Ecclesiastes 10 - Yn Vible Casherick 1775 1819

CAB. X

¹ Myr ta beishteigyn marroo breinnaghey ooil chostal yn phothecaree: myr shen ta kuse dy ommijys leodaghey eshyn, ta ayns goo mie son creenaght as ooashley.

² Ta cree dooinney creeney ec e laue yesh; agh ta cree yn ommydan ec e laue hoshtal.

³ Eer myr t’eh shooyl er y raad, ta cree yn ommydan failleil, soilshaghey da dy chooilley unnane, cre’n ommydan t’eh.

⁴ My ta jymmoose yn reiltagh girree seose dt’oï, ny treig dty oik; son ta ammys jannoo lhiasaghey son foiljyn mooarey.

⁵ Ta lieh-chiartys ayn ta mee er vakin fo’n ghrian, as shen by-chyndagh rish foill yn ard-reiltagh hene.

⁶ Ta ommijys soit ayns oikyn ooasle, as deiney seyrey currit sheese dy injil.

⁷ Ta mee er vakin fir-vooinjerey er cabbil, as princeyn shooyl myr coshee er y thalloo.

⁸ Eshyn chleiy-ys ooig, tuittee eh-hene ayn; as eshyn lhieggys cleiy, nee ard-nieu eh y lhottey.

⁹ Eshyn ta scughey claghyn, t’eh ayns gaue ve gortit lioroo: as eshyn ta scoltey fuygh, foddee skielley taghyrt da.

¹⁰ My ta’n yiarn moandagh, as cha vel yn obbree goaill foyr, eisht shegin da niart smoo y chur huggey: agh ta schleï ymmyrchagh dy yannoo aghtal.

¹¹ Son shickyrys, te ayns fardail dy chleayney yn ard-nieu, erreish da v’er lhottey, as cha vel y beealerey veg share.

¹² Ta goan beeal y dooinney creeney graysoil; agh nee meillyn yn ommydan sluggey seose eh-hene.

¹³ Ta goan e veeal goaill toshiaght ayns ommijys; as ta jerrey e haggloo ayns dewilys aggair.

¹⁴ Ta ommydan neesht lane dy ghlare: cha vod dooinney ginsh cre t’eh mysh, ny jannoo magh cre t’eh kiarail.

¹⁵ Ta boiraneys yn ommydan jannoo dy chooilley ghooinney skee jeh, myr fer nagh nhione da oayll y raad gys yn ard-valley.

¹⁶ Smerg dhyt’s, O heer, tra ta dty ree ny lhiannoo, as ta dty phrinceyn gee dy rouanagh ’sy voghrey.

¹⁷ S’maynrey t’ou uss, O heer, tra ta dty ree jeh kynney ooasle, as ta dty phrinceyn gee ayns traa cooie, son ooraghey, as cha nee son rouanys.

¹⁸ Liorish eer liastey ta’n ynnyd-vaghee goll naardey, as trooid mee-rioose ny laueyn ta’n faarn shilley trooid y chlea.

¹⁹ Ta cuirraghyn jeant son gennallys, as ta feeyn jannoo gerjaghey’n chree: agh ta argid gansoor dy chooilley nhee.

²⁰ Ny jean y ree y oltooan, eer ayns dty smooinaghtyn, as ny loayr dy olk jeh deiney ooasle ayns dty hiamyr lhiabbagh: son nee eean jeh’n aer yn coraa y chur lesh, as ver yn skianagh briaght er y chooish.