Exodus 4 - Yn Vible Casherick 1775 1819

CAB. IV

¹ As dreggyr Moses, as dooyrt eh, Cur-my-ner, cha jean ad m’y chredjal, chamoo ver ad geill da my ghoan: son jir ad, Cha vel y Chiarn er hoilshaghey eh hene dhyt’s.

² As dooyrt y Chiarn rish, Cre shen t’ayd ayns dty laue? As dooyrt eh, Lorg.

³ As dooyrt eshyn, Ceau voïd eh er y thalloo; as cheau eh er y thalloo eh, as haink eh dy ve ny ard-nieu: as roie Moses er-chea voish.

⁴ As dooyrt y Chiarn rish Moses, Sheeyn magh dty laue, as gow eh er e arbyl. As heeyn eh magh e laue, as ghow eh greme er, as ve reesht ny lorg ayns e laue.

⁵ Dy vod ad credjal, dy vel Chiarn Jee nyn ayraghyn, Jee Abraham, Jee Isaac, as Jee Yacob, er hoilshaghey eh hene dhyt’s.

⁶ As marish shoh dooyrt y Chiarn rish; Cur dty laue nish ayns dty oghrish; as hug eh e laue ayns e oghrish; as tra ghow eh ass eh, cur-my-ner, va e laue louraanagh, cha gial as sniaghtey.

⁷ As dooyrt eh, Cur dty laue reesht ayns dt’oghrish. As hug eh reesht e laue ayns e oghrish, as hayrn eh eh ass e oghrish, as cur-my-ner, ve er ny chaghlaa reesht, myr yn eill elley.

⁸ As hig eh gy-kione, mannagh jean ad uss y chredjal, ny geill y choyrt da goo yn chied chowrey, dy gred ad bree yn nah chowrey.

⁹ As hig eh gy-kione, mannagh gred ad yn daa chowrey shoh, ny geill y choyrt da dty choraa, dy drog oo jeh ushtey ny hawin, as dy deayrt oo eh er y thalloo chirrym: as hig yn ushtey t’ou dy ghoaill ass yn awin, dy ve fuill er y thalloo chirrym.

¹⁰ As dooyrt Moses rish y Chiarn, O my Hiarn, cha nee dooinney mee dy ghlare floaoil, chamoo roish, ny erreish dhyt loayrt rish dty harvaant: agh ta mee moal ayns glare as chengey.

¹¹ As dooyrt y Chiarn rish, Quoi t’er chummey beeal dooinney? ny quoi t’er n’yannoo yn bouyr, ny’n balloo? ny’n fakin, ny’n doal? nagh nee mish, yn Chiarn?

¹² Immee nish, er-y-fa shen, as beem’s lesh dty veeal, as ynsee-ym dhyt cre nee oo gra.

¹³ As dooyrt eh, O my Hiarn, cur dty haghteraght, ta mee guee ort, liorishyn ta ny s’fondagh er y hon.

¹⁴ As va corree’n Chiarn er ny vrasnaghey noi Moses, as dooyrt eh, Nagh vel Aaron y Levite dty vraar? ta fys aym dy vel y gioot echeysyn dy loayrt dy mie. As cur-my-ner myrgeddin, t’eh nish er e raad dy heet dty whail: As tra hee-ys eh oo, bee boggey er e chree.

¹⁵ As nee oo loayrt rishyn, as ver oo roish cre dy ghra: as beem’s marish dty veeal’s, as y beeal echeysyn, as ynsee-ym diu cre nee shiu y yannoo:

¹⁶ As nee eshyn loayrt ayns dty lieh rish y pobble: as bee eh dhyt’s, eer bee eshyn dhyt’s ayns ynnyd beeal, as bee uss dasyn ayns ynnyd Yee.

¹⁷ As nee uss goaill yn lorg shoh ayns dty laue, lesh nee oo mirrilyn y yannoo.

¹⁸ As jimmee Moses, as hie eh reesht gys Jethro e ayr-’sy-leigh, as dooyrt eh rish; Lhig y raad dou, ta mee guee ort, dy hyndaa reesht gys my vraaraghyn t’ayns Egypt; dy yeeaghyn vel ad foast bio. As dooyrt Jethro rish Moses, Immee, as shee dy row mayrt.

¹⁹ As dooyrt y Chiarn rish Moses ayns Midian, Immee, gow reesht gys Egypt; son ta ooilley ny deiney marroo va shirrey dty vioys.

²⁰ As ghow Moses e ven, as e vec, as hug eh ad er assylyn, as hie eh reesht gys cheer Egypt. As ghow Moses lorg Yee ayns e laue.

²¹ As dooyrt y Chiarn rish Moses; Tra t’ou er gholl, as er roshtyn gys Egypt, jeeagh dy jean oo fenish Pharaoh, ooilley ny yindyssyn shen ta mee er choyrt ayns pooar dty laue: agh neem’s yn chree echeysyn y chreoghey, nagh lhig eh yn raad da’n pobble.

²² As nee oo gra rish Pharaoh; Myr shoh ta’n Chiarn dy ghra, Ta Israel yn mac aym’s, eer my vac shinney.

²³ As ta mee gra rhyt; Lhig y raad da my vac, dy vod eh mish y hirveish, as my t’ou gobbal dy lhiggey’n raad da, cur-my-ner, marr-yms dty vac, eer dty vac shinney.

²⁴ As haink eh gy-kione er y raad, myr v’eh goaill aaght, dy dug y Chiarn meeiteil da, as chiare eh dy varroo eh.

²⁵ Er shoh ghow Zipporah skynn dy chlagh gyere, as ren ee giarey-chymmylt e mac; as hilg ee eh ec e chassyn, as dooyrt ee, T’ou uss dy jarroo er ve dty ghooinney folley dooys.

²⁶ Myr shen lhig eh yn raad da; as dooyrt ee Sheshey folley oo, er coontey yn giarey-chymmylt.

²⁷ As dooyrt y Chiarn rish Aaron, Immee gys yn aasagh dy veeiteil Moses. As hie eh, as ren eh meeiteil eh er cronk Yee, as phaag eh eh.

²⁸ As dinsh Moses da Aaron ooilley goan y Chiarn, v’er choyrt eh er chaghteraght; as ooilley ny cowraghyn, phoint eh da dy yannoo.

²⁹ As hie Moses as Aaron, as haggil ad cooidjagh ooilley shanstyr chloan Israel.

³⁰ As ren Aaron fockley magh ooilley ny goan va’n Chiarn er loayrt rish Moses, as ren eh ny mirrilyn ayns shilley’n pobble.

³¹ As ren y pobble credjal: as tra cheayll ad dy row yn Chiarn er yeeaghyn er cloan Israel, as dy row eh er vakin yn seaghyn oc, eisht chroym ad nyn ghing, as ren ad ooashlaghey.