Ephesianee 1 - Yn Vible Casherick 1775 1819

CAB. I

¹ Paul ny ostyl dy Yeesey Creest, liorish aigney Yee, gys ny nooghyn t’ayns Ephesus, as hucsyn ta credjal ayns Creest Yeesey:

² Grayse dy row hiu, as shee veih Jee nyn Ayr, as veih’n Chiarn Yeesey Creest.

³ Bannit dy row Jee as Ayr nyn Jiarn Yeesey Creest, t’er vannaghey shin lesh dy chooilley vannaght spyrrydoil ayns nheeghyn flaunyssagh ayns Creest:

⁴ Cordail myr t’eh er reih shinyn aynsyn, roish my va’n seihll er ny chroo, dy beagh shin casherick as gyn loght kiongoyrt rishyn ayns graih:

⁵ T’er chiarail shin gys doltanys cloan liorish Yeesey Creest da hene, cordail rish taitnys e aigney-mie hene,

⁶ Gys moylley gloyr e ghrayse, liorish t’eh er n’yannoo soiagh j’in ayns e er-graihagh:

⁷ Aynsyn ta feaysley ain trooid e uill, leih peccaghyn, cordail rish berchys e ghrayse;

⁸ T’eh er lhieeney orrin dy palchey ayns dy chooilley chreenaght as tushtey,

⁹ As er hoilshaghey dooin folliaght e aigney hene, cordail rish e haitnys mie, ren eh ’chiarail ayn hene:

¹⁰ Ayns coorse slane towse ny hearishyn, dy voddagh eh chaglym cooidjagh ayns unnane dy chooilley nhee ayns Creest, chammah ny t’ayns niau as er y thalloo, dy jarroo aynsyn:

¹¹ Ayn myrgeddin ta shin er gheddyn eiraght, myr va shin pointit ro-laue cordail rish y chiarail echeysyn ta gobbraghey dy chooilley nhee lurg coyrle e aigney hene:

¹² Dy beagh shinyn, ren hoshiaght treishteil ayns Creest, gys moylley e ghloyr.

¹³ Aynsyn ren shiuish myrgeddin treishteil, lurg diu v’er chlashtyn goo yn irriney, sushtal y taualtys eu: aynsyn myrgeddin erreish diu v’er chredjal, va shiu er nyn gowraghey lesh y Spyrryd casherick shen dy ghialdynys,

¹⁴ Ta eearlys yn eiraght ain, derrey va price yn chionniaght eeckit, gys moylley e ghloyr.

¹⁵ Shen-y-fa, erreish dou v’er chlashtyn jeh’n chredjue euish ayns y Chiarn Yeesey, as y ghraih eu gys ooilley ny nooghyn,

¹⁶ Cha vel mee scuirr dy chur booise er nyn son, jannoo imraa j’iu ayns my phadjeryn;

¹⁷ Dy jean Jee nyn Jiarn Yeesey Creest, Ayr ny ghloyr, cur diuish yn Spyrryd dy chreenaght as dy hoilshey flaunyssagh, dy choyrt enney er:

¹⁸ Liorish sooillyn nyn dushtey v’er ny hoilshaghey; dy vod shiu toiggal cre ta treishteil yn eam echey, as cre ta berchys gloyr e eiraght ayns ny nooghyn,

¹⁹ As cre ta mooads erskyn towse e phooar dooinyn ta credjal, cordail rish bree e phooar niartal;

²⁰ Ren eh gobbraghey ayns Creest, tra hrog eh eh veih ny merriu, as hoie eh eh ec e laue yesh hene ayns ny ynnydyn flaunyssagh,

²¹ Foddey erskyn dy chooilley ard-ooashley, as pooar, as niart, as reill, as dy chooilley ennym ta enmyssit, cha nee ynrycan ’sy theihll shoh, agh myrgeddin ayns shen ta ry-heet:

²² As ta er choyrt dy chooilley nhee fo e chassyn, as hug eh eh dy ve kione harrish dy chooilley nhee da’n agglish,

²³ Ta shen yn corp echey, ta dy slane jeant magh liorishyn ta lhieeney ooilley ayns ooilley.