Ecclesiastes 11 - Yn Vible Casherick 1775 1819

CAB. XI

¹ Ceau dty arran er ny ushtaghyn: son lurg ymmodee laghyn yiow soylley jeh.

² Cur cooid-ronney da shiaght, as myrgeddin da hoght; son cha vel fys ayd, cre’n lhag-haghyrt hig er yn ooir.

³ My ta ny bodjallyn lane fliaghey, t’ad folmagh ad-hene er y thalloo, as my huittys yn billey lesh y jiass, ny lesh y twoaie, ’sy voayl huittys eh, shen y raad nee eh lhie.

⁴ Eshyn ver geill da’n gheay, cha jean eh cuirr: as eshyn ta goaill baght jeh ny bodjallyn cha jean eh buinn.

⁵ Myr nagh vel toiggal ayd jeh raad ny geayee, ny kys ta ny craueyn er ny chiaddey ayns breïn y ven chorrey: eer myr shen cha vel toiggal ayd jeh obbraghyn Yee, cre’n aght t’eh jannoo dy chooilley nhee jeu shoh.

⁶ ’Sy voghrey cuirr dty rass, as ec yn astyr ny lhaggee dty laue: son cha vel fys ayd quoi jeu nee bishaghey, edyr shoh ny shen; er-nonney bee ad ny-neesht co-laik mie.

⁷ Dy jarroo ta’n soilshey aalin, as red eunyssagh te da ny sooillyn, dy chur-my-ner yn ghrian.

⁸ Agh ga dy vel dooinney er cheau ymmodee bleeantyn, as er ghoaill boggey ayndoo ooilley: ny-yeih, lhig da smooinaghtyn er laghyn y dorraghys, son bee ad ymmodee. Son ooilley ta ry-heet, cha vel eh agh fardail.

⁹ Gow boggey, O ghooinney aeg ayns dty aegid, as lhig da dty chree oo y gherjaghey ayns laghyn dty aegid, as jean gimmeeaght ayns raaidyn dty chree, as lurg shilley dty hooillyn hene: agh toig uss son ooilley ny reddyn shoh, dy der Jee lesh oo gys briwnys.

¹⁰ Shen-y-fa scugh trimshey veih dty chree, as freill dty challin veih skielley: son cha vel lambaanid as aegid agh shallid.