Deuteronomy 28 - Yn Vible Casherick 1775 1819

CAB. XXVIII

¹ As hig eh gy-kione, my nee oo geaishtagh dy imneagh rish coraa’n Chiarn dty Yee, dy reayll as dy chooilleeney ooilley e oardaghyn, ta mee dy harey dhyt jiu, dy jean y Chiarn dty Yee oo y hoiaghey seose erskyn ooilley ashoonyn y theihll.

² As hig ooilley ny bannaghtyn shoh ort, as berree ad ort, my eaishtys oo rish coraa’n Chiarn dty Yee.

³ Bannit vees oo ’syn ard-valley, as bannit vees oo ’sy vagher.

⁴ Bannit vees sluight dty chorp, as mess dty hallooin, as ingan dty vaase, as dty ollagh, as dty hioltaneyn keyrragh.

⁵ Bannit vees dty vaskad, as dty stoyr.

⁶ Bannit vees oo, tra hig oo stiagh, as bannit vees oo, tra hed oo magh.

⁷ Ver y Chiarn er dty noidyn, ta troggal seose dt’oï, dy ve bwoailt kiongoyrt rish dt’eddin: hig ad magh dt’oï un raad, as nee ad chea royd shiaght raaidyn.

⁸ Nee’n Chiarn sarey bannaght ort, ayns dty hoaltyn, as ayns ooilley ny t’ou coyrt dty laue huggey: as nee eh dty vannaghey ’sy cheer, ta’n Chiarn dty Yee dy choyrt dhyt.

⁹ Nee’n Chiarn dty niartaghey son pobble casherick da hene, myr t’eh er vreearrey, my reayllys oo annaghyn y Chiarn dty Yee, as gimmeeaght ayns e raaidyn.

¹⁰ As nee ooilley ashoonyn y theihll fakin, dy vel oo er dty enmys er y Chiarn, as bee aggle orroo royd.

¹¹ As nee’n Chiarn uss y vishaghey ayns cooid, ayns sluight dty chorp, as ayns ingan dty vaase, as ayns mess dty hallooin, ayns y cheer vreear y Chiarn da dty ayraghyn dy choyrt dhyt.

¹² Nee’n Chiarn fosley dhyt e hashtaghyn mie; yn aer, dy choyrt fliaghey er dty halloo ayns e imbagh, as dy vannaghey ooilley obbraghyn dty laue: as nee oo geeasagh da ymmodee ashoonyn, as cha jean oo goaill er eeasaght.

¹³ Nee’n Chiarn uss y toshiaght, as cha nee’n jerrey; as bee oo er yn eaghtyr, as cha nee fo: my eaishtys oo rish oardaghyn y Chiarn dty Yee, ta mee dy harey dhyt’s jiu, dy reayll as dy yannoo ad:

¹⁴ As cha jyndaa oo dy lhiattee, veih veg jeh ny goan ta mee dy harey dhyt jiu, gys y laue yesh, ny gys y laue chiare, dy gholl geiyrt er jeeghyn elley dy hirveish ad.

¹⁵ Agh hig eh gy-kione, mannagh n’eaisht oo rish coraa’n Chiarn dty Yee, dy reayll dy tastagh ooilley e oardaghyn, as e lattyssyn ta mish dy harey dhyt jiu; dy jig ooilley ny mollaghtyn shoh ort, as berree ad ort.

¹⁶ Bee mollaght ort ’syn ard-valley, as bee mollaght ort ’sy vagher.

¹⁷ Bee mollaght er dty vaskad, as dty stoyr.

¹⁸ Bee mollaght er sluight dty chorp, as messyn dty hallooin, ingan dty ollagh, as dty hioltaneyn keyrragh.

¹⁹ Bee mollaght ort, tra t’ou cheet stiagh, as bee mollaght ort, tra t’ou goll magh.

²⁰ Ver y Chiarn ort kerraghey trome, sproght, as toyrt-mow, ayns dy chooilley nhee t’ou goaill ayns laue; derrey vees oo er dty stroie, as derrey nee oo dy leah cherraghtyn; kyndagh rish olkys dt’obbraghyn, lioroo t’ou er m’y hreigeil.

²¹ Ver y Chiarn er y chramp dy lhiantyn dhyt, derrey t’eh er dty choyrt mow ass y cheer, raad t’ou goll dy chummal.

²² Nee’n Chiarn uss y woalley lesh doghan gyn-lheihys, as lesh y chiassaghey, as lesh att, as lesh chiass loshtee, as lesh y chliwe, as lesh blest, as lesh mergey: as lhiannee ad dhyt, derrey hed oo naardey.

²³ As bee’n aer, ta erskyn dty chione, myr prash, as y thalloo, ta fo dty chassyn, myr yiarn.

²⁴ Nee’n Chiarn jannoo fliaghey dty halloo poodyr as joan: veih niau hig eh neose ort, derrey vees oo er dty stroie.

²⁵ Ver y Chiarn ort dy ve er dty imman roish dty noidyn: hed oo magh un raad nyn ’oï, as chea ersooyl rhymboo shiaght raaidyn, as bee shiu skeaylt fud ooilley reeriaghtyn y thallooin.

