dy hirrey veihsyn raad sauchey dooin hene, da nyn gloan veggey, as ooilley nyn gooid.

²² Son cha lhiggagh y nearey dou shirrey veih’n ree sheshaght dy hidooryn, as markee, dy chooney lhien noi’n noid er y raad: er-yn-oyr dy row shin er loayrt rish y ree, gra, Ta laue’n Jee ayn orroosyn ooilley son mie ta dy hirrey eh, agh ta e phooar as e yymmoose noi ocsyn ooilley ta treigeil eh.

²³ Myr shen ren shin trostey, as aghin y yannoo gys y Jee ain son shoh, as hooar shin nyn aghin.

²⁴ Eisht reih mee ghaa-yeig jeh ard-gheiney ny saggyrtyn, Sherebiah, Hashabiah, as jeih jeh nyn mraaraghyn mâroo.

²⁵ As howse mee daue yn argid as yn airh, as ny siyn, eer yn oural gour thie yn Jee ain, va’n ree, as e ir-choyrlee, as e hiarnyn, as ooilley Israel v’ayns shen kionfenish, er hebbal.

²⁶ Howse mee eer gys nyn laue, shey cheead as jeih talentyn as da-eed dy argid, as siyn argid keead talent, as dy airh keead talent:

²⁷ Myrgeddin, feed bason airh beeagh thousane peesh airh, as daa haagh dy chopper sollys, costal myr airh.

²⁸ As dooyrt mee roo, Ta shiu casherick gys y Chiarn, ta ny siyn casherick myrgeddin, as ta’n argid as yn airh, oural-arryltagh gys y Chiarn, Jee nyn ayraghyn.

²⁹ Bee-jee kiaralagh jeu, as freill-jee ad, derrey nee shiu ad y howse kiongoyrt rish ard-gheiney ny saggyrtyn, as ny Leviteyn, as shanstyr Israel, ec Jerusalem, ayns shamyryn thie’n Chiarn.

³⁰ Er shoh ghow ny saggyrtyn as ny Leviteyn towse yn argid, as yn airh, as ny siyn, dy choyrt lhieu ad gys Jerusalem, gys thie’n Jee ain.

³¹ Eisht hie shin roïn veih awin Ahava, er y nah laa yeig jeh’n chied vee, dy gholl gys Jerusalem; as va laue’n Jee ain harrin, as livrey eh shin veih laue yn noid, as nyn lheid as va ny lhie cooyl-chlea dy follit er y raad.

³² As haink shin gys Jerusalem, as duirree shin ayns shen three laa.

³³ Nish, er y chiarroo laa, va’n argid, as yn airh, as ny siyn er nyn dowse ayns thie’n Jee ain, liorish laue Veremoth, mac Uriah yn saggyrt, as mârishyn va Eleazar mac Phinehas, as mâroosyn va Jozabad mac Yeshua, as Noadiah mac Binnui, Leviteyn:

³⁴ Lurg earroo, as towse dagh unnane oc: as va ooilley’n towse scruit ec y traa shen.

³⁵ Myrgeddin, yn chloan ocsyn v’er nyn goyrt lhieu ersooyl, v’er jeet ass y chappeeys, heb ad ourallyn-losht gys Jee Israel, daa ghow jeig son ooilley Israel; kiare-feed as shey reaghyn jeig, three-feed as shiaght eayin, daa ghoayr jeig fyrryn son oural-peccah: va ooilley shoh son oural-losht gys y Chiarn.

³⁶ As livrey ad oardaghyn y ree gys lieutenantyn y ree, as gys ny kiannoortyn er cheu shoh jeh’n awin, as chur ad y pobble er nyn doshiaght, as thie Yee.