Exodus 8 - Yn Vible Casherick 1775 1819

CAB. VIII

¹ As loayr y Chiarn rish Moses, Immee gys Pharaoh, as abbyr rish, Myr shoh ta’n Chiarn gra, Lhig y raad da my phobble, dy vod ad mish y hirveish.

² As my obbys oo dy lhiggey’n raad daue, cur-my-ner, nee’m bwoalley ooilley dty ardjyn lesh froggyn.

³ As ver yn awin magh froggyn dy palchey, hed seose, as hig ad stiagh ayns dty hie, as ayns dty hiamyr-lhiabbagh, as er dty lhiabbee, as ayns thie dty harvaantyn, as er dty phobble, as ayns nyn ogheyn, as nyn siyn fuinnee.

⁴ As hig ny froggyn seose chammah ort hene, as er dty phobble, as er ooilley dty harvaantyn.

⁵ As dooyrt y Chiarn rish Moses, Abbyr rish Aaron, Sheeyn magh dty laue lesh dty lorg harrish ny strooanyn, harrish ny hawinyn, as harrish ny loghanyn, as cur er ny froggyn dy heet seose er thalloo Egypt.

⁶ As ren Aaron e laue y heeyney magh harrish ushtaghyn Egypt; as haink ny froggyn seose, as choodee ad thalloo Egypt.

⁷ As ren ny fir-obbee y lheid cheddin lesh nyn obbeeys, as hug ad lhieu froggyn er cheer Egypt.

⁸ Er shoh hug Pharaoh fys er Moses as Aaron, as dooyrt eh, Guee-jee gys y Chiarn, dy gow eh ersooyl ny froggyn voym, as voish my phobble; as lhig-yms y raad da’n pobble, dy hebbal oural gys y Chiarn.

⁹ As dooyrt Moses rish Pharaoh, Ayd’s dy row’n onnor dy oardaghey: cre’n traa neem’s guee ayns dty lieh hene, as lieh dty harvaantyn, as lieh dty phobble: dy stroie ny froggyn voïd’s, as veih dty hieyn, dy vod ad ve ynrycan ayns yn awin?

¹⁰ As dooyrt eshyn, Mairagh. As dooyrt eh, Dy row eh myr t’ou gra: dy vod fys ’ve ayd’s, nagh vel unnane erbee goll-rish y Chiarn y Jee ain.

¹¹ As hed ny froggyn voïd’s, as veih dty hieyn, as veih dty harvaantyn, as veih dty phobble; ayns yn awin ny-lomarcan vees ad.

¹² As hie Moses as Aaron magh veih Pharaoh; as ren Moses padjer gys y Chiarn, kyndagh rish ny froggyn v’eh er choyrt noi Pharaoh.

¹³ As ren y Chiarn er raa Voses, as hooar ny froggyn baase ayns ny thieyn, ayns ny baljyn-cheerey, as ny magheryn.

¹⁴ As ren ad chaglym ad cooidjagh ayns dashyn, as va soar breinn jeu fud y cheer.

¹⁵ Agh tra honnick Pharaoh, dy row couyr, ren eh e chree y chreoghey, as cha dug eh clashtyn daue; myr va’n Chiarn er ghra.

¹⁶ As dooyrt y Chiarn rish Moses, Abbyr rish Aaron, Sheeyn magh dty lorg, as bwoaill joan y thallooin, dy vod eh cheet dy ve meeylyn, trooid magh ooilley cheer Egypt.

¹⁷ As ren ad shen; son heeyn Aaron magh e laue lesh e lorg, as woaill eh joan ny hooirey, as haink eh dy ve meeylyn, er dooinney as baagh: haink ooilley joan y thallooin dy ve meeylyn trooid magh ooilley cheer Egypt.

¹⁸ As ghow ny fir-obbee orroo y lheid cheddin y yannoo, lesh nyn obbeeys, dy choyrt magh meeylyn, agh cha daink eh lhieu: myr shen va meeylyn er dooinney as baagh.

¹⁹ Eisht dooyrt ny fir-obbee rish Pharaoh, mair Yee shoh: agh va cree Pharaoh er ny chreoghey, as cha dug eh clashtyn daue myr va’n Chiarn er ghra.

²⁰ As dooyrt y Chiarn rish Moses, Irree traa mie moghrey, as shass kiongoyrt rish Pharaoh; (cur-my-ner, t’eh cheet magh gys yn ushtey,) as abbyr rish, Myr shoh ta’n Chiarn gra, Lhig y raad da my phobble, dy vod ad mish y hirveish.

²¹ Er-nonney, mannagh jean oo yn raad y lhiggey da my phobble, cur-my-ner, ver-yms swarmyn dy veishteigyn ort hene, as er dty harvaantyn, as er dty phobble, as ayns dty hieyn: as bee thieyn ny Egyptianee lane lesh swarmyn-beishteig, as myrgeddin y thalloo t’ad er.

²² As neem’s foayr y hoilshaghey er y laa shen da thalloo Ghoshen, ayn ta my phobble cummal, nagh bee veg ny swarmyn-beishteig ayns shen; dy vod fys ’ve ayd’s dy nee mish y Chiarn ayns ooilley’n seihll.

²³ As ver-yms scarrey eddyr y pobble aym’s, as y pobble ayd’s; mairagh vees yn cowrey shoh.

²⁴ As ren y Chiarn myr shen, as haink swarm atchimagh dy veishteigyn stiagh ayns thie Pharaoh, as ayns thieyn e harvaantyn, as ayns ooilley cheer Egypt: va’n slane cheer breinn, kyndagh rish ny swarmyn dy veishteigyn.

²⁵ As hug Pharaoh fys er Moses, as er Aaron, as dooyrt eh, Immee-jee, cheb-jee oural gys y Jee eu ayns y cheer shoh.

²⁶ As dooyrt Moses, Cha jig lhien dy yannoo myr shen; son nee mayd chebbal eajeeys ny Egyptianee gys y Chiarn y Jee ain: cur-my-ner, my nee mayd chebbal ayns oural eajeeys ny Egyptianee kiongoyrt rish ny sooillyn oc, nagh jean ad nyn glaghey?

²⁷ Hem mayd jurnah three laa stiagh ’syn aasagh, as nee mayd oural ’hebbal gys y Chiarn y Jee ain, myr ver eh currym orrin.

²⁸ As dooyrt Pharaoh, Lhig-ym y raad diu, dy vod shiu ouralley gys y Chiarn y Jee eu ayns yn aasagh; agh ny gow shiu foddey jeh: guee shiu er my hon.

²⁹ As dooyrt Moses, Cur-my-ner, Ta mee goll magh voïd, as guee-ym gys y Chiarn, dy vod ny swarmyn-beishteig goll ersooyl veih Pharaoh, veih e harvaantyn, as veih e phobble, mairagh; agh ny lhig da Pharaoh dellal ny sodjey dy molteyragh, ayns gyn lhiggey da’n pobble goll roue, dy hebbal oural da’n Chiarn.

³⁰ As hie Moses magh veih Pharaoh, as ghuee eh gys y Chiarn.

³¹ As ren y Chiarn cordail rish raa Voses: as scugh eh ny swarmyn-beishteig voish Pharaoh, voish e harvaantyn, as voish e phobble: cha row unnane faagit.

³² Agh ren Pharaoh e chree y chreoghey yn cheayrt shoh myrgeddin, chamoo lhiggagh eh yn raad da’n pobble.