Ecclesiastes 1 - Yn Vible Casherick 1775 1819

CAB. I

¹ Goan y phreachoor, mac Ghavid, ree Yerusalem.

² Fardail dy ardalys ta’n preachoor dy ghra, fardail dy ardalys, ta ooilley fardail.

³ Cre’n vondeish t’ec dooinney jeh ooilley’n deinys t’eh dy ghoaill fo’n ghrian?

⁴ Ta un sheeloghe goll shaghey, as ta sheeloghe elley cheet ny yeï: agh ta’n thalloo tannaghtyn veih sheeloghe gys sheeloghe.

⁵ Ta’n ghrian girree, as ta’n ghrian goll dy lhie, as chyndaa dy kinjagh gys yn ard raad dirree eh.

⁶ Ta’n gheay goll lesh y jiass, as chyndaa mygeayrt gys y twoaie, t’ee kinjagh cassey mygeayrt, as chyndaa reesht rere e combaaseyn.

⁷ Ta ooilley ny awinyn roie gys y vooir, ny-yeih cha vel y mooir lhieeney harrish: gys moir ny awinyn t’ad reesht chyndaa.

⁸ Ta dy chooilley nhee lane dy hooilleil, cha vod dooinney fockley-magh eh: cha vel y sooill er ny yannoo magh lesh fakin, ny’n chleaysh skee lesh clashtyn.

⁹ Shen ta er ve bee eh reesht, as shen ta nish dy yannoo, vees jeant ’sy traa ry-heet: as cha vel nhee erbee noa fo’n ghrian.

¹⁰ Vel nhee erbee mychione oddys eh ve graït, Jeeagh, ta shoh noa? te er ny ve hannah ’sy chenn earish, roish y lhing ain.

¹¹ Cha vel veg y chooinaghtyn jeh ymmodee reddyn foddey er-dy-henney, chamoo vees veg y toiggal ocsyn hig nyn yeï, jeh shen ta ry-heet.

¹² Va mish yn preachoor my ree harrish Israel, ayns Jerusalem.

¹³ As ren mee my chree y haaghey dy vriaght, as dy ronsaghey magh liorish creenaght dy chooilley nhee t’er ny yannoo fo niau: yn deinys trome shoh ta Jee er choyrt er cloan gheiney dy gholl ny hrooid.

¹⁴ Ta mee er vakin ooilley ny obbraghyn ta jeant fo’n ghrian, as cur-my-ner, t’ad ooilley fardail as seaghney cree.

¹⁵ Cha vod shen ta cam v’er ny yannoo jeeragh: as cha vod shen ta laccal ve er ny choontey.

¹⁶ Loayr mee rish my chree hene, gra, Cur-my-ner, ta mee er jeet gys ard-ooashley, as ta mee er chosney creenaght erskyn ooilley ny va roym ayns Jerusalem: va dy jarroo toiggal dowin ec my chree jeh creenaght as tushtey:

¹⁷ As ren mee my chree y haaghey dy hoiggal creenaght, as dy chur-my-ner mee-cheeayllid as ommijys: honnick mee dy row shoh myrgeddin seaghney cree.

¹⁸ Son ayns mooarane creenaght ta mooarane seaghyn: as eshyn ta mooadaghey tushtey, t’eh mooadaghey deinys.