Exodus 6 - Yn Vible Casherick 1775 1819

CAB. VI

¹ Eisht dooyrt y Chiarn rish Moses, Nish nee oo fakin, cre nee’m y yannoo rish Pharaoh: son lesh laue lajer lhiggee eh yn raad daue, as lesh laue niartal eh hene nee geiyrt ad magh ass e heer.

² As loayr Jee rish Moses, as dooyrt eh rish, Mish y Chiarn:

³ As hoilshee mee mee-hene da Abraham, da Isaac, as da Jacob, liorish ennym yn jee ooilley-niartal, agh liorish my ennym JEHOVAH cha row enney oc orrym.

⁴ As ta mee myrgeddin er niartaghey my chonaant roosyn, dy derrin daue cheer Chanaan, cheer nyn droailtys, ayn v’ad nyn yoarreeyn.

⁵ As ta mee myrgeddin er chlashtyn osnaghyn chloan Israel, ta ny Egyptianee freayll fo bondiaght: as ta mee er chooinaghtyn er my chonaant.

⁶ Shen-y-fa, abbyr rish cloan Israel, Mish y Chiarn, as ver-ym lhiam shiu magh veih fo errey ny Egyptianee, as livrey-ym shiu veih’n bondiaght oc: as lesh roih sheeynt magh, as lesh briwnyssyn trome, ver-ym feaysley diu.

⁷ As goym shiu son pobble dou hene, as beem’s my Yee diuish: as bee fys eu, dy nee mish y Chiarn y Jee euish, ta coyrt livrey-ys diu veih bondiaght ny Egyptianee.

⁸ As ver-yms lhiam shiu stiagh gys y cheer, my-e-chione ren mee breearrey dy choyrt eh da Abraham, as da Isaac, as da Jacob: as ver-yms diuish eh son eiraght: mish y Chiarn.

⁹ As shoh myr loayr Moses rish cloan Israel: agh cha dug ad geill da Moses, trooid sproght nyn gree, as y vondiaght dewil.

¹⁰ As loayr y Chiarn rish Moses, gra,

¹¹ Immee stiagh, as loayr rish Pharaoh ree Egypt, dy chur kied da cloan Israel goll roue ass y cheer echey.

¹² As loayr Moses fenish y Chiarn, gra, Cur-my-ner, cha vel cloan Israel er n’eaishtagh rhym, kys eisht ver Pharaoh clashtyn dooys, ta my ghooinney dy hengey moal?

¹³ As loayr y Chiarn rish Moses, as rish Aaron, as hug eh currym lhieu gys cloan Israel, as gys Pharaoh ree Egypt, cloan Israel dy gholl magh ass cheer Egypt.

¹⁴ Ad shoh king lught-thieyn nyn ayraghyn: Cloan Reuben mac shinney Israel; Hanoch, as Pallu, Hezron, as Carmi: ad shoh lught-thie Reuben.

¹⁵ As mec Simeon; Jemuel, as Jamin, as Ohad, as Jachin, as Zohar, as Shaul mac ben va ny Chanaanite, ad shoh lught-thie Simeon.

¹⁶ As shoh enmyn mec Levi, cordail rish nyn sheelogheyn; Gershon, as Kohath, as Merari: as va bleeantyn bea Levi shey-feed as shiaght bleeaney jeig.

¹⁷ Mec Ghershon; Libni, as Shimi, cordail rish nyn lught-thie.

¹⁸ As mec Kohath; Amram, as Izhar, as Hebron, as Uzziel: as bleeantyn bea Kohath v’ad shey-feed as three bleeaney jeig.

¹⁹ As mec Merari; Mahali, as Mushi; shoh lught-thie Levi, cordail rish ny sheelogheyn oc.

²⁰ As phoose Amram Jochebed shuyr e ayrey; as va echey r’ee Aaron as Moses: As va bleeantyn eash Amram shey-feed as shiaght bleeaney jeig.

²¹ As mec Izhar; Korah, as Nepheg, as Zichri.

²² As mec Uzziel; Michael, as Elzaphan, as Zithri.

²³ As ghow Aaron Elisheba, inneen Amminadab, shuyr Naashon, son ben, as dymmyrk ee da, Nadab as Abihu, Eleazar, as Ithamar.

²⁴ As mec Korah; Assir as Elkanah, as Abiasaph, shoh lught-thie ny Korhiteyn.

²⁵ As phoose Eleazar mac Aaron unnane jeh inneenyn Putiel; as va Phinehas eck rish; ad shoh king ayraghyn ny Leviteyn, cordail rish nyn lught-thie.

²⁶ Ad shoh yn Aaron as Moses cheddin, roo dooyrt y Chiarn, Cur-jee lhieu cloan Israel magh ass Egypt, cordail rish nyn sheshaghtyn-caggee.

²⁷ Shoh adsyn loayr rish Pharaoh Ree Egypt, dy chur lhieu cloan Israel magh ass Egypt, shoh’n Moses as yn Aaron cheddin.

²⁸ As haink eh gy-kione, er y laa loayr y Chiarn rish Moses, ayns cheer Egypt,

²⁹ Dy ren y Chiarn loayrt rish Moses, gra, Mish y Chiarn: abbyr uss rish Pharaoh ree Egypt ooilley ny ta mee er choyrt royd.

³⁰ As dooyrt Moses fenish y Chiarn, Cur-my-ner, ta mee moandagh ayns glare, as kys ver Pharaoh clashtyn dou?