Ecclesiastes 7 - Yn Vible Casherick 1775 1819

CAB. VII

¹ Ta goo mie ny share na ooil chostal: as laa yn vaaish ny share na’n laa ruggyr oo.

² Te ny share dy gholl gys thie ny trimshee, na gys thie ny cuirraghyn; son shen jerrey dy chooilley ghooinney, as gowee yn vio shoh gys e chree.

³ Ta trimshey ny share na garaghtee: son liorish trimshey yn eddin, ta’n cree er ny lhiasaghey.

⁴ Ta cree yn dooinney creeney ayns thie ny trimshee: agh ta cree yn ommydan ayns thie yn rouanys.

⁵ Te ny share dy chlashtyn oghsan dooinney creeney, na son dooinney dy chlashtyn arrane brynneragh ny mee-hushtee.

⁶ Son myr frapperaght drineyn lostey fo pot, shen myr ta garaghtee’n ommydan: ta shoh myrgeddin fardail.

⁷ Ta tranlaase son shickyrys cur dooinney creeney ass e cheeayl; as ta gioot cur yn cree er-shaghryn.

⁸ Ta jerrey’n chooish ny share na’n toshiaght: as ta’n cree surransagh ny share na’n chree mooaralagh.

⁹ Ny cur raad da corree siyragh ayns dty chree: son ta corree tannaghtyn ayns cleeau yn ommydan.

¹⁰ Ny abbyr uss, Cre’n-oyr dy vel laghyn y chenn earish ny share na ny laghyn t’ayn nish? son cha vel oo briaght dy creeney ’sy chooish shoh.

¹¹ Ta creenaght cha mie as eiraght; as liorish ta vondeish ocsyn ta fakin y ghrian.

¹² Son ta creenaght ny endeilagh, as ta argid ny endeilagh: agh te foays mooar tushtey, dy vel creenaght cur bea dauesyn ta bannit lesh.

¹³ Smooinee er obbyr Yee: son quoi oddys shen y yannoo jeeragh, t’eshyn er n’yannoo cam?

¹⁴ Ayns y laa dy vaynrys gow boggey; agh ayns y laa dy heaghyn smooinee ort hene; ta Jee myrgeddin er hoiaghey yn derrey yeh noi’n jeh elley, nagh beagh oyr plaiynt ec dooinney erbee.

¹⁵ Ooilley ny reddyn shoh ta mee er vakin ayns laghyn my ardail: dy vel dooinney cairal cherraghtyn ayns e chairys, as dy vel drogh ghooinney beayn ayns e vee-chraueeaght.

¹⁶ Ny shass gys y lhome-leigh; chamoo gow ort hene dy ve ro chreeney; er-aggle dy duitt oo ayns ribbey.

¹⁷ Ny cur rouyr raad gys mee-chraueeaght, chamoo bee dty ommydan: er-aggle dy jean oo giare jeh dty laghyn hene.

¹⁸ S’mie dy goghe oo greme er shoh; veih shoh myrgeddin ny tayrn dty laue: son nee eshyn, ta goaill aggle roish Jee, shaghney ooilley ny huilk shoh.

¹⁹ Ta creenaght niart smoo da’n dooinney creeney, na jeih treanee caggee ayns ard-valley.

²⁰ Son cha vel dooinney cairal er yn ooir cha mie shen, nagh vel jannoo peccah.

²¹ Myrgeddin, ny cur geill da dy chooilley ockle t’er ny loayrt; er-aggle dy glin oo dty harvaant loayrt dy olk jeed.

²² Son s’mie fys ec dty chree hene, dy vel uss myrgeddin dy mennick er oltooan dty naboo.

²³ Ooilley shoh ta mee er phrowal liorish creenaght: dooyrt mee, Bee’m creeney; agh ve foddey voym.

²⁴ Shen ny ta foddey jeh, as erskyn-towse dowin, quoi oddys y gheddyn magh?

²⁵ Hyndaa mee my chree dy hoiggal, as dy vriaght, as dy hirrey magh creenaght, as bun dy chooilley nhee, as dy hoiggal olkys mee-hushtey, eer ommijys as mee-cheilid.

²⁶ As hooar mee ny shirroo na’n baase yn ven ta’n cree eck ribbaghyn as lieenteenyn, as e laueyn myr geulaghyn: quoi-erbee ta dy wooiys Jee shaghnys ee, agh bee’n drogh-yantagh goit lioree.

²⁷ Cur-my-ner, shoh ta mee er gheddyn, ta’n preachoor dy ghra, goll harrish as harrishdoo, dy yannoo seose yn coontey.

²⁸ Shen ta my annym dy yeearree, agh cha jig eh lhiam: un dooinney mastey thousane ta mee er gheddyn: agh ben, mastey ooilley’n earroo shoh, cha vel mee er gheddyn:

²⁹ Cur-my-ner, shoh ynrycan ta mee er gheddyn, dy vel Jee er n’yannoo dooinney cairal; agh t’eh dy voirey eh-hene ayns ymmodee cooishyn kialgagh.