Exodus 1 - Yn Vible Casherick 1775 1819

CAB. I

¹ Nish, shoh enmyn chloan Israel haink sheese gys Egypt; dy chooilley ghooinney as e lught-thie haink marish Jacob.

² Reuben, Simeon, Levi as Judah.

³ Issachar, Zebulun, as Benjamin.

⁴ Dan as Naphtali, Gad as Asher.

⁵ As va ooilley ny anmeenyn haink veih meeghyn Yacob, three-feed as jeih: son va Joseph hannah ayns Egypt.

⁶ As hooar Joseph baase as ooilley e vraaraghyn, as yn slane sheeloghe shen.

⁷ As va cloan Israel sluightoil, as ren ad bishaghey dy mooar, as daase ad ayns earroo, as haink ad dy ve erskyn-towse pooaral: as lhieen ad y cheer.

⁸ Nish, hrog ree noa ayns Egypt, nagh row enney echey er Joseph.

⁹ As dooyrt eh rish e phobble, Cur-my-ner ta pobble cloan Israel ny shlee, as ny s’pooaral na shinyn.

¹⁰ Tar-jee; lhig dooin dellal roo dy tastagh: er-aggle dy jean ad bishaghey, as dy jig eh gy-kione, tra nee caggey brishey magh, dy shassee ad lesh nyn noidyn, as dy jean ad caggey nyn ’oï, as myr shen dy jean ad cosney roue ass y cheer.

¹¹ Ren ad, er-y-fa shen, soiaghey harrystoo oaseiryn, dy reayll ad fo lesh erraghyn. As ren ad troggal da Pharaoh ard-valjyn gour tashtaghyn-caggee, Pithom as Rahamses.

¹² Agh myr smoo v’ad freilt fo, wheesh shen smoo vishee ad, as daase ad ayns earroo. As v’ad seaghnit mychione cloan Israel.

¹³ As dreill ny Egyptianee cloan Israel fo shirveish dewil.

¹⁴ As hug ad orroo dy ve skee jeh nyn mioys lesh bondiaght creoi, ayns morter, as ayns brick, as ayns dy chooilley cheint dy obbyr vagheragh; dy chooilley vonney dy hirveish chiangle ad orroo, ve lesh dewlys.

¹⁵ As loayr ree Egypt rish ny mraane-reaylt Hebrewnagh (va ennym y derrey yeh Shiphrah, as ennym y jeh elley Puah.)

¹⁶ As dooyrt eh, Tra ta shiu livrey mraane ny Hebrewnee, as ad er jeet gys y traa; my she lhiannoo-mac t’ayn, marr-jee eh; agh my she inneen, freill-jee bio ee.

¹⁷ Agh va ny mraane-reaylt ayns aggle Yee, as cha ren ad myr doardee ree Egypt daue, agh haue ad ny lhiennoo-mec bio.

¹⁸ As hug ree Egypt fys er ny mraane-reaylt, as dooyrt eh roo, Cre’n-fa ta shiu er n’yannoo myr shoh, as er hauail bio ny lhiennoo-mec?

¹⁹ As dooyrt ny mraane-reaylt rish Pharaoh, Er-yn-oyr nagh vel mraane ny Hebrewnee goll-rish mraane ny Egyptianee: son t’ad bioyr, as t’ad livreit roish my ta ny mraane-reaylt roshtyn.

²⁰ Ren Jee, er-y-fa shen ny mraane-reaylt y vannaghey; as ren y pobble bishaghey, as daase ad feer phooaral.

²¹ As haink eh gy-kione, er-yn-oyr dy row ny mraane-reaylt ayns aggle Yee, dy ren eh yn lught-thie oc y vannaghey.

²² As hug Pharaoh currym er ooilley e phobble, gra, Dy chooilley lhiannoo-mac hig son y theihll nee shiu ceau ’syn awin, agh dy chooilley inneen nee shiu sauail bio.