Dobberan 4 - Yn Vible Casherick 1775 1819

CAB. IV

¹ Kys ta’n airh er jeet dy ve dorraghey! kys ta’n airh s’glenney er ny chaghlaa! ta claghyn yn ynnyd casherick ceaut magh ayns kione dy chooilley straïd.

² Mec aalin Zion, corrym rish airh ghlen, kys t’ad coontit myr siyn craie obbyr-lauee yn phasheyder!

³ Ta eer raunyn ny marrey tayrn magh nyn sheeintyn, t’ad cur keeagh da ny quallianyn oc: ta inneen my phobble er n’aase dewil, myr ny ostrichyn ayns yn aasagh.

⁴ Ta chengey yn oikan er y cheeagh lhiantyn gys e ghruntyn trooid paays: ta’n chloan aegey geearree arran, as cha vel unnane dy hirveish eh orroo.

⁵ Adsyn va beaghey dy keiyn, t’ad treigit ayns ny straïdyn: adsyn va coamrit lesh scarleod t’ad lhie er ny torranyn.

⁶ Son ta kerraghey mee-chairys inneen my phobble ny s’trimmey na kerraghey peccah Sodom, va stroit myr ayns shallid, as cha row laue dooinney urree.

⁷ Va ny Nazariteyn eck ny s’glenney na sniaghtey, v’ad ny s’gilley na bainney, v’ad ny s’aalin ayns corp na rubieyn, v’ad ny sollys na’n sapphire.

⁸ Ta’n eddin oc ny s’dorraghey na’n gheayl: s’coan ver oo enn orroo ayns ny straïdyn: ta’n crackan oc lhiantyn gys nyn graueyn: te shyrgit myr brasnag.

⁹ Adsyn t’er nyn marroo lesh y chliwe, t’ad ny share jeh, na adsyn ta goll dy baase lesh accyrys: son t’ad shoh shymley ersooyl, as goll eig ayns feme messyn y vagheragh.

¹⁰ Ta laueyn ny mraane erreeishagh er n’aarlagh yn chloan oc hene, v’ad yn beaghey oc ayns toyrt-mow inneen my phobble.

¹¹ Ta’n Chiarn er chooilleeney e eulys, t’eh er gheayrtey magh dewilys e yymmoose, as er ghreesey aile ayns Zion, as t’eh er stroie ny undinyn eck.

¹² Cha voddagh reeaghyn ny hooirey, ny ooilley cummaltee yn theihll credjal dy darragh y noid stiagh er Jerusalem.

¹³ Kyndagh rish peccaghyn e phadeyryn, as mee-chairys e haggyrtyn, t’er gheayrtey fuill yn vooinjer ynrick ayns y vean eck;

¹⁴ T’ad er rouail myr deiney doal ayns ny straïdyn, t’ad sollit lesh fuill, myr shen nagh voddagh deiney bentyn rish ny garmadyn oc.

¹⁵ Deïe ad daue, Reue-jee, te neu-ghlen, reue-jee, reue-jee, ny tar-jee faare ad, tra ren ad chea ersooyl as rouail: dooyrt ad mastey ny ashoonyn, Cha nhegin daue cummal ny-sodjey ayns shen.

¹⁶ Ta corree yn Chiarn er skeayley ad, cha der eh geill sodjey daue: cha ren ad soiaghey jeh persoon ny saggyrtyn, ny cur ammys da’n chanstyr.

¹⁷ Er y hon ainyn, ta nyn sooillyn er vailleil trooid treishteil fardalagh nyn gooney: ayns nyn arrey yeeagh shin son ashoon, nagh voddagh sauail shin.

¹⁸ T’ad shelg nyn gesmadyn, nagh vod mayd goll trooid nyn straïdyn: ta’n jerrey ain er-gerrey, ta nyn laghyn harrish, son ta’n jerrey ain er jeet.

¹⁹ Ta ny tranlaasee ain ny s’bieau na urlee yn aer: deiyr ad shin er ny sleityn, lhie ad cooyl-chlea er nyn son ayns yn aasagh.

²⁰ Va ree ooilit y Chiarn, ennal nyn mioys, goit ayns ny ribbaghyn oc, my-e-chione dooyrt shin, Nee mayd cummal fo yn scadoo echey mastey ny ashoonyn.

²¹ Gow boggey, as bee gennal, O inneen Edom, ta cummal ayns cheer Uz; nee yn cappan myrgeddin goll harrish hood: bee uss er-meshtey, as er dty roostey.

²² Ta kerraghey dty vee-chairys cooilleenit, O inneen Zion, cha der eh lesh oo arragh gys cappeeys: gowee eh kerraghey er dty vee-chairys, O inneen Edom, ver eh briaght er dty pheccaghyn.