Ecclesiastes 2 - Yn Vible Casherick 1775 1819

CAB. II

¹ Dooyrt mee ayns my chree, Tar nish, nee’m oo y phrowal lesh gien mie, shen-y-fa jean mooar jeed hene: as cur-my-ner, ta shoh myrgeddin fardail.

² Dooyrt mee jeh garaghtee, Te ass e cheeayl: as jeh reaïd, Cre’n foays t’ayn?

³ Ghow mee smooinaghtyn elley ayns my chree dy ghoaill my soylley ayns feeyn (foast reill my chree ayns creenaght) as cur reamys dou hene ayns fardalys, dy gheddyn toiggal, cre va’n red mie shen, va son ard-eunys cloan gheiney, lhisagh ad y yannoo fo niau ooilley laghyn nyn mea.

⁴ Ren mee dou hene obbraghyn mooar, hrog mee thieyn, as hoie mee dou hene garaghyn-feeyney.

⁵ Ren mee dou hene garaghyn as orchardyn, as hoie mee ayndoo dy chooilley cheint dy villey mess.

⁶ Ren mee dou hene loghanyn ushtey, dy ushtaghey yn cheyll ta gymmyrkey biljyn.

⁷ Hooar mee fir-vooinjerey as inneenyn-veyl, as va sharvaantyn aym ruggit ayns my hie: va myrgeddin aym ymmodee seihlt dy hellooyn as dy hioltaneyn, erskyn ooilley va roym ayns Jerusalem.

⁸ Haggil mee dou hene myrgeddin argid as airh, as ard-verchys reeaghyn as rheamyn: hooar mee dou hene deiney as mraane kiaullee, as eunyssyn cloan gheiney, lheid as greinyn-kiaullee, jeh dy chooilley horch.

⁹ Myr shoh va mee ass-towse ooasle, as ren mee bishaghey ny smoo na adsyn ooilley va roym ayns Jerusalem: ren my chreenaght myrgeddin tannaghtyn mârym

¹⁰ As cre-erbee va mian my hooillyn, cha dreill mee voue, cha ren mee my chree y lhiettal veih gerjagh erbee: son ghow my chree boggey ayns ooilley my yannoo, as shoh va my chronney jeh ooilley my chiarail.

¹¹ Eisht yeeagh mee er ooilley ny obbraghyn, va my laueyn er n’yannoo, as er dy chooilley nhee, va mee er ghoaill orrym dy chooilleeney: as cur-my-ner, va ooilley fardail as seaghney cree, as nagh vel shickyrys ayns nhee erbee fo’n ghrian.

¹² As hyndaa mee mee-hene dy chur-my-ner creenaght, as mee-cheilid as ommijys, son cre oddys y dooinney jannoo ta cheet lurg y ree? dy jarroo shen ta hannah jeant.

¹³ Eisht chronnee mee dy vel creenaght ny share na ommijys, wheesh as ta soilshey ny share na dorraghys.

¹⁴ Ta sooillyn y dooinney creeney ayns e chione, agh ta’n ommydan gimmeeaght ayns dorraghys: as ghow mee hene tastey myrgeddin, dy vel y jerrey cheddin taghyrt daue ooilley.

¹⁵ Eisht dooyrt mee ayns my chree, Myr te taghyrt da’n ommydan, shen myr te taghyrt dooys, cre-woad share mee eisht dy ve ny s’creeney? eisht dooyrt mee ayns my chree, dy vel shoh myrgeddin fardail.

¹⁶ Son cha bee cooinaghtyn er y dooinney creeney ny smoo na er yn ommydan son dy bragh: fakin dy bee shen, ny ta nish, er ny yarrood ayns ny laghyn ta ry-heet: as kys ta’n dooinney creeney geddyn baase? eer myr yn ommydan.

¹⁷ Shen-y-fa cha by-haittin lhiam y vea shoh, er-yn-oyr dy dooar mee deinys ayns dy chooilley obbyr ta jeant fo’n ghrian: son ta dy chooilley nhee fardail as seaghney cree.

¹⁸ Dy jarroo, cha row boggey erbee aym jeh ooilley my ghoccar, va mee er ghoaill fo’n ghrian: er-yn-oyr dy nhegin dou faagail eh da’n dooinney hig my lurg.

¹⁹ As quoi ec ta fys nee dooinney creeney, ny ommydan vees eh? ny-yeih bee eh ny vainshtyr harrish ooilley my chooid-seihlt, ta mee dy deinagh er chosney, as ayn ta mee er hoilshaghey my chreenaght fo’n ghrian. Ta shoh myrgeddin fardail.

²⁰ Shen-y-fa ghow mee smooinaghtyn, dy row mee ass cree, dy chosney vondeish erbee veih ooilley’n tooilleil va mee er ghoaill fo’n ghrian.

²¹ Son ta dooinney ayn, ta e yannoo dy tarroogh ayns creenaght, as ayns tushtey, as ayns cairys: ny-yeih gys dooinney nagh vel er laboraght ayn, nee eh faagail eh son e chronney. Ta shoh myrgeddin fardail as olk vooar.

²² Son cre ta ec dooinney jeh ooilley e laboraght, as jeh’n boirey cree, ayn t’eh er hooilleil fo’n ghrian?

²³ Son ta ooilley e laghyn seaghnagh, as e hroailt trimshey; dy jarroo cha vel e chree goaill fea ’syn oie. Ta shoh myrgeddin fardail.

²⁴ Cha vel nhee erbee ny share da dooinney na dy ee as dy iu, as e annym dy ghoaill soylley jeh foays e laboraght. Honnick mee myrgeddin, dy nee veih laue Yee ta shoh.

²⁵ Son quoi oddys ymmyd share y yannoo jeh, ny soylley smoo y ghoaill jeh, na mish?

²⁶ Son ta Jee cur creenaght as tushtey, as gerjagh da’n dooinney ta mie ayns e hilley: agh da’n drogh ghooinney t’eh coyrt imnea, dy haglym as dy chruinnaghey cooid, dy ve faagit dasyn ta mie ayns shilley Yee. Ta shoh myrgeddin fardail as seaghney cree.