Exodus 16 - Yn Vible Casherick 1775 1819

CAB. XVI

¹ As ghow ad nyn yurnah veih Elim, as haink ooilley pobble Israel gys faasagh Sin, ta eddyr Elim as Sinai, er y wheiggoo laa yeig, jeh’n nah vee, neayr’s haink ad ass cheer Egypt.

² As ren slane chaglym-cooidjagh chloan Israel loayrt dy jymmoosagh noi Moses as Aaron ayns yn aasagh.

³ As dooyrt cloan Israel roo, Dy baillish Jee, dy beagh shin er gheddyn baase liorish laue yn Chiarn ayns cheer Egypt, raad hoie shin liorish ny pooiyt-feill, as raad va nyn saie arran ain dy ee: son ta shiu er chur lhieu shin stiagh ’syn aasagh shoh, dy chur naardey yn slane cheshaght shoh lesh accryssyd.

⁴ Er shoh dooyrt y Chiarn rish Moses, Cur-my-ner, deayrt-yms neose arran veih niau er nyn son; as hed y pobble magh, as nee ad chaglym wheesh shen dy chooilley laa, dy voddym ad y phrowal, jean ad gimmeeaght ayns my leigh, mannagh jean.

⁵ As hig eh gy-kione, dy jean ad er y cheyoo laa gaarlaghey shen ver ad lhieu stiagh; as bee eh ghaa wheesh as t’ad dy haglym gour y laa.

⁶ As dooyrt Moses as Aaron rish ooilley cloan Israel, Ec yn astyr, yiow shiu eisht fys, dy vel y Chiarn er chur lesh shiuish magh ass cheer Egypt.

⁷ As ’sy voghrey, eisht nee shiu fakin gloyr y Chiarn; son dy vel eh clashtyn y plaiynt eu noi’n Chiarn; as cre ta shinyn dy vel shiu girree magh nyn ’oï?

⁸ As dooyrt Moses, Shoh myr vees eh, tra ver y Chiarn diuish ec yn astyr feill dy ee, as ayns y voghrey nyn saie arran; son dy vel y Chiarn clashtyn y plaiynt ta shiu jannoo n’oï? as cre ta shinyn? cha nee noi ainyn ta’n plaiynt eu; agh noi’n Chiarn.

⁹ As loayr Moses rish Aaron, Abbyr rish slane sheshaght chloan Israel, Tar-jee kiongoyrt rish y Chiarn, son t’eh er chlashtyn y plaiynt eu.

¹⁰ As haink eh gy-kione, myr va Aaron loayrt rish ooilley co-chruinnaght chloan Israel, dy yeeagh ad lesh yn aasagh, as cur-my-ner, dy ren gloyr y Chiarn soilshean ’sy vodjal.

¹¹ As loayr y Chiarn rish Moses, gra,

¹² Ta mee er chlashtyn trughanys chloan Israel: loayr roo, gra, Fastyr yiow shiu feill dy ee, as ’sy voghrey yiow shiu nyn saie arran: as bee fys eu, dy nee mish y Chiarn y Jee eu.

¹³ As haink eh gy-kione, dy daink ny quaylyn ’syn astyr, as choodee ad y champ: as ’sy voghrey va’n druight ny lhie ooilley mygeayrt y champ.

¹⁴ As tra va’n druight er droggal, cur-my-ner, er eaghtyr yn aasagh va grine beg runt, myn myr y lieh-rio, er y thalloo.

¹⁵ As tra honnick cloan Israel eh, dooyrt ad ry-cheilley, Manna? [cre shoh?] son cha row fys oc cre ve. As dooyrt Moses roo, Shoh’n arran ta’n Chiarn er choyrt diuish dy ee.

¹⁶ Shoh’n red ta’n Chiarn er harey, lhig da dy chooilley ghooinney chaglym eh rere myr ee-ys eh: omer da dy chooilley ghooinney, cordail rish nyn earroo; lhig da dagh dooinney goaill cordail rish y vooinjer ta ayns e chabbane.

