Deuteronomy 32 - Yn Vible Casherick 1775 1819

CAB. XXXII

¹ Eaisht-jee, O shiuish niaughyn, as neem’s loayrt; as clasht, O halloo, rish goan my veeal.

² Nee my ynsaghey shilley myr y fliaghey: nee my ghlare tuittym myr y druight as myr y fliaghey meein er lossreeyn oor; as myr ny frassyn er y faiyr:

³ Choud’s ta mee fockley magh ennym y Chiarn: Cur-jee ooashley ard da’n Jee ain.

⁴ Eshyn y Chreg, ta e obbraghyn jeant ayns creenaght erskyn earroo: son ta ooilley e raaidyn briwnys: Jee dy ynrickys, as fegooish mee-chairys; kiart as jeeragh t’eh.

⁵ T’ad er n’yannoo ad hene neu-ghlen, ta’n vroïd oc neu-ghooghyssagh da’n chloan echeysyn: sheeloghe roonagh as camlaagagh ad.

⁶ Nee shoh myr ta shiu dy chooilleeney’n Chiarn, O phobble ommijagh, as mee-cheeayllagh? nagh nee eshyn dty ayr ren dty chionnaghey? nagh nee eshyn ren dty chroo, as dty niartaghey?

⁷ Cooinee er ny shenn earishyn, smooinee er bleeantyn ymmodee sheelogheyn: fênee jeh dty ayr, as inshee eh dhyt; jeh dty henn-ayryn, as soilshee ad dhyt.

⁸ Tra ren yn er smoo syrjey rheynn er ny ashoonyn nyn eiraght, tra skeayl eh mec Adam, hoie eh cagleeyn y pobble, cordail rish earroo cloan Israel.

⁹ Son lesh y Chiarn e phobble; ta Jacob cronney e eiraght.

¹⁰ Hooar eh eh ayns thalloo gennish, as ayns yn aasagh fadane atchimagh: ren eh leeideil eh mygeayrt, dynsee eh da yn raad, choad eh eh, myr clagh e hooilley.

¹¹ Myr ta’n urley gynsaghey yn aalagh eck dy etlagh, clussaghey harrishdoo, skeayley e skianyn er-nyn-skyn, goaill ad, as gymmyrkey ad er e skianyn;

¹² Myr shen va’n Chiarn ny-lomarcan e leeideilagh; as mârish cha row jee erbee joarree.

¹³ Hug eh da dy varkiagh ayns ardjyn s’ooasle y thallooin, dy voddagh eh gee mess ny magheryn, as hug eh da dy hoo mill ass y chreg, as ooil ass y chreg flint.

¹⁴ Eeym ny baa, as bainney keyrragh, lesh meeaylys eayin, as reaghyn jeh dooghys Vashan, as goair, lesh flooyr y churnaght s’glenney, as ren oo giu fuill glen y smeyr-feeyney.

¹⁵ Agh daase Jeshurun roauyr, as ren eh brebbal: t’ou uss er n’aase roauyr, as t’ou er n’ghoaill thummyd, t’ou coodit lesh saill; eisht hreig eh Jee ren eh y chroo, as hoie eh beg jeh creg e haualtys.

¹⁶ Ren ad eh y vrasnaghey gys corree, lesh jeeghyn joarree, lesh nyn obbraghyn eajee vrasnee ad eh.

¹⁷ Heb ad ourallyn gys jouyil, cha nee gys Jee; gys jeeghyn nagh bione daue, gys jeeghyn noa soit seose, daue nagh dug nyn ayraghyn ooashley.

¹⁸ Er y Chiarn ren dty gheddyn, cha vel oo er chooinaghtyn, as y Jee ren dty chroo t’ou er yarrood.

¹⁹ As tra honnick y Chiarn shoh, hug eh dwoaie daue, kyndagh rish peccaghyn brasnee e vec, as e inneenyn.

²⁰ As dooyrt eh, M’eddin neem’s y hyndaa voue, as hee-ym cre’n erree hig orroo: son sheeloghe feer frowartagh ad, cloan nagh vel veg y treisht orroo.

²¹ T’ad er my ghreinnaghey gys corree, lesh shen nagh nee jee eh, t’ad er m’ vrasnaghey gys jymmoose, lesh nyn jallooyn: as neem’s adsyn y ghreinnaghey gys eadaghey lioroosyn nagh nee pobble ad, nee’m ad y vrasnaghey gys corree lesh ashoon fardalagh.

²² Son ta aile er vrishey magh ayns my yymmoose, nee lostey gys y diunid sodjey sheese, as ver eh mow yn thalloo, lesh e bishagh, as ver eh aile fo undinyn ny sleityn.

²³ Neem’s kerraghey er kerraghey y lhieeney orroo, nee’m my hideyn y vaarail orroo.

²⁴ Bee ad losht lesh gortey, as er nyn stroie lesh smarageyn loshtee, as lesh toyrt-mow atchimagh: lhig-ym feayshlit orroo myrgeddin feeacklyn beishtyn feïe, lesh pyshoon ard-nieughyn ny hooirey.

²⁵ Nee’n cliwe cheu-mooie, as atchim cheu-sthie stroie chammah’n dooinney aeg as y moidyn, yn oikan myrgeddin, as y kione lheeah.

