Ecclesiastes 8 - Yn Vible Casherick 1775 1819

CAB. VIII

¹ Quoi ta myr yn dooinney creeney? as quoi ta toiggal bun y chooish? ta keeayl dooinney cur er e eddin dy hoilshean, as bee dunnallys e oaie er ny niartaghey.

² Ta mee dy dty choyrlaghey dy reayll sarey’n ree, as shen er coontey’n loo t’ou er ghoaill gys Jee.

³ Ny bee siyragh dy gholl ass e hilley: ny jean shassoo er drogh chooish; son t’eshyn jannoo cre-erbee saillish hene.

⁴ Raad ta fockle ree, te cur lesh pooar: as quoi oddys gra rish, Cre t’ou dy yannoo?

⁵ Quoi-erbee ta freayll yn sarey echeysyn, cha jig olk erbee ny raad: son ta cree dooinney creeney jeeaghyn chammah gys caa as resoon.

⁶ Son cour dy chooilley nhee ta caa as resoon, shen-y-fa ta treihys dooinney errey trome er.

⁷ Son cha vel fys echey cre ta ry-heet: as quoi oddys shen y hoilshaghey da?

⁸ Cha vel pooar ec dooinney erbee harrish y gheay, dy lhiettal y gheay; chamoo ta mainshtyr erbee er laa’n vaaish; as cha vel feaysley ’sy chaggey shen, chamoo nee drogh-yannoo livrey adsyn ta cur-rish.

⁹ Ooilley shoh ta mee er vakin, as er hyndaa my chree gys dy chooilley obbyr, t’er ny yannoo fo’n ghrian: ta traa ayn dy vel dooinney jannoo tranlaase er dooinney gys yn assee echey hene.

¹⁰ As myr shoh honnick mee ny drogh-yantee oanluckit, v’er jeet, as er n’gholl veih ynnyd yn vriwnys casherick, as v’ad jarroodit ayns yn ard-valley, raad v’ad er n’ymmyrkey reill: ta shoh myrgeddin fardail.

¹¹ Er-yn-oyr nagh vel cooilleen chelleeragh er ny ghoaill er drogh-yannoo: Shen-y-fa ta cree cloan gheiney dy slane soit ayndoo dy yannoo olk.

¹² Ga dy jean peccagh olk keead keayrt, as e laghyn dy ve foddey beayn; foast, son shickyrys ta fys aym, dy bee eh dy mie mâroosyn, ta ayns aggle kiongoyrt rish.

¹³ Agh cha bee eh dy mie marish y dooinney mee-chrauee, chamoo vees e laghyn beayn, ta myr scadoo; son nagh vel eh tannaghtyn ayns aggle Yee.

¹⁴ Ta fardail sodjey ry-akin ’sy theihll, dy vel deiney cairal ayn, daue te taghyrt cordail rish obbyr ny mee-chrauee: reesht ta drogh-sleih ayn, daue te taghyrt cordail rish obbyr y vooinjer ynrick: dooyrt mee, Ta shoh myrgeddin fardail.

¹⁵ Eisht voyll mee gien mie, er-yn-oyr nagh vel nhee erbee share ec dooinney fo’n ghrian, na dy ee, as dy iu, as dy ve gennal: son nee shen tannaghtyn mârish jeh e laboraght, laghyn e vea, ta Jee cur da fo’n ghrian.

¹⁶ Tra ren mee my chree y haaghey dy gheddyn oayll er creenaght, as dy akin y dellal ta jeant er y thalloo: (son ta myrgeddin fer ayn, nagh vel, oie ny laa, cadley cheet er e hooillyn.)

¹⁷ Eisht hug mee my-ner ooilley obbyr Yee, nagh vod dooinney geddyn magh yn obbyr ta jeant fo’n ghrian: son ga dy jean dooinney tooilleil dy hirrey magh eh, foast cha jean eh shen y gheddyn; dy jarroo, ny-sodjey, ga dy vel dooinney creeney smooinaghtyn dy hoiggal shoh, foast cha jig eh lesh dy gheddyn magh eh.