Ezra 4 - Yn Vible Casherick 1775 1819

CAB. IV

¹ Nish, tra cheayll noidyn Yudah as Venjamin, dy row cloan y chappeeys troggal chiamble gys y Chiarn, Jee Israel:

² Eisht haink ad gys Zerubbabel, as ard-gheiney ny ayraghyn, as dooyrt ad roo, Lhig dooinyn troggal mêriu: son ta shin shirrey’n Jee euish, myr ta shin hene, as ta shin ouralley da, er-dyn laghyn Esar-haddon, ree Assur, hug lesh shin gys shoh.

³ Agh dooyrt Zerubbabel as Jeshua, as y chooid elley jeh ard-ayraghyn Israel roo, Cha vel veg euish dy yannoo mârin, dy hroggal thie da’n Jee ainyn, agh nee mayd orrin hene troggal gys y Chiarn, Jee Israel, myr ta ree Cyrus, ree Phersia, er n’oardaghey dooin.

⁴ Shen-y-fa, ren pobble y cheer gannooinaghey laueyn pobble Yudah, as ad y voirey ayns yn obbyr.

⁵ As daill ad pleadeyryn nyn ’oï, dy lhiettal nyn obbyr, ooilley laghyn Cyrus ree Phersia, eer gys reill Darius ree Phersia.

⁶ As ayns reill Ahasuerus, ayns toshiaght e reill, scrieu ad huggey plaiynt noi cummaltee Yudah as Yerusalem.

⁷ As ayns laghyn Artaxerxes scrieu Bishlam, Mithredath, Tabeel, as shiartanse elley jeu, gys Artaxerxes ree Phersia; as va’n screeuyn jeant as lhaiht ayns glare ny Syrianee.

⁸ Ren Rehum yn cormyder, as Shimshai yn scrudeyr screeuyn y yannoo noi Jerusalem, gys Artaxerxes y ree, er yn aght shoh.

⁹ Myr shoh scrieu Rehum yn ard-vriw, as Shimshai yn scrudeyr, as y chooid elley jeh’n cheshaght: ny Dinaiteyn, ny Apharsathchiteyn, ny Tarpeliteyn, ny Apharsiteyn, ny Archeviteyn, ny Babylonianee, ny Susanchiteyn, ny Dehaviteyn, ny Elamiteyn;

¹⁰ As y chooid elley jeh ny ashoonyn, va’n Asnappar ard as ooasle er choyrt lesh harrish, as er hoiaghey ayns ard-valjyn Samaria, as y chooid elley er cheu shoh jeh’n awin, as ec lheid y traa.

¹¹ Shoh copy jeh’n screeuyn chur ad huggey, eer gys Artaxerxes y ree, Dty harvaantyn, ny deiney er cheu shoh jeh’n awin, as ec lheid y traa.

¹² Lhig da fys ’ve ec y ree, dy vel ny Hewnyn, hug uss seose hooin, er jeet gys Jerusalem, troggal yn ard-valley mee-viallagh as dangeragh, as er hoiaghey seose ny voallaghyn eck, as er niartaghey ny undinyn.

¹³ Lhig da fys ’ve ec y ree nish, my vees yn ard-valley shoh troggit reesht, as ny voallaghyn soit seose, eisht cha jean ad geeck mayle, keesh, ny custom, as myr shen bee coayl as assee ayns cheet-stiagh y ree.

¹⁴ Nish, er-yn-oyr, dy vel y lowanse beaghee ain veih plaase y ree, as nagh vel eh cooie dooin dy akin aggair jeant da’n ree; er-y-fa shen ta shin er choyrt fys, dy hoilshaghey shoh da’n ree.

¹⁵ Dy vod ronsagh ’ve jeant ayns lioar recortyssyn dty ayraghyn; myr shen nee oo feddyn ayns lioar ny recortyssyn, as toiggal dy vel yn ard-valley shoh, ard-valley mee-viallagh, dangeragh da reeaghyn as rheamyn, as dy vel ad er-dyn earishyn foddey, er ve son doostey caggey as irree-magh ayn, er-yn-oyr cheddin va’n ard-valley shoh er ny stroie.

¹⁶ Ta shin dy hickyraghey da’n ree, my vees yn ard-valley shoh troggit reesht, as ny voallaghyn eck soit seose, liorish ny saaseyn shoh, dy bee dty phooar ec kione er y cheu shoh jeh’n awin.

¹⁷ Eisht hug y ree ansoor gys Rehum yn ard-vriw, as gys Shimshai yn scrudeyr, as gys y chooid elley jeh’n cheshaght oc va cummal ayns Samaria, as gys y chooid elley cheu elley jeh’n awin, Bea as slaynt.

¹⁸ Ta’n screeuyn, hug shiu hooinyn, er ny ve lhaiht dy foshlit kiongoyrt rhym.

¹⁹ As doardee mee ronsagh dy ve jeant, as te er ny gheddyn magh, dy vel yn ard-valley shoh er-dyn shenn earish, er n’irree-magh noi reeaghyn, as dy vel caggaghyn as anvea rieau er ny ve ayn.

²⁰ Ta reeaghyn niartal myrgeddin er ve harrish Jerusalem, ta er reill harrish ooilley ny cheeraghyn cheu elley jeh’n awin, as va mayle, keesh, as custom, eeckit daue.

²¹ Cur-jee nish ny deiney shoh fo harey, dy jean ad scuirr, as nagh bee yn ard-valley shoh ny sodjey troggit, derrey hig sarey elley voym’s.

²² Cur-jee tastey nish, nagh lhig shiu shaghey dy yannoo shoh; cre’n-fa veagh coayl lowit dy ghoaill raad gys assee ny reeaghyn?

²³ Nish tra va copy jeh order ree Artaxerxes er ny lhaih kiongoyrt rish Rehum as Shimshai yn scrudeyr, as ny sheshaghyn oc, hie ad seose ayns siyr gys ny Hewnyn ec Jerusalem, as hug ad orroo scuirr, er niart as laue lajer.

²⁴ Eisht scuirr ad veih obbyr thie Yee, t’ec Jerusalem. Myr shen ve er ny lhiettal derrey’n nah vleïn jeh reill Darius ree Phersia.