Ecclesiastes 6 - Yn Vible Casherick 1775 1819

CAB. VI

¹ Ta olk ayn ta mee er vakin fo’n ghrian, as cadjin mastey deiney.

² Dooinney ta Jee er choyrt da berchys, as cooid, as ooashley, myr shen nagh vel eh feme nhee erbee jeh slane yeearree e annym; ny-yeih cha vel y gioot echey veih Jee dy yannoo ymmyd jeh; agh ta joarree goaill y soylley jeh: ta shoh neesht fardail, as doghan treih.

³ Ga dy jinnagh dooinney keead lhiannoo y gheddyn, as e vea dy ve beayn son ymmodee bleeantyn, as ga dy darragh eh gys eash as ooashley yn chanstyr; ny-yeih mannagh vel yn annym echey jeant magh lesh foays e laboraght, as nagh vel wheesh boayl-oanluckee echey; ta mee gra, dy vel lhiannoo ruggit roish e hraa ny share na eh.

⁴ Son haink eh stiagh ’sy theihll ayns fardail, as t’eh gimmeeaght ersooyl ass ayns dorraghys, as bee’n annym echey er ny yarrood ayns dorraghys.

⁵ Chamoo t’eh er vakin y ghrian, ny ennaghtyn echey jeh mie ny sie: ta fea smoo ec y derrey yeh na’n jeh elley.

⁶ Eer abbyr, dy beagh e vea daa housane bleïn, foast cha vel eh er ghoaill gerjagh e chooid-seihlt: nagh vel ooilley goll gys yn un voayl?

⁷ Ta ooilley laboraght dooinney son e veeal, as ny-yeih cha vel e vian dy bragh jeant magh.

⁸ Son cre’n vondeish smoo t’ec y dooinney creeney na’n ommydan? ny cre t’ec y voght, ta gymmyrkey eh-hene dy feudagh ’sy theihll?

⁹ Ny share ta shen ta roish dty hooillyn, na shaghrynys yn yeearree: ta shoh myrgeddin fardail, as seaghney cree.

¹⁰ Shen ny ta er ve, te hannah enmyssit, as s’mie fys nagh vel eh agh dooinney: chamoo oddys eh streeu rishyn ta ny s’niartal na ’hene.

¹¹ Fakin dy vel ymmodee reddyn ta bishaghey fardail, cre-woad share ta dooinney?

¹² Son quoi ec ta fys, cre ta mie da dooinney ’sy vea shoh, ooilley laghyn e vea varvaanagh, t’eh dy cheau myr scadoo? son quoi oddys ginsh da dooinney, cre vees ny lurg fo’n ghrian!