Deuteronomy 34 - Yn Vible Casherick 1775 1819

CAB. XXXIV

¹ As hie Moses seose veih cheer-rea Voab, gys slieau Nebo, gys mullagh Pisgah, ta er-gerrey da Jericho: as yeeagh y Chiarn da ooilley cheer Ghilead, choud as Dan.

² As ooilley Naphtali, as thalloo Ephraim as Manasseh, as ooilley thalloo Yudah, gys y faarkey sodjey magh,

³ As y jiass, as strah coan Yericho, ard-valley ny biljyn-palm, choud’s Zoar.

⁴ As dooyrt y Chiarn rish, Shoh’n cheer vreear mee da Abraham, da Isaac, as da Jacob, gra, Ver-yms eh da dty luight: ta mee er choyrt shilley dhyt jeh, agh cha jed oo harrish huggey.

⁵ Myr shoh hooar Moses sharvaant y Chiarn baase ayns shen, ayns cheer Voab, cordail rish raa’n Chiarn.

⁶ As v’eh er ny oanluckey ayns coan, ayns cheer Voab, er-gerrey da Beth-peor: agh cha vel fys ec dooinney erbee cre’n raad ta e lhiaght, gys y laa t’ayn jiu.

⁷ As va Moses shey-feed bleïn d’eash tra hooar eh baase; cha row e hooill moal, chamoo v’eh er choayl e lheihll.

⁸ As ren cloan Israel dobberan son Moses ayns strahghyn Voab jeih laa as feed: as eisht va laghyn keayney as dobberan son Moses ec kione.

⁹ As va Joshua mac Nun lane jeh’n spyrryd dy chreenaght: son va Moses er lhie e laueyn er: as va cloan Israel ayns biallys da, as ren ad myr va’n Chiarn er harey da Moses.

¹⁰ As cha hrog phadeyr er-dy-henney ayns Israel goll-rish Moses, da ren y Chiarn soilshaghey eh hene eddin dy eddin:

¹¹ Ayns ooilley ny cowraghyn as yindyssyn, hug y Chiarn eh dy yannoo ayns cheer Egypt, rish Pharaoh, as rish ooilley e harvaantyn, as rish ooilley e heer,

¹² As ayns ooilley’n laue pooaral shen, as ayns ooilley ny mirrilyn atchimagh, ren Moses ayns shilley ooilley Israel.