Exodus 9 - Yn Vible Casherick 1775 1819

CAB. IX

¹ Eisht dooyrt y Chiarn rish Moses, Immee stiagh gys Pharaoh, as abbyr rish, Shoh myr ta’n Chiarn Jee ny Hebrewnee, gra, Lhig y raad da my phobble, dy vod ad mish y hirveish:

² Son my obbys oo kied daue goll, as my nee oo ad foast nyn lhiettal.

³ Cur-my-ner, ta laue’n Chiarn er dty ollagh ta ’sy vagher, er ny cabbil, er ny assylyn, er ny camelyn, er ny dew, as er ny kirree; bee murran feer dewil.

⁴ As nee’n Chiarn scarrey eddyr maase Israel, as maase Egypt, as cha vow veg baase jeh ooilley ny ta lesh cloan Israel.

⁵ As ren y Chiarn pointeil lheid y traa shen, gra, Mairagh nee’n Chiarn y red shoh ’sy cheer.

⁶ As laa-ny-vairagh ren y Chiarn yn red shen, as hooar ooilley ollagh Egypt baase: agh jeh ollagh chloan Israel cha dooar unnane baase.

⁷ As ren Pharaoh briaght, as cur-my-ner, cha row kione jeh maase ny Israeliteyn marroo. As va cree Pharaoh er ny chreoghey, as cha lhig eh yn raad da’n pobble.

⁸ As dooyrt y Chiarn rish Moses, as rish Aaron, Gow-jee lane nyn ghurn jeh leoie yn choirrey, as lhig da Moses spreih eh seose ’syn aer ayns shilley Pharaoh.

⁹ As hig eh dy ve joan myn ayns ooilley cheer Egypt, as bee eh ny askaid brishey magh ayns mammyn, er dooinney as er baagh, fud ooilley cheer Egypt.

¹⁰ As ghow ad leoie yn choirrey, as hass ad fenish Pharaoh; as ren Moses shen y spreih seose ’syn aer: as haink eh dy ve ny askaid, brishey magh ayns mammyn, er dooinney as er baagh.

¹¹ As cha dod ny fir-obbee shassoo kionfenish Moses, kyndagh rish yn askaid; son va’n askaid er ny fir-obbee, as er ooilley ny Egyptianee.

¹² As ren y Chiarn cree Pharaoh y chreoghey, as nagh dug eh geill daue, myr va’n Chiarn er hoilshaghey da Moses.

¹³ As dooyrt y Chiarn rish Moses, Irree dy moghey, as shass fenish Pharaoh, as abbyr rish, Shoh myr ta’n Chiarn, Jee ny Hebrewnee, gra, Lhig y raad da my phobble, dy vod ad jannoo shirveish dou.

¹⁴ Son ver-yms ec y traa shoh ooilley my ghourinyn er dty chree, as er dty harvaantyn, as er dty phobble, dy vod oo toiggal nagh vel my lheid’s ayns ooilley yn seihll.

¹⁵ Son nish, neem’s my laue y heeyney magh dy woalley uss, as dty phobble lesh y phaitt; as bee oo giarit jeh veih’n thalloo.

¹⁶ As dy jarroo firrinagh, er yn eer oyr shoh ta mee er dty hroggal seose, dy hoilshaghey aynyd my phooar, as dy vod m’ennym v’er ny ockley magh trooid ooilley’n theihll.

¹⁷ Myr t’ou foast goaill ort dy yannoo tranlaase er my phobble, nagh lhig oo yn raad daue:

¹⁸ Cur-my-ner, mysh y traa shoh mairagh, ver-yms neose sniaghtey-garroo trome, lheid as nagh row ayns Egypt, neayr’s ve ny ashoon, derrey’n traa shoh.

¹⁹ Shen-y-fa nish, cur magh dty haghteryn, as chaggil cooidjagh ooilley dty vaase, as ooilley ny t’ayd ’sy vagher: son dy chooilley ghooinney as baagh vees ry-gheddyn ’sy vagher, as nagh bee er nyn goyrt stiagh, hig y sniaghtey-garroo neose orroo, as yiow ad baase.

²⁰ Hug eshyn, ghow aggle roish goo’n Chiarn mastey sharvaantyn Pharaoh, er e vooinjer, as e ollagh dy ghoaill fastee ayns ny thieyn:

²¹ Agh daag eshyn nagh dug geill da goo yn Chiarn e vooinjer as e vaase ’sy vagher.

²² As dooyrt y Chiarn rish Moses, Sheeyn magh dty laue lesh niau, dy vod sniaghtey-garroo ve ayns ooilley cheer Egypt, er dooinney, as er baagh, as er ooilley lossreeyn y vagher, fud ooilley cheer Egypt.

²³ As heeyn Moses magh e lorg lesh niau: as hug y Chiarn taarnagh as sniaghtey-garroo, as roie yn tendreil rish y thalloo; as gheayrt y Chiarn neose sniaghtey-garroo er cheer Egypt.

²⁴ Myr shoh va sniaghtey-garroo ayn, yn aile as y sniaghtey-garroo roie fud-y-cheilley, feer atchimagh, cha row rieau y lheid ayns ooilley cheer Egypt neayr’s ve ny ashoon.

²⁵ As ren y sniaghtey-garroo stroie trooid magh slane cheer Egypt, ooilley ny va ’sy vagher, chammah dooinney as baagh: as hug y sniaghtey-garroo naardey ooilley glassyraght y thallooin, as vrish eh ooilley biljyn y vagheragh.

²⁶ Ny-lomarcan ayns cheer Ghoshen, raad va cloan Israel, cha row veg y sniaghtey-garroo.

²⁷ As hug Pharaoh fys er Moses as Aaron, as dooyrt eh roo, Ta mee er n’yannoo peccah yn cheayrt shoh: ta’n Chiarn cairagh, agh ta mish as my phobble mee-chrauee.

²⁸ Guee-jee gys y Chiarn, (son s’lioar eh,) nagh bee arragh dy haarneeyn agglagh, as sniaghtey-garroo ayn; as neem’s y raad y lhiggey diu, as cha n’uirree shiu ny sodjey.

²⁹ As dooyrt Moses rish, Cha leah’s veem’s er gholl magh ass yn ard-valley, nee’m my laueyn y hroggal seose gys y Chiarn: as nee’n taarnagh scuirr, chamoo vees sniaghtey-garroo arragh ayn; dy vod fys ve ayd dy nee lesh y Chiarn y thalloo.

³⁰ Agh er dty hon hene, as dty harvaantyn, ta fys aym, nagh jean shiu foast goaill aggle roish y Chiarn Jee.

³¹ As hie yn lieen as yn oarn naardey; son va’n oarn my-yeish, as y lieen my-rass.

³² Agh cha row’n churnagh ny’n shoggyl naardey, son cha row ad foast ass yn oashyr.

³³ As hie Moses magh ass yn ard-valley veih Pharaoh, as hrog eh seose e laueyn gys y Chiarn; as ghow ny taarneeyn as y sniaghtey-garroo fea, as cha row’n fliaghey er ny gheayrtey neose er y thalloo.

³⁴ As tra honnick Pharaoh, dy row’n fliaghey, as yn sniaghtey-garroo, as ny taarneeyn er scuirr, hie eh er e hoshiaght ayns peccah, as ren eh e chree y chreoghey eh hene as e harvaantyn.

³⁵ As va cree Pharaoh er ny chreoghey, chamoo lhiggagh eh yn raad da cloan Israel, myr va’n Chiarn er loayrt liorish Moses.