Ephesianee 6 - Yn Vible Casherick 1775 1819

CAB. VI

¹ Chloan, cur-jee biallys da nyn ayraghyn ayns y Chiarn: son ta shoh cairagh.

² Cur arrym da dty ayr as da dty voir, (shoh yn chied anney lesh gialdynys)

³ Dy vod eh ve dy mie mayrt, as dy vod oo ve beayn er y thalloo.

⁴ As shiuish ayraghyn, ny brasnee-jee nyn gloan gys corree: agh trog-jee ad ayns ynsagh as aggle y Chiarn.

⁵ Shiuish harvaantyn, bee-jee biallagh dauesyn ta nyn mainshteryn cordail rish yn eill, lesh aggle as arrym, ayns ynrickys cree, myr da Creest:

⁶ Cha nee lesh shirveish-sooilley, myr dy wooiys deiney, agh myr sharvaantyn Chreest, jannoo aigney Yee veih nyn gree;

⁷ Lesh aigney-mie jannoo nyn obbyr, myr da’n Chiarn, as cha nee da deiney:

⁸ Toiggal shoh, mie erbee dy vel dooinney dy yannoo, lheid cheddin yiow eh veih’n Chiarn, edyr eh ve sharvaant ny seyr.

⁹ As shiuish vainshteryn, jean-jee lheid cheddin roosyn, shaghney baggyrt: toiggal shoh, dy vel mainshter eu hene myrgeddin ayns niau, chamoo t’eh jannoo soiagh jeh persoonyn.

¹⁰ Er-jerrey, my vraaraghyn, bee-jee niartal ayns y Chiarn, as ayns pooar e hroshid.

¹¹ Cur-jee erriu slane eilley Yee, dy vod shiu ve abyl dy hassoo noi kialgyn y drogh-spyrryd.

¹² Son cha vel shin gleck noi feill as fuill, agh noi ard-reiltee, noi pooaraghyn, noi leeideilee dorraghys y theihll shoh, noi olkys spyrrydoil ayns ny ardjyn er-nyn-skyn.

¹³ Shen-y-fa gow-jee hiu slane eilley Yee, dy vod shiu ve abyl dy hassoo magh ayns y laa seaghnagh, as lurg diu ve er yannoo ooilley, dy hassoo.

¹⁴ Shass-jee er-y-fa shen lesh nyn meeghyn kianlt mygeayrt lesh yn irriney, as erriu yn breast-plate dy chairys;

¹⁵ As nyn gassyn coodit lesh arryltys son y sushtal dy hee.

¹⁶ Harrystoo ooilley, gow-jee yn shleiy dy chredjue, dy vod shiu lesh shen ve abyl dy vooghey ooilley sideyn aileagh y drogh-er.

¹⁷ As gow-jee yn helmet dy haualtys, as cliwe yn Spyrryd, shoh ta Goo Yee:

¹⁸ Guee dy kinjagh lesh dy chooilley phadjer as accan ayns y Spyrryd, as gys shoh er nyn arrey lesh slane tannaghtyn as aghin son ooilley ny nooghyn;

¹⁹ As er my hon’s er-lheh, dy vod glare ve er ny choyrt dou, dy voddym fosley my veeal dy dunnal, dy hoilshaghey folliaght y tushtal;

²⁰ Er y choontey echey ta mee my haghter ayns geulaghyn: er y hon dy voddym loayrt dy dunnal, myr lhisin loayrt.

²¹ Agh dy vod fys ve euish neesht er y stayd aym’s, as cre ta mee mysh, nee Tychicus, braar graihagh, as shirveishagh firrinagh ayns y Chiarn, slane coontey choyrt diu:

²² Eh ta mee er choyrt er chaghteraght hiu son yn oyr cheddin, dy vod fys ve eu cre ta shinyn mysh, as dy voddagh eshyn ny creeaghyn eu y gherjaghey.

²³ Shee dy row gys ny braaraghyn, as graih marish credjue veih Jee yn Ayr as y Chiarn Yeesey Creest.

²⁴ Grayse dy row mâroosyn ooilley shynney lhieu yn Chiarn Yeesey Creest ayns ynrickys. Amen.