Ezra 1 - Yn Vible Casherick 1775 1819

CAB. I

¹ Nish, ayns y chied vleïn jeh Cyrus ree Phersia (dy voddagh goo’n Chiarn liorish beeal Yeremiah v’er ny chooilleeney) hug eh ayns cree Cyrus ree Phersia, dy ockley magh trooid ooilley e reeriaght, as myrgeddin dy beagh eh ayns screeu, gra,

² Myr shoh ta Cyrus ree Phersia dy ghra, Ta’n Chiarn Jee t’ayns niau, er choyrt dooys ooilley reeriaghtyn ny ashoonyn shoh, as er choyrt currym orrym dy hroggal thie da ec Jerusalem, t’ayns Judah.

³ Quoi ta ny mast’ eu jeh ooilley e phobble? e Yee dy row mârish, as lhig da goll seose gys Jerusalem t’ayns Judah, as troggal thie yn Chiarn, Jee Israel, (eshyn y Jee) ta ayns Jerusalem.

⁴ As quoi-erbee, t’er-mayrn ayns ard erbee raad t’eh ny yoarree lhig da deiney yn ynnyd shen cooney ’choyrt da, lesh argid, as airh, as cooid, as maase, marish yn oural-arryltagh son thie’n Chiarn t’ayns Jerusalem.

⁵ Eisht hrog orroo ard-gheiney ayraghyn Yudah, as Venjamin, as ny saggyrtyn, as ny Leviteyn, mâroosyn ooilley, ny spyrrydyn oc va Jee er ghreinnaghey dy gholl seose, dy hroggal thie’n Chiarn, t’ayns Jerusalem.

⁶ As ren adsyn ooilley va mygeayrt-y-moo, nyn laueyn y niartaghey, lesh siyn argid, lesh airh, lesh cooid, as maase, lesh reddyn costal, harrish as erskyn ny va chebbit dy arryltagh.

⁷ Hug Cyrus y ree lesh magh myrgeddin siyn thie’n Chiarn, va Nebuchadnezzar er choyrt lesh ass Jerusalem, as er choyrt ad ayns thie e yeeghyn hene:

⁸ Eer ad shen hug Cyrus ree Phersia lesh magh, liorish laue Mithredath yn tashteyder, as ad y choontey magh da Sheshbazzar prince Yudah.

⁹ As shoh’n coontey oc; jeih claareeyn as feed dy airh, thousane claare dy argid, as nuy skynnyn as feed,

¹⁰ Jeih basonyn as feed dy airh, basonyn argid dy chummey sloo kiare cheead as jeih, as dy hiyn elley thousane.

¹¹ Va ooilley ny siyn airh as argid queig thousaneyn as kiare cheead: ad shoh ooilley hug Sheshbazzar lesh seose mâroosyn jeh’n chappeeys, v’er nyn goyrt lhieu seose veih Babylon gys Jerusalem.