Deuteronomy 30 - Yn Vible Casherick 1775 1819

CAB. XXX

¹ As hig eh gy-kione, erreish da ooilley ny reddyn shoh v’er jeet ort, yn bannaght as y mollaght, ta mee er hoiaghey royd, as tra chooinys oo orroo, mastey ny ashoonyn, huc ta’n Chiarn dty Yee er n’eiyrt oo,

² As oo dy hyndaa gys y Chiarn dty Yee, as biallys y choyrt da e choraa, ayns ooilley ny ta mee sarey dhyt jiu, oo hene, as dty chloan, lesh ooilley dty chree, as lesh ooilley dty annym.

³ Dy jean y Chiarn dty Yee chyndaa dty chappeeys, as bee chymmey echey ort, as nee eh meiyghey, as chaglym shiu ass dy chooilley ashoon, nyn vud ta’n Chiarn dty Yee er dty skeayley.

⁴ My ta veg jeh dty heeloghe er nyn imman magh er feaï-ny-cruinney, veih shen nee’n Chiarn dty Yee dty haglym, as voish shen ver eh lesh oo.

⁵ As ver y Chiarn dty Yee lesh oo reesht gys cheer eiraght dty ayraghyn, as yiow cummal ayn: as bee eh mie rhyt, as oo y vishaghey erskyn dty ayraghyn.

⁶ As nee’n Chiarn dty Yee dty chree y yiarey-chymmylt, as cree dty luight, dy choyrt graih da’n Chiarn dty Yee, lesh ooilley dty chree, as lesh ooilley dt’annym, dy vod oo ve beayn.

⁷ As ver y Chiarn dty Yee ooilley ny mollaghtyn shoh er dty noidyn, as orroosyn ta dwoaie oc ort, ren tranlaase ort.

⁸ As nee oo chyndaa reesht, as coyrt biallys da coraa’n Chiarn, as cooilleeney ooilley e annaghyn, ta mee jiu dy dty harey.

⁹ As nee’n Chiarn oo y vishaghey ayns ooilley obbraghyn dty laue, ayns sluight dty chorp, ayns ingan dty vaase, as ayns dty vess hallooin son dty vie: son nee’n Chiarn boggey ’ghoaill jeed reesht, son foays dhyt, myr ghow eh boggey jeh dty ayraghyn:

¹⁰ My eaishtys oo rish coraa’n Chiarn dty Yee, dy reayll e annaghyn, as e lattyssyn, ta scruit ayns lioar y leigh shoh; as my nee oo chyndaa gys y Chiarn dty Yee, lesh ooilley dty chree, as lesh ooilley dty annym.

¹¹ Son yn anney shoh, ta mee dy harey dhyt jiu, cha vel eh follit voïd, chamoo te foddey jeh.

¹² Cha nee ayns niau te, dy niarragh oo, Quoi hed seose gys niau er nyn son, dy choyrt lesh hooin eh, dy vod mayd clashtyn, as jannoo eh?

¹³ Chamoo te cheu elley jeh’n aarkey, dy niarragh oo, Quoi hed harrish y cheayn er nyn son, dy choyrt lesh hooin eh, dy vod mayd clashtyn, as jannoo eh?

¹⁴ Agh ta’n ghoo feer faggys dhyt, ayns dty veeal, as ayns dty chree, dhyt dy chooilleeney eh.

¹⁵ Jeeagh, ta mee er hoiaghey royd yn laa jiu bea as mie, baase as olk:

¹⁶ Liorish dy vel mee dy dty harey jiu, dy choyrt graih da’n Chiarn dty Yee, dy immeeaght ayns e raaidyn, as dy reayll e annaghyn, as e lattyssyn, as e vriwnyssyn, dy vod oo ve beayn, as bishaghey: as nee’n Chiarn dty Yee oo y vannaghey ’sy cheer, huggey t’ou goll dy chummal ayn.

¹⁷ Agh my nee dty chree chyndaa ersooyl, myr shen nagh n’eaisht oo, agh dy bee oo cleaynit dy choyrt ooashley da jeeghyn elley, as dy hirveish ad:

¹⁸ Ta mee fockley magh diu yn laa jiu, dy jed shiu son shickyrys naardey, as nagh bee ny laghyn eu beayn ’sy cheer, huggey ta shiu goll harrish Jordan, dy ve dty eiraght.

¹⁹ Ta mee goaill niau as thalloo son feanish nyn ’oï, yn laa t’ayn jiu, dy vel mee er hoiaghey reue bea as baase, bannaght as mollaght: shen-y-fa gow bea myr reih, dy vod chammah oo hene as dty luight ve beayn:

²⁰ Dy vod oo graih y choyrt da’n Chiarn dty Yee, as ve biallagh gys e choraa, as dy vod oo lhiantyn huggey [son eshyn dty vioys, as lhiurid dty laghyn] dy vod oo cummal ayns y cheer, vreear y Chiarn da dty ayraghyn, da Abraham, da Isaac, as da Jacob, dy choyrt daue.