²⁶ Dooyrt mee, Dy jinnin ad y skeayley dys corneilyn, dy jinnin yn imraa jeu dy ve caillit mastey deiney:

²⁷ Agh lhig mee lhieu er coontey’n noid, nagh jinnagh nyn noidyn gymmyrkey ad hene dy mooaralagh, as gra, Niart nyn laue hene, as cha nee’n Chiarn, t’er n’yannoo ooilley shoh.

²⁸ Son ashoon ad nagh gow coyrle, chamoo ta veg y tushtey ayndoo.

²⁹ O dy beagh ad creeney, dy doiggagh ad shoh, dy goghe ad gys nyn gree nyn laghyn jerrinagh!

³⁰ Nagh jinnagh eisht un dooinney gimman ersooyl thousane, as daa ghooinney jeih thousaneyn, agh dy row nyn Greg er chreck ad, as y Chiarn er n’yeigh ad seose?

³¹ Son cha vel y chreg ocsyn myr y Chreg ainyn, eer ayns briwnys nyn noidyn hene.

³² Son ta’n billey-feeyney ocsyn ny smessey na billey-feeyney Sodom, as magheryn Ghomorrah: ta ny smeyr-feeyney oc gall, ta ny dossanyn oc sharroo.

³³ Ta’n feeyn oc pyshoon dragonyn, as gah baasoil ard-nieughyn.

³⁴ Nagh vel shoh tashtit seose aym ayns stoyr, as sealit seose mastey my hashtaghyn?

³⁵ Dooys ta bentyn kerraghey, as cooilleeney, nee’n chass oc skyrrey ayns traa cooie: son ta laa nyn dreihys er-gerrey, as ta ny reddyn hig orroo cheet dy tappee.

³⁶ Son nee’n Chiarn briwnys e phobble, as bee chymmey echey er e harvaantyn; tra hee eh dy vel y phooar oc er n’immeeaght, as nagh vel veg y chooney faagit nyn gour.

³⁷ As nee eh gra, Cre vel ny jeeghyn oc, yn chreg er hug ad nyn marrant,

³⁸ Ren gee meeaylys nyn ourallyn, as giu feeyn ny chebballyn-jough oc? lhig daue troggal orroo, as cooney lhieu, as ve nyn gemmyrk.

³⁹ Jeeagh-jee nish, dy nee mish, eer mish ny-lomarcan eh, as cha vel ayn jee erbee mârym: mish ta coyrt baase, as bioys; mish ta coyrt chingys, as slaynt: chamoo ta fer erbee oddys livrey ass my laue.

⁴⁰ Son ta mee troggal seose my laue gys niau, as gra, Ta mee bio son dy bragh.

⁴¹ My ver-ym foyr er my chliwe sollys, as my nee my laue goaill greme er briwnys; goym kerraghey er my noidyn, as cooilleeney orroosyn ta dwoaie oc orrym.

⁴² Nee’m my hideyn er-meshtey lesh fuill, (as nee my chliwe feill my noidyn y stroie) as shen, lesh fuill ny merriu, as ny cappeeyn, veih toshiaght gys jerrey kerraghey er y noid.

⁴³ Gow-jee boggey, marish e phobble, O shiuish ashoonyn: son nee eh cooilleeney ’ghoaill son fuill e harvaantyn, as kerraghey er e noidyn, as bee eh myghinagh da e heer, as da e phobble.

⁴⁴ As haink Moses, as loayr eh ooilley goan yn arrane shoh, ayns slane clashtyn yn pobble, eshyn as Joshua mac Nun.

⁴⁵ As ren Moses jerrey er loayrt ooilley ny goan shoh rish ooilley Israel.

⁴⁶ As dooyrt eh roo, Soie-jee nyn greeaghyn er ooilley ny goan shoh, ta mee coyrt reue er y laa shoh; ver shiu currym er nyn gloan dy choyrt tastey daue, as dy chooilleeney ooilley goan y leigh shoh.

⁴⁷ Son cha nee red fardalagh eh diu: er-yn-oyr dy vel nyn mioys lhie er; son liorish shoh bee ny laghyn eu beayn ’sy cheer, huggey t’ou goll harrish Jordan, dy gheddyn eiraght ayn.

⁴⁸ As loayr y Chiarn rish Moses er y laa cheddin, gra,

⁴⁹ Fow seose er y slieau Abarim, gys cronk Nebo, t’ayns cheer Voab, ta jeeragh er Jericho; as gow shilley jeh cheer Chanaan, ta mee dy choyrt da cloan Israel son eiraght.

⁵⁰ As yiow baase er y chronk, huggey t’ou goll seose, as bee oo er dty haglym gys dty gheiney; myr hooar Aaron dty vraar baase er cronk Hor, as v’eh oanluckit myr e gheiney:

⁵¹ Son dy ren shiu peccah m’oï, mastey cloan Israel, ec ushtaghyn Meribah-kadesh, ayns faasagh Zin; son nagh ren shiu m’y chasherickey, fenish cloan Israel.

⁵² Ny-yeih hee oo yn cheer royd, agh cha jed oo stiagh ’sy cheer, ta mish dy choyrt da cloan Israel.