²⁶ As bee dty challin son beaghey, da ooilley eeanlee’n aer, as da beishtyn ny hooirey, as cha jean dooinney erbee nyn agglaghey ersooyl.

²⁷ Nee’n Chiarn oo y woalley lesh askaidyn Egypt, lesh ny pileyn, as lesh y screb, as lesh y taghys, nagh vod v’er ny lheihys.

²⁸ Nee’n Chiarn oo y woalley lesh mee-cheïlid, as dellid, as lesh angaish cree.

²⁹ Nee oo loagan ec y vun-laa, myr ta’n doal ’sy dorraghys, as ny t’ou goaill ayns laue, cha jig eh lhiat: as bee uss dy kinjagh tranlaasit, as spooillit, as cha bee fer-coonee ayd.

³⁰ Nee oo ben y phoosey, as nee dooinney elley ’ghoaill ee; nee oo thie y hroggal, as cha jean oo cummal ayn: nee oo garey-feeyney y hoiaghey, as cha deiy oo yn mess echey.

³¹ Bee dty ghow er ny varroo roish dty hooillyn, as cha n’ee oo veg jeh: bee dty assyl er ny ghoaill ersooyl er niart, kiongoyrt rish dty eddin, as cha vow arragh eh: bee ny kirree ayd er nyn goyrt da dty noidyn, as cha bee fer ayd dy chosney roue ad.

³² Bee dty vec, as dt’inneenyn er nyn goyrt da pobble joarree, as faillee dty hooillyn, lesh jeeaghyn, as lesh goaill foddeeaght nyn yeï fey-ny-laa: as cha bee niart erbee ayns dty laue.

³³ Mess dty halloo, as ooilley dty laboragh, nee ashoon, nagh nhione dhyt, gee seose; as bee oo tranlaasit, as freilt fo-chosh dy kinjagh:

³⁴ Myr shen dy bee oo ass dty cheeayll, lesh ny shillaghyn vees roish dty hooillyn.

³⁵ Nee’n Chiarn oo y woalley ayns dty ghlioonyn, as ayns dty lurgaghyn, lesh chingyn gonnagh, nagh vod v’er nyn lheihys, veih boyn dty choshey gys mullagh dty ching.

³⁶ Nee’n Chiarn oo hene, as y ree ver oo harryd, y livrey gys ashoon, vees joarree dhyt’s, as da dty ayraghyn: as ayns shen nee shiu shirveish jeeghyn elley, fuygh as clagh.

³⁷ As hig oo dy ve son atchim, as son an-ghoo, as son oltooan, mastey ooilley ny ashoonyn, huc nee’n Chiarn oo y eebyrt.

³⁸ Ver oo lhiat mooarane rass magh gys y vagher, agh s’beg ver oo stiagh: son ver y locust eh naardey.

³⁹ Nee oo garaghyn-feeyney y hoiaghey as lhiasaghey, agh cha jean oo edyr giu jeh’n feeyn, ny’n mess y haglym: son ver ny praddagyn mow ad.

⁴⁰ Bee biljyn-olive ayd ayns ooilley dty ardjyn, agh cha jean oo oo-hene y ooilaghey: son nee dty villey-olive skah e vess.

⁴¹ Nee oo mec as inneenyn y gheddyn, agh cha bee boggey ayd jeu, son hed ad gys cappeeys.

⁴² Ooilley dty viljyn as dty vess hallooin ver yn locust naardey.

⁴³ Yiow’n joarree, ta cummal mayrt, seose foddey er-dty-skyn: as hig uss sheese feer injil.

⁴⁴ Ver eshyn er eeasaght dhyt’s, agh cha bee uss son geeasagh dasyn: eshyn vees y chione, as uss yn arbyl.

⁴⁵ As hig ooilley ny mollaghtyn shoh ort, as eiyree ad, as berree ad ort, derrey hed oo naardey: son nagh deaisht oo rish coraa’n Chiarn dty Yee, dy reayll ny annaghyn as ny slattyssyn ren eh dty harey.

⁴⁶ As bee ad ort, son cowrey, as son yindys, as er dty luight son dy bragh.

⁴⁷ Er-yn-oyr nagh ren oo yn Chiarn dty Yee y hirveish, lesh boggey, as lesh gennallys cree, son palchey jeh dy chooilley nhee:

⁴⁸ Shen-y-fa, nee oo shirveish dty noidyn, ver y Chiarn dt’oï, ayns genney arran, as ushtey, rooisht, as ayns feme jeh dy chooilley nhee: as ver eh yn whing yiarn er dty wannal, derrey t’eh er dty choyrt mow.

⁴⁹ Ver y Chiarn lesh ashoon dt’oï veih foddey, veih ardjyn sodjey magh y theihll, cha bieau as ta’n urley getlagh, ashoon, nagh doig oo yn ghlare oc:

⁵⁰ Ashoon lesh eddin ghewil, nagh der geill da persoon y chenndeeaght, ny jeeaghyn foayr da’n aegid.

