Dobberan 5 - Yn Vible Casherick 1775 1819

CAB. V

¹ Cooinee, O Hiarn, cre t’er jeet orrin, smooinee er, as cur-my-ner nyn oltooan.

² Ec joarreeyn ta nyn eiraght, as ny thieyn ain ec nyn noidyn.

³ Ta shin cloan treigit as gyn ayr, as ta nyn moiraghyn myr mraane-treoghe.

⁴ Ta shin er n’iu yn ushtey ain son argid, as ta’n fuygh ain creckit rooin.

⁵ Ta ny mwannallyn ain fo tranlaase; ta shin laboragh, as cha vel aash erbee ain.

⁶ Ta shin er heeyney magh nyn laue gys ny Egyptianee, as gys ny Assyrianee, son greme dy arran.

⁷ Ta nyn ayraghyn er n’yannoo peccah, as t’ad er n’immeeaght, agh ta shinyn er n’ymmyrkey yn vee-chairys oc.

⁸ Ta sharvaantyn reill harrin: cha vel ain fer dy livrey shin veih nyn laue.

⁹ Lesh gaue nyn mioys, roish foyr y chliwe, hooar shin nyn arran ’syn aasagh.

¹⁰ Va’n crackan ain doo myr yn oghe, kyndagh rish y ghortey dewil.

¹¹ Ghow ad mraane Zion er-êgin, as ny moidynyn ayns ard-valjyn Yudah.

¹² Ta ny princeyn croghit liorish ny laueyn oc; cha ren ad soiaghey jeh eddin y chanstyr.

¹³ Ghow ad ny deiney aegey dy vlieh, as huitt ny scollagyn fo’n fuygh.

¹⁴ Ta’n chanstyr er hreigeil yn giat; as ny deiney aegey er scuirr veih bingys nyn giaulleeaght.

¹⁵ Ta boggey nyn gree ec kione, ta’n daunsin ain er ny hyndaa gys dobberan.

¹⁶ Ta’n attey er duittym veih nyn gione: smerg dooin dy vel shin er n’yannoo peccah!

¹⁷ Son shoh ta’n cree ain faiynt, son ny reddyn shoh ta ny sooillyn ain moal;

¹⁸ Eer son slieau Zion, ta ny hraartys, te ec ny shynnee dy hooyl ayn.

¹⁹ T’ou uss, O Hiarn, er-mayrn son dy bragh: dty stoyl-reeoil veih sheeloghe gys sheeloghe.

²⁰ Cre’n-fa t’ou dy yarrood shin son dy bragh, as treigeil shin son choud dy hraa?

²¹ Chyndaa uss shin hood, O Hiarn, as bee mayd er nyn jyndaa: jean ass-y-noa nyn laghyn, myr jeh’n chenn earish.

²² Agh t’ou uss dy bollagh er n’yiooldey rooin: t’ou feer jymmoosagh nyn ’oï.