Deuteronomy 29 - Yn Vible Casherick 1775 1819

CAB. XXIX

¹ Shoh goan y chonaant, hug y Chiarn currym er Moses dy yannoo rish cloan Israel ayns cheer Voab, cheu-mooie jeh’n chonaant ren eh roo ayns Horeb.

² As hug Moses eam da ooilley Israel, as dooyrt eh roo, Ta shiu er vakin ooilley ny ren y Chiarn kiongoyrt rish nyn sooillyn, ayns cheer Egypt, rish Pharaoh, as rish ooilley e harvaantyn, as rish ooilley e heer:

³ Ny prowallyn mooarey, ta dty hooillyn er vakin, ny cowraghyn, as ny mirrilyn mooarey shen:

⁴ Ny-yeih, cha vel y Chiarn er choyrt diu cree dy hoiggal, ny sooillyn dy akin, ny cleayshyn dy chlashtyn, gys y laa jiu.

⁵ As ta mee er leeideil shiu rish da-eed bleïn ayns yn aasagh: cha daase nyn eaddagh shenn erriu, as cha row dty vraag raipit er dty chass.

⁶ Cha vel shiu er veaghey er arran, ny er n’iu feeyn, ny jough lajer: dy voddagh fys ’ve eu, dy nee mish y Chiarn nyn Yee.

⁷ As tra haink shiu gys yn ynnyd shoh, haink Sihon ree Heshbon, as Og ree Vashan, magh dy chaggey nyn ’oï, as hooar shin y varriaght orroo:

⁸ As ghow shin y cheer oc, as hug shin eh son eiraght da ny Reubeniteyn, as da ny Gaditeyn, as da lieh-tribe Vanasseh.

⁹ Freill-jee, er-y-fa shen, goan y chonaant shoh, as jean-jee ad, dy vod dy chooilley nhee, ta shiu dy yannoo, cheet lhieu.

¹⁰ Ta shiu ooilley nyn shassoo jiu, fenish y Chiarn y Jee eu; captanyn nyn tribeyn, nyn shanstyr, as nyn offishearyn, as ooilley deiney Israel,

¹¹ Nyn vooinjer veggey, nyn mraane, as y joarree t’ayns dty champ, veih’n giareyder-fuygh, gys y tayrneyder-ushtey.

¹² Dy ragh oo ayns conaant rish y Chiarn dty Yee, as e vreearrey, ta’n Chiarn dty Yee dy yannoo rhyt yn laa jiu:

¹³ Dy dty hoiaghey seose nish son pobble da hene, as eh dy ve yn Jee ayd’s, myr dooyrt eh rhyt, as myr t’eh er vreearrey da dty ayraghyn, da Abraham, da Isaac, as da Jacob.

¹⁴ As cha nee riuish ny-lomarcan ta mee jannoo’n conaant, as y breearrey shoh;

¹⁵ Agh rishyn, ta shassoo ayns shoh mârin jiu fenish y Chiarn nyn Yee, as myrgeddin rishyn, nagh vel ayns shoh nish mârin:

¹⁶ (Son ta fys eu, kys ren shin farrail ayns cheer Egypt, as kys haink shin trooid ny ashoonyn, ta shin er vaagail nyn yeï.

¹⁷ As ta shiu er vakin ny obbraghyn eajee, as ny jallooyn oc, fuygh as clagh, argid as airh, va ny mast’ oc.)

¹⁸ Nagh bee ny mast’ eu dooinney, ny ben, ny lught-thie, ny tribe, ta ayns nyn gree chyndaa ersooyl veih’n Chiarn nyn Yee, dy gholl dy hirveish jeeghyn ny ashoonyn shoh; nagh bee ny mast’ eu fraue ta gymmyrkey gall as ullymar,

¹⁹ As dy jig eh gy-kione, tra chlinnys eh goan yn mollaght shoh, as dy jean eh sheeaney eh hene ayns e chree, gra, Bee shee aym, ga dy vel mee gimmeeaght lurg drogh smooinaghtyn my chree hene, dy choyrt meshteyllys gys paays:

²⁰ Cha lhig y Chiarn lesh, agh nee corree’n Chiarn, as e eadolys eisht lossey noi’n dooinney shen, as nee ooilley ny mollaghtyn, ta scruit ’sy lioar shoh, lhie er, as nee’n Chiarn e ennym y gholley ass veih fo niau.

²¹ As nee’n Chiarn eh y scarrey gys yn olk, veih mastey ooilley tribeyn Israel, cordail rish ooilley mollaghtyn y chonaant, ta scruit ayns leighyn y lioar shoh:

²² Ayns wheesh as dy jir sheeloghe nyn glienney hig nyn yeï, as y joarree, hig veih cheer foddey, tra hee ad briwnyssyn trome y cheer shen, as ny doghanyn ta’n Chiarn er choyrt er;

²³ As dy vel ooilley’n thalloo echey, brimstone, as sollan, as lostey: nagh vel eh cuirt, ny gymmyrkey mess, ny veg y faiyr gaase ayn, casley rish toyrt-mow Sodom, as Gomorrah, Admah, as Zeboim, ta’n Chiarn er stroie ayns e chorree, as e yymmoose:

²⁴ Eer dy jir dagh ashoon, Cre’n-fa ta’n Chiarn er n’yannoo myr shoh rish y cheer shoh? cre’n-oyr va son chiass y jymmoose hrome shoh?

²⁵ As yiow ad ansoor, Te, son dy vel ad er hreigeil conaant Chiarn Jee nyn ayraghyn, ren eh roo, tra hug eh lesh ad magh ass cheer Egypt.

²⁶ Son hie ad, as hirveish ad jeeghyn elley, as hug ad ooashley daue, jeeghyn nagh bione daue, as nagh row lowit daue.

²⁷ As va corree’n Chiarn er ny ghreesaghey noi’n cheer, dy choyrt er ooilley ny mollaghtyn, ta scruit ’sy lioar shoh.

²⁸ As dastyr y Chiarn ad ass y cheer oc ayns e arg, as ayns e chorree, as ayns e yymmoose vooar, as hilg eh magh ad gys cheer elley, myr s’erree daue jiu.

²⁹ Ta folliaghtyn bentyn gys y Chiarn nyn Yee; agh ta ny reddyn shen ta er ny hoilshaghey, bentyn dooinyn, as da nyn gloan son dy bragh, dy vod mayd ooilley goan y leigh shoh y chooilleeney.