Deuteronomy 33 - Yn Vible Casherick 1775 1819

CAB. XXXIII

¹ As shoh’n bannaght, lesh ren Moses dooinney Yee, cloan Israel y vannaghey, roish e vaase.

² As dooyrt eh, Haink y Chiarn [mârin] veih Sinai, as veih Seir v’eh nyn leeideilagh: ren eh soilshean magh veih cronk Paran, as haink eh lesh jeih thousaneyn jeh e nooghyn: veih e laue yesh hie magh e leigh, ayns aile as taarnagh.

³ V’eh graihagh er e phobble; ta ooilley e nooghyn ayns dty laue: as hoie ad sheese ec dty chassyn; nee ad ooilley goaill-rish dty ghoan.

⁴ Ren Moses leigh y harey dooin; eer eiraght pobble Yacob.

⁵ As v’eh myr ree ayns Jeshurun, tra va leeideilee yn pobble, as tribeyn Israel er nyn jaglym cooidjagh.

⁶ Lhig da Reuben ve bio, as gyn baase y gheddyn; ga dy vel e gheiney beggan ayns earroo.

⁷ As shoh bannaght Yudah: as dooyrt eh, Clasht, Hiarn, rish coraa Yudah, as cur lhiat eh gys e phobble hene; lhig da e laueyn eh y niartaghey, as bee uss e er-coonee, noi e noidyn.

⁸ As mychione Levi dooyrt eh, Lhig da’n Thummim as yn Urim ayd’s [soilshey as slane tushtey] ve er dty er-casherick, ren uss y phrowal ec Massah; rishyn ren oo streeu ec ushtaghyn Meribah;

⁹ Eh dooyrt mychione e ayr, as e voir, Cha ren my hooill cassey ayns briwnys, chamoo ren eh soiagh jeh e vraaraghyn, ny geill y choyrt da e chloan hene: son hug eh tastey da dty ghoo, as dreill eh dty chonaant.

¹⁰ Ad shoh nee dty vriwnyssyn y ynsaghey da Jacob, as dty leigh da Israel: chebbee ad incense kiongoyrt rhyt, as slane oural-losht er dty altar.

¹¹ Bannee, Hiarn, e chooid, jean soiaghey jeh obbyr e laueyn: bwoaill trooid ny meeghyn ocsyn ta girree n’oï, as ta dwoaie oc er, nagh n’irree ad arragh.

¹² As mychione Benjamin dooyrt eh, Nee eshyn shynney lesh y Chiarn cummal dy sauchey liorish; as nee’n Chiarn eshyn y choodaghey fey-ny-laa, as fendeil eh eddyr e gheayltyn.

¹³ As mychione Joseph dooyrt eh, Bannit jeh’n Chiarn dy row’n cheer echeysyn, son ard vannaghtyn niau, son y druight, as son ny diunidyn heese,

¹⁴ As son messyn berchagh bree ny greiney, as bannaghtyn yn eayst,

¹⁵ As son reddyn mie ny shenn sleityn, as son messyn dooie ny croink ard,

¹⁶ As son giootyn berchagh y thallooin, as e phalchey, as son yn aigney-mie echeysyn hoilshee eh hene ayns y thammag ailagh: lhig da’n bannaght cheet er kione Yoseph, as er mullagh y chione echeysyn, v’er ny scarrey veih e vraaraghyn.

¹⁷ Ta’n aalid echey myr y reih dow aeg, as ta e eairkyn myr eairkyn ny unicornyn: as lhieusyn nee eh’n pobble y phuttey dy cheilley, gys ny ardjyn sodjey magh; ad shoh ny jeih thousaneyn dy Ephraim, as ad shoh thousaneyn Vanasseh.

¹⁸ As mychione Zebulun dooyrt eh, Gow boggey, Zebulun, ayns dty gholl magh; as Issachar, ayns dty chabbaneyn.

¹⁹ Nee ad cuirrey yn pobble gys y clieau, ayns shen nee ad chebbal ny ourallyn dy chairys: son nee ad jiole jeh palchey ny marrey, as jeh tashtaghyn follit y traie.

²⁰ As mychione Gad dooyrt eh, Bannit t’eshyn, t’er vishaghey eiraght Ghad: t’eh cummal myr lion, as raipey’n clingan, as mullagh y chione.

²¹ As ghow eh yn chied ayrn myr reih da hene, son shen y raad va e eiraght er ny hickyraghey da [liorish Moses] as haink eh marish leeideilee yn pobble, chooilleen eh cairys y Chiarn, as e vriwnyssyn rish Israel.

²² As mychione Dan dooyrt eh, Ta Dan dunnal myr quallian y lion: nee eh lheim veih Bashan.

²³ As mychione Naphtali dooyrt eh, O Naphtali, jeant magh lesh foayr, as er dty lhieeney lesh bannaght y Chiarn; gow uss possession jeh’n sheear as y jiass.

²⁴ As mychione Asher dooyrt eh, Lhig da Asher ve bannit lesh cloan; lhig da ve ayns foayr rish e vraaraghyn, as lhig da e chass y hummey ayns ooil.

²⁵ Bee yiarn as prash fo dty chassyn; as myr vees dty laghyn, myr shen bee dty niart.

²⁶ Cha vel unnane goll-rish Jee Yeshurun, ta markiagh er niau son dty chooney, as ayns e ard-ooashley er yn aer.

²⁷ Ta’n Jee t’er ve er-dy-rieau dty chemmyrk, as ta e roihaghyn dy bragh farraghtyn dy dty ymmyrkey: as eiyree eh magh yn noid kiongoyrt rhyt, as gra, Stroie ad.

²⁸ Nee Israel eisht cummal dy sauchey er hene: bee farrane Yacob ayns cheer dy arroo as feeyn, nee e niaughyn myrgeddin shilley neose druight.

²⁹ S’maynrey t’ou, O Israel! quoi ta goll rhyt’s, O phobble ta fo coadey’n Chiarn, eilley-caggee dty chooney, as cliwe dty ard-ooashley! as bee dty noidyn er nyn goyrt foyd, as nee oo stampey er ny ynnydyn ardey oc.