Deuteronomy 5 - Yn Vible Casherick 1775 1819

CAB. V

¹ As deïe Moses er ooilley Israel, as dooyrt eh roo, Eaisht, O Israel, rish ny slattyssyn as ny briwnyssyn, ta mee fockley magh diu yn laa jiu, dy vod shiu gynsaghey ad, as freayll, as cooilleeney ad.

² Ren y Chiarn nyn Yee conaant rooinyn ayns Horeb.

³ Cha ren y Chiarn yn conaant shoh ynrycan rish nyn ayraghyn, agh rooinyn, dy jarroo rooin hene, ta ooilley bio ’sy laa t’ayn jiu.

⁴ Ren y Chiarn taggloo riu eddin ry eddin er y clieau, veih mean yn aile,

⁵ (Hass mish eddyr y Chiarn as shiuish ec y traa shen, dy hoilshaghey diu goan y Chiarn: son va aggle erriu kyndagh rish yn aile, as cha jagh shiu seose er y clieau) gra,

⁶ Mish y Chiarn dty Yee, hug lhiam magh oo ass cheer Egypt, veih thie ny bondiaght.

⁷ Cha bee Jee erbee elley ayd ayns m’enish.

⁸ Cha jean oo dhyt hene jalloo grainnit erbee, ny co-chaslys jeh nhee erbee t’ayns niau heose, ny t’er y thalloo wass, ny t’ayns ny ushtaghyn fo’n thalloo.

⁹ Cha groym oo sheese oo hene huc, ny ooashley ’choyrt daue, son ta mish, yn Chiarn dty Yee, my Yee eadolagh, ta kerraghey peccaghyn ny ayraghyn er y chloan, gys y trass as y chiarroo heeloghe jeusyn ta dwoaie oc orrym,

¹⁰ As soilshaghey myghin er thousaneyn, jeusyn ta graihagh orrym, as freaylley m’annaghyn.

¹¹ Cha gow ennym yn Chiarn dty Yee ayns fardail: son cha gum y Chiarn eshyn gyn loght, ta goaill e ennym ayns fardail.

¹² Freill yn doonaght, dy chasherickey eh, myr ta’n Chiarn dty Yee er dty harey.

¹³ Shey laa nee oo laboragh, as jannoo ooilley dty obbyr:

¹⁴ Agh y chiaghtoo laa doonaght y Chiarn dty Yee: er cha jean obbyr erbee, oo hene, ny dty vac, ny dty inneen, ny dty er-mooinjerey, ny dty inney-veyl, ny dty ghow, ny dt’assyl, ny veg jeh dt’ollagh, ny dty yoarree t’er cheu-sthie jeh dty yiattyn; dy vod dt’er-mooinjerey as dt’inney-veyl nyn aash y ghoaill, chammah rhyt hene.

¹⁵ As cooinee, dy row hene dty harvaant ayns cheer Egypt, as dy dug y Chiarn dty Yee lesh oo magh veih shen, lesh laue niartal, as lesh roih sheeynt magh: shen-y-fa hug y Chiarn dty Yee sarey dhyt dy reayll y doonaght.

¹⁶ Cur arrym da dt’ayr, as da dty voir, myr ren y Chiarn dty harey; dy vod dty laghyn ve foddey beayn, as dy vod oo ve maynrey ayns y cheer ta’n Chiarn dty Yee dy chur dhyt.

¹⁷ Cha jean oo dunverys.

¹⁸ Chamoo nee oo poosey ’vrishey.

¹⁹ Chamoo nee oo geid.

²⁰ Chamoo nee oo feanish foalsey y ymmyrkey noi dty naboo.

²¹ Chamoo nee oo geearree ben dty naboo, chamoo ver oo saynt da thie dty naboo, ny da e vagher, ny da e er-mooinjerey, ny da e inney-veyl, e ghow, ny e assyl, ny da nhee erbee ta lesh dty naboo.

²² Shoh ny goan loayr y Chiarn rish y slane cheshaght eu, er y clieau, ass mean yn aile, y vodjal, as y dorraghys dowin, lesh coraa ard, as cha dug eh veg arragh huc, as scrieu eh ad er daa voayrd chloaie, as livrey eh ad dooys.

²³ As haink eh gy-kione, tra cheayll shiuish y coraa ass mean y dorraghys, (son va’n slieau lostey lesh aile) dy daink shiu hym’s dy jarroo ooilley ard-gheiney ny tribeyn, as y chanstyr eu.

²⁴ As dooyrt shiu, Cur-my-ner, ta’n Chiarn y Jee ain er hoilshaghey dooin e ghloyr, as e phooar, as ta shin er chlashtyn e choraa veih mean yn aile: ta shin er vakin jiu, dy vel y Chiarn loayrt rish dooinney, as y dooinney foast bio.

²⁵ Shen-y-fa nish, ny lhig dooin baase y gheddyn; son nee’n aile mooar shoh shin y stroie. My nee mayd clashtyn coraa’n Chiarn y Jee ain arragh, eisht yiow mayd baase.

²⁶ Son quoi’n dooinney ’sy theihll t’er chlashtyn coraa’n Jee bio, loayrt ass mean yn aile, (myr ta shinyn) as eh ve bio?

²⁷ Immee uss er-gerrey, as eaisht rish ooilley ny jir y Chiarn y Jee ain; as insh uss dooinyn ooilley ny nee’n Chiarn y Jee ain gra rhyt, as nee mayd clashtyn, as cooilleeney eh.

²⁸ As cheayll y Chiarn coraa nyn ghoan, tra loayr shiu rhym’s; as dooyrt y Chiarn rhym, Ta mee er chlashtyn coraa goan y pobble shoh, t’ad er loayrt rhyt’s: t’ad er ghra dy mie ayns ooilley ny t’ad er loayrt.

²⁹ O dy beagh lheid y cree ayndoo, dy goghe ad aggle roym, as dy vreillagh ad ooilley my annaghyn dy kinjagh, dy voddagh ad hene as nyn gloan ve maynrey son dy bragh!

³⁰ Immee, as abbyr roo, Immee-jee reue reesht gys nyn gabbaneyn.

³¹ Agh er dty hon hene, shass uss ayns shoh liorym’s, as ver-ym royd ooilley ny annaghyn, as ny slattyssyn, as ny briwnyssyn nee uss gynsaghey daue, dy vod ad cooilleeney ad, ayns y cheer ta mish dy choyrt daue son eiraght.

³² Nee shiuish, er-y-fa shen, kiarail y ghoaill, dy yannoo myr ta’n Chiarn er harey diu: cha jyndaa shiu dy lhiattee gys y laue yesh, ny gys y laue chiare.

³³ Nee shiu gimmeeaght ayns ooilley ny raaidyn, ta’n Chiarn y Jee eu er harey diu, dy vod shiu ve bio, as maynrey, as dy vod nyn laghyn ve beayn, ayns y cheer ta kiarit diu son eiraght.