¹⁷ As ren cloan Israel shen, as haggil paart ny smoo, as paart ny sloo.

¹⁸ As tra howse ad eh lesh omer, cha row veg harrish echeysyn ren mooarane y haglym, as ersyn haggil cooid y veggan, cha row dolley: ren dy chooilley ghooinney chaglym rere feme e hie.

¹⁹ As dooyrt Moses, Ny lhig da fooilliagh ve ec dooinney erbee derrey’n voghrey.

²⁰ Ny-yeih cha dug ad geill da Moses: agh hasht paart jeu fooilliagh jeh derrey’n voghrey, ren croo, as ve breinn: as va Moses corree roo.

²¹ As ren ad eh y haglym dy chooilley voghrey, dagh dooinney cordail rish e vaarail; as lesh chiass ny greiney, ren eh lheïe.

²² As haink eh gy-kione, dy heigh ad er y cheyoo laa ghaa wheesh dy arran, daa omer son dooinney: as haink ooilley ard-gheiney’n pobble, as dinsh ad shoh da Moses.

²³ As dooyrt eh roo, Shoh ny dooyrt y Chiarn; Mairagh feailley’n doonaght casherick gys y Chiarn: fuin-jee shen ta shiu ry-hoi fuinney jiu, as broie-jee shen ta shiu ry-hoi broie: as my vees fooilliagh erbee eu, tasht-jee eh derrey’n voghrey.

²⁴ As hasht ad eh derrey’n voghrey, myr doardee Moses; as cha ren eh breinaghey, chamoo va crooag ayn.

²⁵ As dooyrt Moses roo, Ee-jee shoh jiu; son shoh laa doonee yn Chiarn: jiu cha vow shiu eh ’sy vagher.

²⁶ Rish shey laa nee shiu chaglym eh, agh er y chiaghtoo laa ta’n doonaght, cha bee veg jeh ry-gheddyn.

²⁷ As haink eh gy-kione dy jagh shiartanse jeh’n pobble magh er y chiaghtoo laa dy haglym, as cha dooar ad veg.

²⁸ As dooyrt y Chiarn rish Moses, Caïd obbys shiu biallys da my haraghyn, as my leighyn?

²⁹ Gow-jee tastey, son dy vel y Chiarn er choyrt diu yn doonaght, t’eh er-y-fa shen coyrt diu er y cheyoo laa arran daa laa: fuirree-jee dy chooilley ghooinney sthie, ny lhig da fer erbee goll magh er y chiaghtoo laa.

³⁰ Myr shen ghow’n pobble fea er y chiaghtoo laa.

³¹ As ren cloan Israel genmys eh Manna: as ve goll-rish rass coriander, gial; as va’n blass echey jeh berreen jeant lesh mill.

³² As dooyrt Moses, Shoh’n red ta’n Chiarn dy harey, lhieen-jee omer jeh, dy ve tashtit son ny sheelogheyn eu; dy vod adsyn fakin yn arran lesh ren mee shiu y veaghey ’syn aasagh, tra hug mee lhiam shiu magh ass cheer Egypt.

³³ As dooyrt Moses rish Aaron, Gow saagh, as cur lane omer dy vanna ayn, as tasht-jee eh seose kiongoyrt rish y Chiarn, dy ve freilt son ny sheelogheyn eu.

³⁴ Myr doardee yn Chiarn da Moses, myr shen hug Aaron seose eh kiongoyrt rish arg yn eanish, dy ve freilt.

³⁵ As d’ee cloan Israel manna rish da-eed bleïn, derrey haink ad gys cheer va cummaltee ayn; d’ee ad manna, derrey haink ad gys slystyn cheer Chanaan.

³⁶ Nish ta omer yn jeihoo ayrn jeh Ephah.