Dobberan 3 - Yn Vible Casherick 1775 1819

CAB. III

¹ Mish y dooinney ta ainjyssagh er seaghyn liorish slatt e yymmoose.

² T’eh er my leeideil, as er chur lesh mish gys dorraghys, as cha nee gys y toilshey.

³ Dy shickyr m’oï’s t’eh er ny hyndaa, t’eh chyndaa e laue m’oï fey-ny-laa:

⁴ My eill as my chrackan t’eh er n’yannoo shenn; t’eh er vrishey my chraueyn.

⁵ T’eh er hroggal m’oï, as er chombaasal mee mygeayrt lesh gall as angaish.

⁶ T’eh er hoiaghey mee ayns buill dorraghey, myr adsyn ta foddey marroo.

⁷ T’eh er chruinnaghey mee mygeayrt nagh voddym cosney magh: t’eh er n’yannoo my gheuley trome.

⁸ Myrgeddin tra ta mee gaccan as geam, t’eh dooney magh my phadjer.

⁹ T’eh er yeigh my raaidyn lesh claghyn giarit: t’eh er n’yannoo ny chassanyn cam.

¹⁰ Dooys v’eh myr muc-awin ny lhie farkiaght, as myr lion cooyl-chlea.

¹¹ T’eh er hyndaa dy lhiattee my raaidyn, as er my raipey ayns peeshyn; t’eh er my yannoo follym-faase.

¹² T’eh er lhoobey e vhow, as er hoiaghey mish son mark da’n tide.

¹³ T’eh er lhiggey sideyn e whiver ayns my veeghyn.

¹⁴ Va mee son craid da ooilley my phobble, as yn ronneeaght oc fey-ny-laa.

¹⁵ T’eh er my lhieeney lesh sherriuid, t’eh er n’yannoo mee er-meshtey lesh ullymar.

¹⁶ T’eh myrgeddin er vrishey my eeacklyn myr claghyn-geinnee, t’eh er my choodaghey lesh leoie.

¹⁷ As t’ou er scughey my annym foddey veih shee: yarrood mee my vaynrys.

¹⁸ As dooyrt mee, Ta my niart, as my hreishteil er jerraghtyn veih’n Chiarn.

¹⁹ Cooinaghtyn er my heaghyn as my hreihys, yn ullymar as y gall.

²⁰ Ta my annym dy kinjagh cooinaghtyn orroo, as te er ny injillaghey cheu-sthie jee’m.

²¹ Shoh ta mee tayrn gys my chooinaghtyn, shen-y-fa ta mee ayns treishteil.

²² She trooid myghinyn y Chiarn te, nagh vel shin stroit, as nagh vel e hymmey failleil.

²³ T’ad noa dy chooilley voghrey: s’mooar ta dt’ynrickys.

²⁴ Ta’n Chiarn my chronney, ta my annym dy ghra, shen-y-fa bee my varrant er.

²⁵ Ta’n Chiarn dooie dauesyn ta farkiaght er, da’n annym ta shirrey huggey.

²⁶ Te mie son dooinney chammah dy hreishteil, as dy meen farkiaght son saualtys y Chiarn.

²⁷ Te mie son dooinney dy ymmyrkey’n whing ayns e aegid.

²⁸ T’eh soie ny-lomarcan, as ny host, er-yn-oyr dy vel eh er n’ymmyrkey er eh.

²⁹ T’eh cur e veeal ayns y joan, ayns treishteil dy chaghlaa.

³⁰ T’eh cur e lieckan dasyn ta bwoalley eh, t’eh laadit lesh oltooan.

³¹ Son cha jean y Chiarn tilgey jeh son dy bragh.

³² Agh ga dy vel eh seaghney, foast nee eh chymmey ’ghoaill cordail rish earroo e vyghinyn.

³³ Son cha vel eh aggindagh er kerraghey, chamoo er seaghney cloan gheiney.

³⁴ Dy vroo fo e chassyn ooilley pryssoonee ny hooirey.

³⁵ Dy hyndaa dy lhiattee cairys dooinney fenish eddin yn er-syrjey,

³⁶ Dy chassey dooinney ayns e chooish cha vel y Chiarn lowal jeh.

³⁷ Quoi eshyn ta gra, as te cheet gy-kione, tra nagh vel y Chiarn er harey eh?

³⁸ Nagh vel mie as sie cheet magh ass beeal yn er-syrjey?

³⁹ Cre’n-fa ta dooinney bio plaiynt, dooinney son kerraghey e pheccaghyn?

⁴⁰ Lhig dooin ronsagh as prowal nyn raaidyn, as chyndaa reesht gys y Chiarn.

⁴¹ Lhig dooin troggal seose nyn gree, marish nyn laueyn, gys Jee ayns ny niaughyn.

⁴² Ta shin er ve foiljagh as er n’irree-magh, cha vel uss er phardooney.

⁴³ T’ou er choodaghey shin lesh dty yymmoose, as er n’yannoo tranlaase orrin: t’ou er varroo gyn erreeish.

⁴⁴ T’ou er choodaghey oo hene lesh bodjal, nagh ragh nyn badjer ny hrooid.

⁴⁵ T’ou er n’yannoo shin myr jeelym, as orch mastey’n pobble.

⁴⁶ Ta ooilley nyn noidyn er vosley nyn meeal nyn ’oï.

⁴⁷ Ta aggle as y ribbey er jeet orrin, traartys as toyrt-mow.

⁴⁸ Ta my hooill roie sheese lesh strooanyn ushtey, kyndagh rish toyrt-mow inneen my phobble.

⁴⁹ Ta my hooill shilley gyn scuirr, ny goaill fea;

⁵⁰ Derrey nee’n Chiarn jeeaghyn sheese, as cur-my-ner veih niau.

⁵¹ Ta my hooill seaghney my chree, son ooilley inneenyn my ard-valley.

⁵² Ren my noidyn shelg mee dy gyere gyn oyr, myr ushag.

⁵³ T’ad er yiarey jeh my vioys ayns pryssoon, as er lhie lhiack orrym.

⁵⁴ Ren ushtaghyn lhieeney harrish my chione, eisht dooyrt mee, Ta mee giarit jeh.

⁵⁵ Deïe mee er dty ennym, O Hiarn, veih diunid yn ooig.

⁵⁶ T’ou er chlashtyn my choraa, ny dooin dty chleaysh noi my osnaghyn, ny my accan.

⁵⁷ Hayrn oo er-gerrey er y laa deïe mee ort: dooyrt oo, Ny bee aggle ort.

⁵⁸ O Hiarn, t’ou er ghoaill seose my chooishyn anmey, t’ou er livrey my vioys.

⁵⁹ T’ou uss, O Hiarn, er vakin my aggair, jean uss my chooish y vriwnys.

⁶⁰ T’ou er vakin ooilley yn eulys oc, as ooilley ny croutyn oc m’oï.

⁶¹ T’ou er chlashtyn yn oltooan oc, O Hiarn, as ooilley nyn gliaghtaghyn cluicagh m’oï.

⁶² Ny meillyn ocsyn dirree seose m’oï, as nyn saaseyn m’oï fey-ny-laa.

⁶³ Cur-my-ner yn soie-sheese as yn irree-seose oc, t’ad jannoo mish nyn ronneeaght.

⁶⁴ Ver uss dauesyn, O Hiarn, cooilleeney, rere obbyr nyn laueyn.

⁶⁵ Ver oo daue sou-aigney, hig dty vollaght orroo.

⁶⁶ Nee oo geiyrt ad, as stroie ad ayns dty yymmoose, veih fo niaughyn y Chiarn.