⁵¹ As nee eh gee ingan dty vaase, as mess dty halloo, derrey vees oo stroit: cha vaag eh dhyt arroo, feeyn, ny ooil, ny bishagh dty ollagh, ny dty hioltaneyn keyrragh, derrey t’eh er dty stroie.

⁵² As nee eh oo y hionney stiagh lesh caggey ayns ooilley dty yiattyn, derrey t’eh er lhieggal ooilley dty voallaghyn ard as lajer, huc v’ou coyrt dty varrant, trooid ooilley dty heer; as nee eh uss y chruinnaghey stiagh ayns ooilley dty yiattyn, trooid ooilley’n cheer, ta’n Chiarn dty Yee er choyrt dhyt.

⁵³ As nee oo gee sluight dty chorp hene, feill dty vec as dty inneenyn (ta’n Chiarn dty Yee er choyrt dhyt) ayns y chaggey, as ayns y chennid, lesh nee dty noidyn dty heaghney:

⁵⁴ Myr shen, y dooinney ta feer seyr as jesheenagh ny-vud eu, bee drogh hooill echey gys e vraar, as da ben e oghrish, as da e chloan vees er-mayrn:

⁵⁵ Ayns wheesh, as dy jean eh mooaraghey, dy choyrt daue ayrn jeh feill e chloan, nee eh hene gee: er-yn-oyr nagh vel arragh echey dy ghoaill ayns y chaggey, as ayns y chennid, lesh nee dty noidyn oo y hionney stiagh ayns ooilley dty ard-valjyn.

⁵⁶ Yn ven seyr as mettey ny mast’ eu nagh jinnagh e cass y choyrt er y laare son moyrn as mettey-ys, bee drogh hooill eck gys sheshey e oghrish, gys e mac, as gys e inneen,

⁵⁷ As gys yn oikan noa-ruggit, as e cloan ver ee son y theihll: son nee ee gee ad dy follit, son feme jeh dy chooilley veaghey, ayns y chruinnid chione-caggee, lesh nee dty noidyn oo y heaghney ayns dty ard-valjyn.

⁵⁸ Mannagh bee oo imneagh dy chooilleeney ooilley goan y leigh shoh, ta scruit ’sy lioar shoh, dy vod aggle ’ve ort roish yn ennym gloyroil as agglagh shoh, YN CHIARN DTY YEE;

⁵⁹ Nee’n Chiarn jannoo dty phlagueyn yindyssagh, as plagueyn dty luight, dy jarroo plagueyn mooarey, as foddey farraghtyn, as doghanyn trome, as foddey farraghtyn.

⁶⁰ As ver eh lesh ort ooilley plagueyn Egypt, v’ou ayns aggle roue; as lhiannee ad dhyt.

⁶¹ Myrgeddin dy chooilley hingys, as dy chooilley phlague, nagh vel scruit ayns lioar y leigh shoh, ad shoh ver y Chiarn lesh ort, derrey vees oo er dty stroie.

⁶² As bee shiu faagit beggan ayns earroo, ga dy row shiu myr rollageyn yn aer ayns earroo: er-yn-oyr nagh r’ou biallagh da coraa yn Chiarn dty Yee.

⁶³ As hig eh gy-kione, myr ghow yn Chiarn boggey jiu, dy yannoo mie diu, as dy vishaghey shiu: myr shen bee eh aigney yn Chiarn, dy stroie shiu, as dy choyrt shiu gys veg; as bee shiu astyrit ass y cheer, raad ta shiu goll dy chummal ayn.

⁶⁴ As nee’n Chiarn oo y skeayley mastey dy chooilley ashoon, veih’n derrey chione jeh’n theihll gys y chione elley; as ayns shen nee oo jeeghyn elley ’hirveish, nagh vel enney er ve ayd’s, ny ec dty ayraghyn orroo, eer fuygh as clagh.

⁶⁵ As mastey ny ashoonyn shoh, cha vow veg yn aash, chamoo vees aash ec boyn dty choshey: agh ver y Chiarn dhyt ayns shen cree er-creau, as sooillyn moaldey, as sou-aigney.

⁶⁶ As bee gaue dty vioys kinjagh kiongoyrt rhyt, as bee oo fo aggle oie as laa, as cha bee shickyrys erbee ayd jeh dty vioys.

⁶⁷ ’Sy voghrey, nee oo gra, Dy baillish Jee, dy beagh y fastyr ayn: as ’syn astyr, nee oo gra, Dy baillish Jee, dy beagh y moghrey ayn, son aggle dty chree, vees ort, as son shilley dty hooillyn, ver oo my-ner.

⁶⁸ As ver y Chiarn lesh oo reesht gys Egypt, lesh lhuingys, rish y raad my-e-chione loayr mee rhyt, gra, Cha vaik oo eh arragh: as shen y raad vees shiu chebbit dy ve er nyn greck rish nyn noidyn, son fir-vooinjerey, as inneenyn-veyl, as cha jean ad shiu y chionnaghey.