Deuteronomy 3 - Yn Vible Casherick 1775 1819

CAB. III

¹ Eisht hyndaa shin, as hie shin seose raad Vashan: as haink Og ree Vashan, as ooilley e gheiney magh nyn ’oï, dy chaggey ec Edrei.

² As dooyrt y Chiarn rhym’s, Ny gow aggle roish: son neem’s eshyn, as ooilley e gheiney, as e heer y livrey gys dty laue, as nee oo rishyn, myr ren oo rish Sihon ree ny Amoriteyn, va cummal ec Heshbon.

³ Myr shoh ren y Chiarn nyn Yee rish Og ree Vashan myrgeddin, as ooilley e phobble y livrey gys nyn laue: as woaill shin eh, derrey nagh daag shin veg er-mayrn.

⁴ As ghow shin ooilley e ard-valjyn ec y traa shen, cha row ard-valley nagh ghow shin voue, three-feed ard-valley, ooilley cheer Argob, reeriaght Og ayns Bashan.

⁵ Va ooilley ny ard-valjyn shoh er nyn niartaghey lesh voallaghyn ard, giattyn as barryn, marish ymmodee baljyn foshlit.

⁶ As stroie shin ad dy bollagh, myr ren shin rish Sihon ree Heshbon, dy bollagh stroie deiney, mraane, as cloan dy chooilley ard-valley.

⁷ Agh ooilley’n maase, as cragh ny ard-valjyn, ghow shin son spooilley dooin hene.

⁸ As ghow shin ec y traa shen, ass laue daa ree ny Amoriteyn, yn thalloo va er cheu shoh dy Yordan; veih’n awin Arnon gys cronk Hermon:

⁹ (Yn Hermon cheddin ta ny Sidonianee genmys Sirion: as ta ny Amoriteyn genmys eh Shenir.)

¹⁰ Ooilley ard-valjyn yn cheer-rea, as ooilley Gilead, as ooilley Bashan, gys Salchah as Edrei, ard-valjyn reeriaght Og ayns Bashan:

¹¹ Son cha row agh Og ree Vashan er-mayrn jeh sluight ny foawir; cur-my-ner, va e sthoc-lhiabbagh, sthoc-lhiabbagh yiarn: nagh vel eh ayns Rabbath jeh cloan Ammon? va’n lhiurid echey nuy cubityn, as e lheead kiare cubityn, lurg cubit dooinney.

¹² As y cheer shoh, v’ayns nyn gummal ec y traa shen, veih Aroer, ta rish awin Arnon, as lieh chronk Ghilead, lesh ny ard-valjyn echey, hug mee da ny Reubeniteyn, as ny Gaditeyn.

¹³ As y chooid elley jeh Gilead, as ooilley Bashan, va reeriaght Og, hug mee da lieh-tribe Vanasseh; ooilley cheer Argob, lesh slane Bashan, va enmyssit cheer ny foawir.

¹⁴ Ghow Jair mac Vanasseh ooilley cheer Argob, choud’s ardjyn Geshuri, as Maachathi, as denmys eh ad lurg e ennym hene, Bashan-havoth-jair, gys y laa jiu.

¹⁵ As hug mee Gilead da Machir.

¹⁶ As da ny Reubeniteyn, as da ny Gaditeyn, hug mee veih Gilead eer choud’s awin Arnon, lieh’n choan, as y slyst, eer choud’s yn awin Jabbok, ta cagliagh cloan Ammon:

¹⁷ Yn thalloo-rea myrgeddin, as Jordan, as ny ardjyn echey, eer veih Chinnereth choud’s faarkey’n strah, eer yn Faarkey Sailley, fo Ashdoth-pisgah, my-hiar.

¹⁸ As hug mee currym erriu ec y traa shen, gra, Ta’n Chiarn nyn Yee er choyrt diu yn cheer shoh, dy chummal ayn: hed shiu ooilley ny ta cooie son caggey magh armit, roish nyn mraaraghyn cloan Israel.

¹⁹ Agh faagee shiu nyn mraane, as nyn gloan veggey, as nyn maase (son ta fys aym dy vel ymmodee maase eu) ayns ny ard-valjyn, ta mee er choyrt diu;

²⁰ Derrey ver y Chiarn shee da nyn mraaraghyn, chammah as diuish, as derrey yiow adsyn myrgeddin cummallyn ayns y cheer, ta’n Chiarn nyn Yee er choyrt daue cheu elley dy Yordan: as eisht nee dy chooilley ghooinney jiu chyndaa gys e eiraght, ta mee er choyrt diu.

²¹ As doardee mee Joshua ec y traa shen, gra, Ta dty hooillyn er vakin ooilley ny ta’n Chiarn y Jee eu er n’yannoo rish y daa ree shoh: lheid cheddin nee’n Chiarn rish ooilley ny reeriaghtyn, raad t’ou goll.

²² Ny gow-jee aggle roue: son nee’n Chiarn y Jee eu caggey er nyn son.

²³ As ghuee mee gys y Chiarn ec y traa shen, gra,

²⁴ O Hiarn Yee, t’ou er n’yannoo toshiaght dy hoilshaghey da dty harvaant dty phooar, as dty laue niartal: son quoi’n Jee, edyr ayns niau ny er y thalloo, oddys jannoo cordail rish dty obbraghyn, as cordail rish dty niart?

²⁵ Ta mee guee ort, lhig dou goll harrish, as shilley ’gheddyn jeh’n cheer mie shen ta cheu elley dy Yordan, yn slieau aalin shen, Lebanon.

²⁶ Agh va’n Chiarn jymmoosagh rhym’s kyndagh riuish, as cha n’eaishtagh eh rhym: as dooyrt y Chiarn rhym, S’lioar dhyt; ny loayr rhym arragh jeh’n chooish shoh,

²⁷ Fow seose gys mullagh Phisgah, as trog seose dty hooillyn lesh y sheear, as lesh y twoaie, as lesh y jiass, as lesh y shiar, as cronnee eh lesh dty hooillyn: son cha jed oo harrish yn Jordan shoh.

²⁸ Agh cur currym da Joshua, as cur cree ayn, as niartee eh; son nee eshyn leeideil y pobble shoh harrish, as ver eh eiraght daue ’sy cheer, yiow shilley jeh.

²⁹ Er shoh chum shin ’sy choan, ta liorish Beth-peor.