Ecclesiastes 4 - Yn Vible Casherick 1775 1819

CAB. IV

¹ Myr shen hyndaa mee, as smooinee mee er ooilley’n tranlaase t’er ny yannoo fo’n ghrian: as cur-my-ner ny jeïr ocsyn va tranlaasit, as cha row oc fendeilagh; as er cheu ny tranlaasee oc va pooar, agh ocsyn cha row fendeilagh.

² Shen-y-fa dooyrt mee, dy row stayd ny merriu ta hannah er gheddyn baase, ny share na’n stayd ocsyn ta foast bio.

³ Dy jarroo ny share na ad ny-neesht, t’eshyn nagh vel foast er ve, nagh vel er vakin yn drogh obbyr t’er ny yannoo fo’n ghrian.

⁴ Reesht smooinee mee er ooilley tooilleil dooinney, as er dy chooilley obbyr yeeragh, eer son shoh dy vel e naboo troo mysh. Ta shoh myrgeddin fardail, as seaghney cree.

⁵ Ta’n ommydan filley e laueyn dy cheilley, as gee yn eill echey hene.

⁶ Ny share ta lane doayrn lesh fea, na daa lane doayrn lesh tooilleil as seaghney cree.

⁷ Eisht hyndaa mee, as honnick mee fardail fo’n ghrian.

⁸ Ta ayn fer ny-lomarcan, as cha vel echey sheshey; dy jarroo chamoo t’echey lhiannoo ny braar: ny-yeih cha vel jerrey er ooilley e hooilleil, chamoo ta e hooill jeant magh lesh berchys; chamoo t’eh gra, Quoi son ta mee tooilleil, as gobbal gerjagh da my annym? Ta shoh myrgeddin fardail, dy feer te obbyr seaghnagh.

⁹ Ta jees ny share na unnane; son ta leagh smoo oc son nyn obbyr.

¹⁰ Son my huittys fer jeu, coonee’n fer elley lesh e heshey: agh smerg dasyn ta ny-lomarcan tra huittys eh: son cha vel fer elley echey dy chooney lesh.

¹¹ Reesht, my ta jees lhie cooidjagh, eisht ta chiass oc; agh kys oddys fer ve cheh ny-lomarcan?

¹² As my ta fer goaill mainshtyraght er dooinney, nee jees cur eddin da; as cha vel coyrd three-filley dy leah er ny vrishey.

¹³ Ny share ta lhiannoo boght as creeney, na shenn ree ommijagh, nagh bee arragh er ny choyrlaghey.

¹⁴ Son ass pryssoon t’eh cheet dy reill, as t’eshyn ta ruggit ayns e reeriaght cheet gys boghtynid.

¹⁵ Smooinee mee er slane stayd sheelnaue fo’n ghrian, as er yn eirey hig nyn yeï.

¹⁶ S’coan ta jerrey er anvea yn phobble, dy jarroo myr nagh row orroosyn va rhymboo; cha jean adsyn myrgeddin, ta cheet nyn yeï, boggey y ghoaill ayn: son shickyrys ta shoh myrgeddin fardail, as seaghney cree.